Shoiru she'ru shuur

Sog'ingan yurakning buyukdir dardi...

***
Muhabbat ertagin barchasi yolg'on,
Menimcha, sevgi deb hech kim o'lmagan.
Yaralgandan beri zaminu osmon
Sizni sog'inishdek azob bo'lmagan!

Bu haqiqat erur!
Tuyular abas
Qaysning qarog'ini qumga to'ldirgan,
Muhabbat o'tkinchi, muhabbat havas,
O'ldirsa, Majnunni sog'inch o'ldirgan!

Sog'ingan yurakning buyukdir dardi,
Goho yig'latadi,
Goho kuldirar.
Meni kutib turar Qaysning qismati -
Sog'inch ko'zlarimni qumga to'ldirar..!

FFF

@shoirusherushuur

ЖЎНАТИЛМАЙДИГАН ХАТ

Нечун сени кўрсам, ғамларим кетар,
Кўзлари ғуссага тўлган гулойим?
Ғам недир, ортиғу камларим кетар,
Бор-йўғим зер-забар қилган гулойим?

Султон бўлолмасман уйингда сенинг,
Сен ҳам бўлолмассан ғамхўр, дастёрим.
Наҳот яралгансан шўримга менинг,
Ҳамиша беморим, ҳамиша зорим?

Ҳали ер остига эмасмиз лойиқ.
Фаришта эмасмиз кўкка чиқарга.
Ажабки, ҳакамдир бизга халойиқ,
Куч йўқдир тоғнимас, сўзни йиқарга.

Ҳаргиз боролмасман сен томон босиб,
Сен ҳам чиқолмассан остона ҳатлаб.
Мен ўқиб йиғлайман ўзим хат ёзиб,
Сенга етиб бормас мен битган хатлар.

Аъзам ЎКТАМ

@shoirusherushuur

***
Ko'z ilg'amas dunyo - toqatimdan tor,
To'ymadi shuncha yil ko'z yoshim ichib.
Tugab borayotir yurakda mador,
Bugun
Ruhimni-da oldim opichib.

Bo'g'zim kuyib ketdi - tortmadim bir oh,
Har tongim yangi bir dard bilan qutlar.
O'lsam, na sizlar, na so'zlarda gunoh,
Meni xarob qilar og'ir sukutlar.

She'rga sig'maydigan og'rig'im bisyor,
Yozib ham gunohkor bo'lgim kelmaydi.
Nima qilay,
Dunyo toqatimdan tor -
Yashagim kelmaydi!
O'lgim kelmaydi!..

Muqaddamxon Saidrasulova

@shoirusherushuur

#mutolaa_vaqti #Remark #uch_oğayni

"O'lging kelguncha yashagandan ko'ra, yashaging kelayotgan paytda o'lganing ma'qul."

Erix Mariya Remarkning "Uch og'ayni" romanini tamomladim. Remark falsafasi tahsinga loyiq. Ruhiyat tasviriga urg'u berilgan - muallif qahramonlar ruhiyati tasvirini shunday mahorat bilan yoritganki, urush sahnalariyu, ijtimoiy vaziyat xususidagi alohida o'rinlarga hojat qolmagan (tasvirni o'qib, tasavvurni ishga solsangiz bas). Noumid shayton, deb bejiz aytilmagan - umidsizlik insonni har qanday "shaytonlik"dan tap tortmaydigan qilib qo'yishi mumkin. Asarda g'ariblik, chorasizlik, pirovardida, umidsizlikka mahkum butun boshli xalq ruhiyati qalamga olingandek. Jism - ruh bilan hayot. Asar qahramonlarida esa "hayot alomatlari" allaqachon yo tumanga, yo tuproqqa singib ketgan.

#faqat ))) Odob-axloq me'yorlari buzilgan o'rinlarini hisobga olsak, asar har qanday auditoriyaga ham mos emas (aslida, bizga ham to'g'ri kelmaydi). Tarjima bilan bog'liq juz'iy kamchiliklar yo'q emas. Nima bo'lganda ham, asar uchun muallifga va uni bizga yetkazgan tarjimonga tashakkur)

#men_sevgan_qahramon Otto Kester - haqiqiy qahramon) Vazmin, mulohazali, g'amxo'r, oliyjanob va qat'iyatli. Bir so'z bilan aytganda, mujik)))

#asardan

Kamtarlik va halollik faqat romanlarda rag'batlantiriladi.

