Шерзод Комил Халил

Агностицизм

Қандайин яратган дунёни Раббим?!
Бу мискин давворда бизлар ўзи ким?!
Оламлар жим эрур, одамлар ҳам жим,
Билмадим, билмадим, била олмадим...

Чорламишдир бунда ҳаёт қонуни,
Шеър ёзсанг бор эрур баёт қонуни;
Бу маним қонунми, ё, ёт қонуни?..
Билмадим, билмадим, била олмадим...

О, мани бунча ҳам хаёлларим кўп,
Дунёда севгувчи аёлларим кўп!
Сизга берадурғон саволларим кўп?..
Билмадим, билмадим, била олмадим...

Абадий яшашни истайди кўнгил,
Шеър ёз деб ҳар куни қистайди кўнгил;
Ҳар замон ким мени эслайди кўнгил?..
Билмадим, билмадим, била олмадим...

Ҳар дам ўйнашади мен билан ажал,
Қилиқлари совуқ, қўпол ва дағал;
Берайин умримга дўстим не бадал?..
Билмадим, билмадим, била олмадим...

Тарк этарлар мени дўсту-ғанимлар,
Гулдай паривашлар, гўзал хонимлар;
Манзилга боради мен билан кимлар?..
Билмадим, билмадим, била олмадим...

Тугамас экан ҳеч кўнгилнинг ғами,
Бунчалар ширинсан ҳаётнинг таъми!
Битдими тугалиб умрнинг шаъми,
Билмадим, билмадим, била олмадим...
20.08.2019.
Тошкент-Учтепа.

@Sherzodkomilkhalil