Гельминтоздан сақланиш учун қандай профилактик чоралар кўрилиши керак?
ССВ Матбуот хизмати Тошкент педиатрия тиббиёт институти доценти Дурдона Ғаниева билан суҳбатни давом эттирди (2-қисм).
— Гельминтознинг келиб чиқиш сабаблари қандай?
— Паразитлар личинкалари ва тухумларининг атроф муҳитда кенг тарқалганлиги ва шахсий гигиена қоидаларига риоя қилмаслик гельминтлар билан касалланишнинг асосий сабаблари бўлиб ҳисобланади.
Гельминтларнинг тухуми зарарланган инсонлар ва ҳайвонларнинг ахлати билан ташқарига чиқади. Болалар мева- сабзавотларни ювмасдан ейиши, ўйинчокларини, ўқув қуролларини оғзига солиши натижасида гижжа билан зарарланади.
Хожатга боргандан сўнг инсонда гижжа тухумлари қўл терисида, тирноқлар остида ёки кийимида қолиши мумкин. Кўпинча болалар одамлар кўп тўпланадиган жойлар (болалар боғчаси, мактаб, болалар майдончаси)да гижжаларни юқтириб олиши мумкин.
Гижжалар билан зарарланишнинг қуйидаги сабаблари ҳам бор:
🔻 сифатсиз сув ва овқатни истеъмол қилиш;
🔻 бошқаларнинг шахсий буюмларидан фойдаланиш (сочиқ, ички кийим кабилар);
🔻 сабзавот ва меваларни яхшилаб ювмасдан истеъмол қилиш;
🔻 боланинг уй ва кўчадаги ҳайвонлар билан яқин мулоқот қилиши.
— Касаллик қандай ташхисланади?
— Гельминтларнинг специфик симптоматикаси йўқлиги сабабли кўпинча ота-оналар болада жиддий касалликларга шубҳа қилиб, бошқа турли мутахассис (пульмонолог, аллерголог, иммунолог)ларга мурожаат қиладилар.
Сурункали дерматитлар, гастроэнтерология патологиялари ва ўпка касалликлари бўлган болалар, албатта, гельминтларга текширилиши лозим.
Чунки гельминтлар одатда ичакларда устунлик қилади, уларни аниқлаш учун, биринчи навбатда, нажас таҳлилига юборилади.
Таҳлил боланинг ошқозон трактида паразитларнинг мавжудлиги, шунингдек, унинг турини аниқлашга ёрдам беради.
— Даво чоралари ҳақида хам гапириб берсангиз.
— Самарали даво паразитлар ривожланишининг барча фазаларида улар билан курашиш, нохуш симптомларни бартараф этиш ва бола организмини тиклашга йўналтирилган. Бунинг учун, биринчи навбатда, беморга гижжаларга қарши препаратлар танланади.
Ушбу воситалар паразитларнинг мушак ва асаб тизимини блоклаш ва уларни организмдан табиий йўл билан чиқариб ташлашга ёрдам беради.
Шуни таъкидлаш лозимки, оиланинг барча аъзоларида бир вақтнинг ўзида терапияни ўтказиш касалликни самарали даволашга имкон беради.
— Қандай профилактика чораларини тавсия этасиз?
— Гижжалар билан зарарланмаслик учун қуйидаги қоидаларга амал қилиш талаб этилади:
🔹 болада шахсий гигиена кўникмасини имкони борича эрта шакллантириш;
🔹доимо боланинг қўллари тозалигига эътибор қаратиш;
🔹 фақат тоза сув истеъмол қилиш;
🔹истеъмол қилишдан аввал сабзавот, мевалар ва кўкатларни яхшилаб ювиш;
🔹 гўшт ва балиқ маҳсулотларига зарур термик ишлов бериш;
🔹 уй ҳайвонларини ўз вақтида эмлаш ва уларни дегельминтизация қилиш.
❗️Агар ота-оналар болада гижжа борлигига шубҳа қилсалар, кечиктирмасдан мутахассис кўригига боришлари зарур. Шифокорлар гельминтозларни тезда ташхислаш ва тегишли давони тавсия этишда ёрдам кўрсатадилар.
Соғлиқни сақлаш вазирлиги
Жамоатчилик билан алоқалар бўлими.
▶️@ssvuz▶️@ssvmatbuotkotibi