...Yolg'iz odamni hech kim tashlab ketmaydi.

O'lganlarning xotirasiga izzat-ikrom - ularning oldidagi gunohni anglashdan boshqa narsa emas. Odamlar marhumlar tirikligida ularga yetkazgan ozorlarini yuvmoqchi bo'ladilar.

Odamzot yovuz, lekin ezgulikni yaxshi ko'radi... faqat birovlardan chiqadigan ezgulikni yaxshi ko'radi.

Andisha - birovning xatolarini aytmaslik va uni tuzatmaslik xususida yozilmagan norasmiy bitim. Jirkanch murosa.

Erkak kishi uchun maynavozchilikdan ortiq sharmandalik yo'q.

Hozirgi yoshlarga hayronman. O'tmish sizlarga yoqmaydi, bugungi kundan nafratlanasizlar, kelajak bilan ishinglar yo'q. Oxiri baxayr bo'lsin-da ishqilib.

Teatrlar, konsertlar, kitoblar - bularning baridan qo'limni yuvib, qo'ltiqqa urganman. Ular zamon ruhiga mos emas. Siyosat har qanday teatrning, tungi otishmalar ajoyib konsertlarning, odamzot ehtiyojidan iborat ulkan kitob butun boshli kutubxonaning o'rnini bosadi.

Yigirmanchi asr ustidan kulmagan odam o'zini osishi kerak. Lekin uzoq kulib ham bo'lmaydi.

- Hech qanaqa tashvishim yo'q, - dedim men. - Boshim og'riyapti.
- Bu asrimiz illati, Robbi, - dedi Ferdinand. - Undan ko'ra boshsiz tug'ilganimiz yaxshi edi.

- Rostini aytsam, yer yuzida yurib, u haqida hech narsa bilmaslik uyat. Hatto gullarning nomini ham bilmaymiz.
- Xafa bo'lma, - dedim unga. - Yer yuzida nima uchun yurganimizni bilmasligimiz undan ham uyat.

Taqdirga tan berish, o'yladim men. Nima o'zgaradi shu bilan? Kurashish kerak, garchi bu axlatxonada oxir-oqibat mag'lub bo'lsang ham kurashish kerak. O'zingga aziz bo'lgan qittaygina narsa uchun kurashish lozim.
Taqdirga yetmishga kirganda tan bersa ham bo'laveradi.

INSONIYAT O'LMAS SAN'AT OBIDALARINI YARATDI, AMMO O'Z QAVMIGA DAXLDOR KIMSALARNING HAR BIRINI LOAQAL NONGA TO'YG'AZISHGA QURBI YETMADI. (!!!)

Ayni paytda, ayolni sevish va qashshoq bo'lish naqadar og'irligi xususida o'ylardim.

Faqat baxtsizlargina baxtning nimaligini bilishadi. Baxtli odam hayot quvonchini qo'g'irchoq kabi tuyadi: u bu quvonchni ko'z-ko'z qiladi, xolos, aslida bundan bebahra. Yorug' paytda chiroqning nuri ko'rinmaydi. U qorong'uda ko'rinadi.

Muqaddamxon Saidrasulova

@shoirusherushuur

***
Yuragimni g'ijimlab og'riq,
Qog'ozdayin o'tga otadi.
Buncha og'ir so'zlarning yuki,
Xanjar bo'lib qalam botadi.

Yuragimni g'ijimlab og'riq,
Hislarimni belaydi qonga.
Qon bo'lmagan birgina toqat,
Ko'ngil to'lmas bitta qalqonga.

Yuragimni g'ijimlab og'riq,
Qilmoqchiday nafasimga qasd.
Nafasimdan, jonimdan aziz,
Iymonimga yetmasin shikast.

Yuragimni g'ijimlab og'riq,
Ko'zlarimga tutadi parda.
Qaro tunga to'kkan yoshlarim,
Yuvib ketar oppoq saharda.

Yuragimni g'ijimlab og'riq,
Toraytirar dunyolarimni.
Aralashar hayot ranglari,
Qoraytirar dunyolarimni.

Yuragimni g'ijimlar og'riq...
Oh, ko'ksimda tutunning hidi!
Hasratini she'r qilgan Yurak,
Qog'ozchalik qadring yo'qmidi?!

