እንደ እሳት እራት ወደ መጥፊያ፣የምክለፈለፍ ፈጣን ተጓዥ ነኝ።ወደ ተጠመደልኝ የጥፋት ወጥመድ ስሮጥ እግሮቼ ይበረታሉ።ጉልበቴ ይፈረጥማል።እርምጃዎቼ የግልቢያ ያህል ይነጉዳሉ።የሚያደናቅፈኝን የትኛውንም እንቅፋት እሻገራለሁ።መንገዴ ላይ መሰናክል የሚሆኑ አያሌ ጥሻን መንጥሬ፣ወደ ማስበውና ወደ ምጓጓለት ስርፋ አፈተልካለው።

"ኣይበጅህም! ተው ተመለስ!" ዓይነት መልዕክት ያላቸው መውደቆችን ቀምሻለሁ።የሚታየኝ ግን የመድረሻዬ ብልጭልጭታ ነው።በቁስ ቅበ ቅዱሳት ስለደመቀው ጉጉቴ የተደሰኮሩትን ይትብሃሎችን ብቻ ነው የማደምጠው።
የማስተውለው ከመሻቴ ማዕድ ላይ መድረሴን ቢቻ ነው።
እናም ላበቴ እስቲጎርፍ እታገላለሁ።አሞቴ እስኪፈስ ጣጥሬ ወደ ምኞቴ ኣፈተልካለሁ።ጋራ ጥሼ፣አለት ምሼ፣
ባላሰለሰ ጥረት እሮጣለሁ።ከምከስምበት ገደል ቋፉ ላይም እደርሳለሁ።ደርሼ ግን ወደ መጥፊያዬ እገባበትን አቅም ይነሳኛል።ይሃ ሁላ የታገልኩለት ምኞቴ አይሰምርልኝም።

የምኞቴ መኮላሸትም ሰበብ ጌታዬ እንደሆነ አስቤ
አብዝቼ አማርረዋለው።የጠላኝ ያኽል ይሰማኛል።ተስፋ ቆርጬም እሰባበራለሁ።የስብራቴ ጉዳቱ ለሌሎች መልካም አጋጣሚዎቼንም የመታገል ጥንካሬዬን ይቀማኛል።

እንዲ እንዲያ እያለ ቀናቶች ይነጉዳሉ። ሕይወትም ይቀጥላል።አንድ ቀንም ይመጣል።በዚያ ቀን ያኔ… ጓጉቼ የሮጥኩለት ጉዳይ፣ያልሰመረው ምኞቴ እውነተኛ ገፅታው ተገልጦ አየዋለሁ።የቁሳዊ መጌጫው ተገልቦ ኣስተውለዋለሁ።በእርግጥም መጥፊያዬ እንደነበር እገነዘባለሁ።የማልወጣበት አዘቅት ውስጥ ለመግባት እየተፍጨረጨርኩ እንደነበርም ይገባኛል።

ከዚያም ጌታዬን አስባለሁ።እኔ ወደ እሳት እየተጣደፍኩ ሳለሁ፣እሱ ከቋፉ ላይ ደርሶ እንደመለሰኝ ይገባኛል።
እሱ ከክፉ ነገር እየጠበቅ ሳለ፣እኔ "ምኞቴ ተደናቀፈ"ብዬ ያማረርኩትን ኣስታውሳለሁ።ሐፍረት ይጠፈንገኛል።
የሳትኩኝ አመፀኛ ብሆንም ፍቅሩን አልነፈገኝም ነበር።የሚበጀኝን ሊሰጠኝ አስቦ፣የማይበጀኝን ፍለጋ ብታትርም እኔን ለራሴ ጥሎ አልጣለኝም።በራሕመቱ ከለለኝ።ሁሉም ነገር የገባኝ ጊዜም ፍቅሩ ለሕሊናዬ ይከብደኛል።ሀተታው ለቃላት ይርቃል።

እውነታው በገባኝ ልክ አብዝቼ አፈቅረዋለሁ።የማፈቅረውን ያህል አስባለሁ።የሚያፈቅረኝን ያህል ማሰብ ግን ለአቅሌ ይጠናኛል።«ካልሰመሩ እያንዳንዱ ምኞቶች ጀርባ የአሏህ እዝነትና ጥበቃው አለ!»ብዬም ለራሴ እነግራለሁ።ባሰብኩት ቁጥር ፍቅሩ ያይልብኛል።

የምለው ሳጣም እንዲሁ ስሙን እደጋግማለሁ!

አሏህ!!