لطمية لليلة العاشر
الشاعر قاسم الساعدي المندلاوي
********
يا ليل الوداع      غطّينه ابسمارك
يا ليل الوداع      لا يطلع نهارك
لو طلع منك صباح    يملي دلاّلي جراح
***********
آه يا ليل المصيبة وآه يا ليل الحـــــــزن
تدري من يطلع صباحك يسحن اگليبي سحن
چم أخو عندي ايتگطّع بالحوافر ينطـــــــحن
چم خدر يحترگ ليّه وينذبحلي چم أبــــــــــن
يا ليل الوداع      خلّينه انتوادع
يا ليل الوداع       هذا آخر اموادع
لا تلبّسني النياح      يملي دلاّلي جراح
************
هاك شوف اگلوب جمرة والكلام ابلا كــلام
نحچي بدموع اونياحة امن الحچي كلنه صيام
بين أم تشبگ أبنهه وبين ابو ابعازة عمــام
وبين صرخات العطاشا وبين مأتم بالخيــام
يا ليل الوداع       وصّلهه العمامي
يا ليل الوداع      دمعاتي وكلامي
فجرك ابچبدي رماح     يملي دلاّلي جراح
************
شوف هالشبان كلهم لو طلع صبحك يليــل
تهوى برماح وبواتر يمهم ايطول العويــل
هذا حنّة عرسه دمّه وذاكَ بگماطه چتـــيل
وعالشريعة اهناكَ ذخري وكافلي بدماه غسيل
 يا ليل الوداع     كل لحظة تمرنه
يا ليل الوداع       يتوجّر جمرنه
فجرك ابّيض الصفاح  يملي دلاّلي جراح
***********
مدري أحفظ يا وصيّة مدري اودّع يا شبــاب
وآنه عندي اعلوم بالطف منهم ايطول الغيــاب
ليّه همّه احجاب چانوا من علي هذا الحجـــاب
لو هووا بيش انتحجّب واحنه تربات الكتــاب
  يا ليل الوداع      نشتم المناحر
يا ليل الوداع      موعدهه البواتر
يحمل ابجيته سلاح    يملي دلاّلي جراح
***********
باچر ابأيدي أقدم ساعة الملگة المهـــــر
لابن ابو وأدري ليّه ما يرد لن ينّحــــــــر
تسع مية وألف طبرة احساب جسمه ينطبر
ويبدي يا ليل اعله زينب من بعد عزهه الأسر
يا ليل الوداع      ابهيدة ابهيدة إمشي
يا ليل الوداع. ليلك خافي كلشي
وكت حي اعله الفلاح    يملي دلاّلي جراح
https://telegram.me/joinchat/C0L9qUBUHKWM3eHf6Vo0Kg