Kuyuk dilga yo'q o'zga malham,
Allohim, bir O'zingga band qil.
G'ijimlangan yuragimni ham,
Dargohingda O'zing baland qil..!

Muqaddamxon Saidrasulova

@shoirusherushuur

***
Kelma!
Sog'inchni o'ldirar sening tashrifing,
Diydorga to'yishdan qo'rqaman, kelma.

Kelma!
Hijronning ovchisi bo'lgan visolga,
O'ljasin berishdan qo'rqaman, kelma.

Kelma!
Tug'ilmagan she'rlar tug'ilsin hali,
Uvolga qolishdan qo­'rqaman, kelma.

Kelma!
Bir olam baxt bilan kelarsan, kelsang,
Men baxtli bo'lishd­an qo'rqaman, kelma.

Kelma!
Mana shu dard bilan, gulim, tirikman,
Davodan o'lishdan qo'rqaman, kelma.

Najmiddin Ermatov

@shoirusherushuur

***
Bu qanday kuz, xazonlari munglig'-munglig'?
Tegramizda mezonlari munglig'-munglig'?
Tushlarda ham qolmabdimi begard umr,
Yo alhazar, tushlari ham o'nglig'-o'nglig'.

Xazon raqsi o'ynatgaymi, sel qilgaymi,
Yonib turgan bag'irlarni kul qilgaymi?
Bizni pana qilib turgan huuuv majnuntol,
Yaproqlarin to'kib, yerga yiqilgaymi?

Za'faron tus ko'rinmoqda, voh, ko'z oldim,
Xayol chopgan ko'chalarga bir ko'z soldim.
Qo'llaringni bermaysanmi sevgilim-a,
Qahratondan battarroq bir Kuzda qoldim...

Xurshid Abdurashid

@shoirusherushuur

#mutolaa_vaqti #Isajon_Sulton

Isajon Sulton, "Boqiy darbadar"

1. Qanchalar badbaxt bo'lmasin, Iblisning borligi inson bolasi uchun yaxshidir. Olovning mavjudligi temirning toblanishi uchun lozim bo'lgani kabi. Chunki olovda toblangan temir yanada mustahkam va ishonchli bo'ladi.

2. Odam bolasidan boshqa hamma bir tilda gaplashadi, o'g'lim... Aslida, bunday sirlarni qancha ko'p anglaganing sayin shuncha chuqur sukutga tolasan. Chunki ba'zi bilimlar hatto halokatli bo'ladi, bolam.

3. ...tabiat BIZSIZ HAM mukammal ravishda o'z hayotida davom etmoqda, o'zgartirishlarimizga va kashfiyotlarimizga muhtojligi yo'q.

4. Barhayot odam bu hayotni rad etib, Yaratganni izlab topishni ixtiyor qilgan ekan, boshqa tomondan, Parvardigori olam istagan tarzda dunyoga kelgan(!) insonlar kelajak sari mutlaqo bo'lak bir yo'ldan ilgarilab bormoqda edilar.

5. Halokatli taraqqiyot yo'li(!)

6. Tangri Taolo fitratimga Sizday muhtaram zotga (Otaga) taslimiyat xususiyatlarini singdiribdi...

7. Nazarimda dilimning ildizlari shu yer osti buloqlariga bog'lab qo'yilganday, uzilsa quriydigandek. (Mana, Vatan!!!)

#taassurot #shaxsiy_xulosa

"Boqiy darbadar" - Insoniyatning har qanday sohada erishgan yutug'i olam va odamni Yaratgan Zotning qudrati qarshisida qum zarrasicha kelmasligi... Har lahzada, har qadamda uchratadigani - Uning qudrati va marhamatidan bino bo'lgan mo'jizalarga loqayd so'qirlar... Butun koinot uning foydasi uchun xizmat qilgani holda, unga koinotni "bo'ysundirib" qo'ygan Zot roziligi uchun o'zidan hech nima hosil qilmay, hoyu havasga qul bo'lib, sarobga ergashgan darbadarlar...

Muqaddamxon Saidrasulova

@shoirusherushuur

***
Garchi bu dunyoda umr bir sayr,
Ammo tiriklikning o'zi bir hayr.
Garchi topganimiz ming bitta xato,
Ammo bular bari taqdirdan ato.
Garchi dillarimiz topdi ko'p ozor,
Ammo ozorlarning bir kun ajri bor.
Garchi goh ko'ngil g'ash, so'zlar g'amboda,
Ammo umid to'la qalblar duoda..!

