يايمه لاتنضـريلي
يايمه هدمو حيلي

ـــــــــــــــــــــــ

يمه زينــب ديـــري ديـري ...عيونج وكلبج سـوه
لاتنضـــريـــلــــي يـزينب ...بابي وعليه انـطـوه
يمه عصـــروني الاعـــادي...گــوه اشتـــم هــوه
واحس مدري اشطاح مني ...وسط هالنار انچوه

يايمه من يطفيلي
يايمه هـدمو حيلي

ـــــــــــــــــــــــ

يمه زينب روحي روحي ... ارد لـــــوجن بــللام
اله اكول انكسر ضلعي ... وكـام يجـري منه دم
يمه والبســمـــار فتني ... وروحي رادت تنهزم
وصبرتهه اني اعلمودج ...حارت بوسط الجسم

يايمه الكبر يوميلي
يايمه هــدمو حيلي

ـــــــــــــــــــــــــــ

كلشي شاغ مـن المصيبه ...ونكسر مني الضلع
وخصمي بعده بابي يرفس ... يريد حيـدر يستمع
وگــام ينـــزف ضلعي نور ... وجم صراط الي وكع
ودرت عيني عله الجنـــان ... لجــــدج يهــل الدمع

يايمه الغالي يبجيلي
يايمه هــــدمو حيلي

ـــــــــــــــــــــــــــــ

يمه لا خصمي يشوفج ... گبــل جيت كربله
يمه وبصــوطه يلحگـج ... ودارج اتصير الفله
وخــــاف تتأذين زينـب ... وانتي عــدنه مدلله
وعلي مگيد بالــوصيـه ... مانـــــريد انحمله

يايمه انتي قنديلي
يايمه هـدمو حيلي

ـــــــــــــــــــــــــ

يمه زينب هــاي ناري ... بدت بيه وتكضي بيج
انه بابي يطيــح منهه ... والخيــم توگـــع عليج
وانه عيني تصير حمره ... وانتي زركه تصير اديج
وفضه راحت تعتنيلـي ... وانتي محـــد يعتنيج

يايمه كسري يحجيلي
يايمه هـــدمو حيــلـي

ــــــــــــــــــــــــــــ

ينعگد گـلبـج مصــــايب ... وانه بلطف حاضـره
وانتي سـر الصبر عنـدچ ... محد الــي يفســره
زينب الله وحده خالــــق ... وماخلق مثلج مـره
الجنه تحت اقدامج انتي ... انتي ام كل صابره

يايمه السبي كل ويلي
يايمه هــــدمـــو حيلي

سيد صادق الاعرجي