الشاعر حيدر الموسوي

بسم الله الرحمن الرحيم

[ علي الأكبر برز ]

علي الأكبر برز أوّل بَني هاشِم
ولإن مِنْ الحَرُب رادت يِرد سالِم
قرت ليلى دُعاء النُدبة للقائِم
_

مِشَه وعين الحنان اعله الحَرُب تِربه
كَلب أُم وإبنها الأكبر تحبّه
تجي بحسبة وتودّيها الف حسبة
بُقَت بالمهدي تدعي وتقره بالنُدبة

تنادي يا ابو صالح إحضر وليدي
دخيل ايدك أخاف يروح مِنْ ايدي
نَعَم غايّب واشوفك حاضر وعالِم
_

شبيه المصطفى مِنْ حاوطه العسكر
رَأَت لون الحُسين بكربلة تغيّر
قَبِل ما ينولد صاحت يمهدي احضر
أريدن سالِم ترجّع الي الأكبر

يمهدي مروّتك فَرْكَا يشيّبني
أريدن سالِم ترجّع علي إبني
أريده ينتصر عالبكر بن غانِم
_

إنتصَر عالبكر بن غانِم، كِسَر فيّه
ويكَل لحسين أريدن شربة أمْيَّه
دِخَلْهَا لخيمة امّه لكلها حنّيّه
يويلي ومِنْ دخل شافاها مغميّة

بجّه وناداها يمّه المهدي حضراني
أرجعت سالِم واجيت لشوفتّج آني
وَعَت بس الدمع فوكَ الوجن ساجِم
_

رِجَع للمعركة وبوجنته المدمع
وعِلِم عند الحُسين وليده ما يرجع
تصوّب وبسيوف الباشّطة تكَطّع
وشُمَر روحه الحُسين بصفّه بالمصرع

يكَلّه يالوِلَد شو سابح بدمّك ؟!
شكَولن لو أرد بجثّتّك لامّك ؟!
يربّي تحيّرت أرحمني يا راحِم
_

رِجَع بي، شافتّه امّه وهيّه مذهولة
يابو الأكبر .. الأكبر هذا معقولة ؟!
هنانه حسين صارت دمعتّه بطوله
وبُقَت عالجثّة أمّه تبجي معلولة

ييمّه لا تظن تُبْرَد بَعَد نارك
نَعَم والمهدي باجر ياخذ بثارك
بدولته ما يظل يحكِم بَعَد ظالِم


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي

بسم الله الرحمن الرحيم

[ حسين الثوريّة ]

مو بس وَنّة ومو بس دمعة ومو بس لطميّة
حسين العِبرة حسين العَبرة حسين الثوريّة

يريد بدمعتك ... تِصْنَع ثورتك
حسين الثوريّة
___

حسين مو بس فقط وَنّة ولا فقط دمعة ولَطُم
حسين مو مشي اعله جمرة ولا طَبْر فوكَ العَظُم
حسين أكبر مِنْ هذنّي والهن اهواي احتُرُم
بس يريد الدمعة تصبح ثورة ضد اهل الظُلُم


مو راسك وي دمعك ينزل كَدّام الظاِلم
حسين يريدك ترفع لائَك مَتذل وتساوِم

يريد بفكرتك ... تِصْنَع ثورتك
حسين الثوريّة
___

يالتِطَبُّر كون تعرف ليش ابو اليمّة انطُبَر
ويا أبو الزنجيل وَخّر كِلْ ذنب مِنْ الظَهَر
أوصل اليقطع وصالك ترضي مقطوع النَحَر
ولا تِزَغِّر حجم واحد لو شفت صيتك كُبَر


لا تتكبَّر واعرف قَدْرَك تربح ما تخسر
لا دِين ولا دنية تحصّل لمّن تتكبّر

كون بشهرتك ... تِصْنَع ثورتك
حسين الثوريّة
___

لا تصافِح جف اميّة وتلطم لكَطع الجفّوف
ولا تصير بيوم منحر بس تجامل بالسّيوف
ضَحّه بعيونه ابو فاضل خاطر عيونك تشّوف
إذَن قَدِّر هالمواقف وافتهم يوم الطفّوف


تعبوا أهل البيت وضَحّوا قَدِّر هالخدمة
لجلي ولجلك حتّه اليرضع هَمْ قَدَّم دمّه

عَلِّم فطرتك ... تِصْنَع ثورتك
حسين الثوريّة
___

قَبِل ما تبني المواكب إبني روحك بالعِلِم
والمُهِم حسين يرضه ، ورضه العالَم مو مُهِم
صير بالواقع حُسيني مو فقط بس بالإسِم
واخلص بخدمة إمامك وبنهج حُبَّه التِزِم

بحبل الله اتمسَّك واتوكل عالباري يعينك
وادعي بيمنة كافل زينب ياخذ بيمينك

إدعي بعبرتك ... تِصْنَع ثورتك
حسين الثوريّة
___

نظرة الباطل امْثَلَّثْ توكَع بنحر الطِفِل
الغِيبة نار وترضه بيها اخيام زينب تشتِعِل ؟!
والرياء عالجربّة وَجّه وين ما بالطف نَبِل
والعُجُب ما يعجب الله مِنّه إحذر لا تِزِل