Muqaddamxon Saidrasulova

@shoirusherushuur

* * *
Ҳар сония умримга қасд қилаверди,
Мен-чи, йўлда фақат ҳижронгул тердим.
Тошкент ёзларининг сокин тунида,
Умримни сенингсиз онларга бердим.

Ўн уч рақами бор трамвай қайтар,
Ширин хотирларни жамлаб, изига.
Эсимда, ўшанда термулгандим, жим...
Заминнинг энг сулув, гўзал қизига.

Беғубор жилмайиб, сўзлар эди у,
Мен юрагим билан тинглаб борардим.
Унинг қаршисида нақадар ожиз,
Ғариб эканлигим англаб борардим.

Бугун ўшал мени орзуга элтган,
Трамвай ортидан бўзлаб қарайман.
Ўшанда ўзингга айтаолмаган,
Изҳортус гапларим сўзлаб қарайман.

Ҳар сония умримга қасд қилаверди,
Мен-чи, йўлда фақат ҳижронгул тердим.
Тошкент ёзларининг сокин тунида,
Умримни сенингсиз онларга бердим.

Бас, йўлга отлангум ҳозироқ, шахдам,
Сенсиз кунларимга якун ясайман.
Самарқандга элтган ҳар қадамимда,
Тобора ўзингга яқин яшайман.

Измимни топшириб олис йўлларга,
Орқалаб борарман ёруғ кунларни.
Ҳар қадамим мени ўзингга элтар,
Ҳар қадам орқалаб борар тунларни.

Аразларингни қўй, унут барчасин,
Шундоғам дилни кўп азобга солдик.
Келақол, уялма, ахир дунёда,
Бир улкан ишқ билан сену мен қолдик.

Дилмурод ДЎСТ

@shoirusherushuur

#mutolaa_vaqti #remark

- ...Xo'sh, qalaysan? O'ttiz yoshliga o'xshaysanmi, yo'qmi?
Men qo'l siltadim.
- E, gapirma. Ham o'n olti, ham ellikka kirganga o'xshayman.
- Zo'r-ku! Bundan ortiq yana nima kerak? Demak, sen vaqtni tizginlab, ikki umrni kechirayotgan ekansan.

《☆》《☆》《☆》

- Zo'r bola, a? - deb so'radi frau Zalevski mehri tovlanib.
- Bu haqda yigirma-o'ttiz yildan keyin bir narsa deyish mumkin, - javob berdim men.

《☆》《☆》《☆》

Odamzot yovuz, lekin ezgulikni yaxshi ko'radi... faqat birovlardan chiqadigan ezgulikni yaxshi ko'radi.

《☆》《☆》《☆》

U odam tanlashni bilardi. Insonning husni yoki madaniyatiga aqli yetmasa ham, uning mohiyatiga bexato baho berardi.

《☆》《☆》《☆》

Hayot to'g'risida nimani bilasizlar? Sizlar o'z tuyg'ularingizdan cho'chiysizlar. Sizlar maktub yozmaysizlar - telefonda gaplashib qo'ya qolasizlar. Xayol surish sizlarga begona - shanba-yakshanba kunlari shahar tashqarisiga chiqsanglar bo'ldi. Sizlar muhabbatning hisob-kitobini qilasizlar, siyosatning hisob-kitobini bilmaysizlar - ana shunaqa nochor avlodsizlar!

《☆》《☆》《☆》

Andisha - birovning xatolarini aytmaslik va uni tuzatmaslik xususida yozilmagan norasmiy bitim. Jirkanch murosa.

《☆》《☆》《☆》

Erkak kishi uchun maynavozchilikdan ortiq sharmandalik yo'q.

Erix Mariya Remark, "Uch og'ayni"

@shoirusherushuur

***
Qishloq yoʻllarini kezarkansan sen,
Bahoriy shamolda uchib xayoling.
Koʻzlaringda quyosh yormoqdadur en,
Men sening Usmoning, sening Biloling!!!

Lablaring tamshanar ( O qanday goʻzal )
Lablaringdan sizib chiqadi ismim.
Men yana bir qayta tugʻilgan mahal,
Nafasing havoga chizadi rasmim...

Gezarib boqadi husningga olam,
Koʻp gaplar otishar toshlar tilida.
Hislaring hech kimga bermaydi salom,
Barchasi tosh deysan ishqning yoʻlida...

Faqat siz...
Faqat siz...
Faqat siz...
deysan,
Boshqa soʻz demoqqa yetmaydi holing.
Yana bir boqasan, goʻzal va oʻychan,
Barcha sogʻinchimga nuqtadur xoling!!!

...mana, yon beribdan oʻtasan bechoʻgʻ,
Ming yillik devorlar oʻrtamizda jo
Nigohing boshqa bir manzil-la bejoq,
Sen uchun bir toshga aylandimmi yo..?

Gezarib boqaman olam qatori
Koʻp gaplar aytaman toshlar tilida.
Nahotki shu boʻlsa taqdirda bori?
Nahot bir toshman men, sening yoʻlingda..?

Faqat siz...
Faqat siz...
dema iltimos!

Muhiddin Nido

@shoirusherushuur

***
Sirli manzillarga yetadi ko‘zim,
Yuraman, chopaman – yo‘lim yetmaydi.
Nega O‘zimga hech o‘tmaydi so‘zim,
Nega bulutlarga qo‘lim yetmaydi?

Nega “nega”lardan bo‘shamas xayol,
Aqlim zo‘riqdimi?
Ruhim toliqdi.
Yashasa bo‘lmasmi biroz bemalol,
O‘jar yurakkinam buncha hovliqdi?!

To‘xtatib bo‘larmi?
Besar yurakni
Nedir chorlayverar bulut ortida.
Armonlar tark etar o‘jar yurakni,
Orzular tug‘ilar ko‘ngil yurtida…

Muqaddamxon Saidrasulova

@shoirusherushuur

***
Tashqarida shamol, devonaholdek,
Telbalarcha o’zin uradi har yon.
Misli ko’chadagi telba shamoldek,
Yurakda alamlar ko’tarar isyon.

Misli ko’chadagi telba shamoldek,
Tomirlarda chopar devona hislar.
Yana ko’ngil bilan hasratda qoldik,
Yosh to’la ko’zlardan quvonch olislar…

Muqaddamxon Saidrasulova

@shoirusherushuur

* * *
Yig'lasang, yig'lasang, to'yib yig'lasang,
Yig'lasang, yurakni o'yib yig'lasang,
Yig'lasang, yoshlaring oqsa qalbingdan,
Yig'lasang, yoshingdan kuyib yig'lasang,
O'sha kuyuk yoshlar men bo'lsam-a, men...
O'sha o'yiq yurak men bo'lsam-a, men...

Javlonbek Yaxshiboyev

@shoirusherushuur

***
Kelgin, qismatimiz kelishdir asli,
Ikkimiz bir hisga bo'laylik asir.
Hadikni qo'y endi, ey Havvo nasli,
Men taqiq mevasi emasman axir.

U qizda ishqim bor, ko'nglimda u qiz,
Ey, Xudo, bu yuking bunchalar og'ir.
Kundan kun boryapman osmonga cho'kib,
Men Nuhning kemasi emasman axir.

Najmiddinbek Ermatov

@shoirusherushuur

ИШҚ ҲАҚҚИ

Ажаб, дил шод бўлур тинглаб
Қиёматдан хабарларни.
Тобора шавқим ортгайдир
Сезиб келгич хатарларни.
На роҳат, на азоб боис
Сен айтган йўлга кирмишман.
Шу ишқ ҳаққи, хатарсиз қил
Ўзинг сори сафарларни.

Аъзам Ўктам

@shoirusherushuur

***
Ҳали дунё сутдай оқ эди,
Боғлар яшил, осмон ложувард.
Қуёш ерга яқинроқ эди,
Ой юзида кўринмасди гард.

Тебранарди майсалар сокин,
Кўкдан ёғиб майин наволар.
Борлиқ узра Бахт эди ҳоким,
Жонга ҳузур тоза ҳаволар!..

Сезмай қолдим, қалб қандай қотди,
Қачон армон ёзолди куртак?
Тушларим ҳам ўзгариб кетди,
Энди бари олис бир эртак.

Қани кунлар – менга аталган,
Лойларгами ё ботиб қўйдим?
Ҳар заррадан чирой ахтарган
Кўзларимни йўқотиб қўйдим...

Беҳзод Фазлиддин

@shoirusherushuur