إحذر تتعجّب لو تنغر تحبط أعمالك
وكَِلْ لحسين ارزقني النظرة وعيّشني بجالك

لازم كلمتك ... تِصْنَع ثورتك
حسين الثوريّة
___

فَكِّر بصاحب زمانك ومَهِّد انته لطلعتّه
دموعه تكسر خاطر الله لا تِزَيّد دمعتّه
بالعمل عَجِّل ظهوره حتّه تخلص غَيبتّه
بكَلبه عاشت جم مصيبة بس الأعظم عمتّه

جرح الشام يعيش بكَلبه وما لاكَي اضماده
ليل انهار ينوح ويندب يا ثار السّادة

يندِب حضرتك ... تِصْنَع ثورتك
حسين الثوريّة


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي

بسم الله الرحمن الرحيم

[ ياكفيل ]

ياكفيل ... ماكو مِثْلَك بَشَر
ياكفيل ... أحلى مِنْ الكَُمَر
ياكفيل ... سيّد اعله النَهَر

ياكفيل ياكفيل
_

ياجميل ونورك مغطّي الوجود
وجهك مجنّن المؤمن والحسود
فوكَ راسك سِجَد وارتاح العَمْود
وانته علّمت الخلود اعله الخلود

ما تموت ... عايّش بكل زمن
ما تموت ... باقي حُبَّك وطن
ما تموت ... غصبن اعله القَدَر

ياكفيل ياكفيل
_

ياكفيل وبَسْمِتَك سِر الحياة
إنته ماي وعطّشيت شجم فُرات ؟
باقي حَي للآن غصبن عالممات
وبقنوتك تِنْتِعِش حتّه الصلاة

بالدُعاء ... تصَفِّن شجم مَلَك ؟!
بالدُعاء ... كلشي يحصل الك
بالدُعاء ... تكَظي وقت السَحَر

ياكفيل ياكفيل
_

وَكَفِتَّك تتباها بيها ارض الطفوف
مِنْ نخاك حسين ذبّيت الجفوف
أعمه اجاك السَهَم ، بعيونك يشوف
جاعن وقَدَّمِت جسمك للسيوف

للسيوف ... قَدِّمِيت الجِسِم
للسيوف ... إنته أكبر حِلِم
للسيوف ... عزَّبِت بالنَحَر

ياكفيل ياكفيل
_

دِرِعْ ما تِلْبَس بحَرْبَك شي أكيد
حار دمّك حيل ويذَوّب الحَديد
تنوِلِد كِل ما يذبحونك جِدِيد
وللأخوّة اسمك صُبَح دولة ونَشيد

هالنَشيد ... يُبقه رَمْز الوِفَه
هالنشيد ... غِيرة وي عاطِفَّة
هالنشيد ... صوته باذن الدَهَر

ياكفيل ياكفيل
_

مِنْ وِصَلْت الماي ضامي وما رويت
ما ذِكرْت حسين ، لَنَّك ما نسيت !
كِلْ وفائَك هذا وتحِس ما وفيت
وكلشي دَنَّكَ مستحه لَمَّن بجيت

مِنْ بجيت ... كلشي دَنَّكَ خَجَل
مِنْ بجيت ... دمعك احمر نِزَل
مِن بجيت ... عَينك تهِل صُوَر

ياكفيل ياكفيل
_

ردت ترجع للخيّم والموت اجاك
طاحن جفوفك وبَعْده يرِف لِواك
[ يا أخي ادركني ] ارتِفَع بالطَف نِداك
ومِنْ أجاك الأخو بيا حالة لكَاك !

مِنْ أجاك ... أسرع من الضوَه
مِنْ أجاك ... ظَل يشِم بالّلوَه
مِنْ أجاك ... ظهره حيل نكِسَر

ياكفيل ياكفيل
_

حسين مادري بيا وَضِع رَد للخيام !
مِنْ بَعَد عبّاس عالدنية السّلام
إجت يمّه العايّلة مِثْل الحَمام
ما حِجه ووكََع الخيمة بلا كلام

بلا كلام ... وَكََع الخيمُكََة
بلا كلام ... والدَمِع يحّرِكََه
بلا كلام ... شَيَّب من القَهَر

ياكفيل ياكفيل
_

هاي اشارة انطاها والمدمع يفور
طاحت الخيمة ، إذَن مات الغيور
عاشت بيا حالة زينب ، يا شعور ؟!
المهدي ياخذ ثارك بيوم الظهور

بالظهور ... يظْهَر برايّتَك
بالظهور ... يقْتِل القِتْلِتَك
بالظهور ... لا سماح ومَفَر

ياكفيل ياكفيل


الحَمدُ لله والشكر والفضل والمنّة
[ هَذَا مِنْ فَضْلِ رَبِّي ]
بركات الكفيل سلام الله عليه
#رزقهم_سلام_الله_عليهم
حيدر الموسّوي

بسم الله الرحمن الرحيم

مؤسّس مذهبي ... ورسالة كل نبي
حقّقها جعفر

_آجركم الله وأحسن لكم العزاء والمواسات
بإستشهاد صادق القول والفعل إمام العزاء
وسيّد مجالس أبي الشهداء المولى أبي عبد الله جعفر بن مُحَمَّدٍ الصادق سلام الله عليهم أجمعين ...

#جعفري
#رزقهم_سلام_الله_عليهم
حيدر الموسّوي