НОДИРАБЕГИМ
Бўғзимдадай Насруллонинг қиличлари,
Жаҳолатнинг пардапеч шум хуружлари.
Шамол эмас ҳувлаган у, Моҳларойим,
Қўқонингиз ҳануз тортар оҳлар, ойим.
Юрт олмоқлик амирларнинг касби, майли,
Қудратининг намойиши – ҳарби, майли.
Ноғоралар ларза солди булутларга,
Чарс йигитлар сакраб минди чарс отларга.
Бухородан Қўқонгача кетди урҳо,
Ҳуркиб кетди, қушлар учмай қўйди ҳатто.
Боис кўпдир, билсанг, турфа урушларга,
Дин баҳона бўлди бу гал юришларга.
Ҳақ бўлмаган қачон хонлар даъволари?
Жаҳолатга парда тортди фатволари.
Қиличлари ярқиради ғазаб билан,
“Ё шаҳид, ё ғозий!” деган қасам билан.
Ваҳшатидан Зарафшон-да иланг-биланг
Қумликларга суқди бошин ваҳма билан.
Воҳ йигитлар, на шаҳид, на ғозий бўлди,
Турон эли бир-бирига ёғий бўлди.
Тафтиш бўлди тўшаккача, сирдошгача,
Қон сачради ботаётган қуёшгача.
Балки, йигит бўлар эди бир диловар,
Йўқ, Муҳаммадаминни ҳам қўймадилар.
Девонингиз, ойим, нима гуноҳ этди,
Отилган қуш патларидай тўзғиб кетди...
Майли, қўйинг, жўмардларни, ботирларни,
Майли, дунё қачон суйган шоирларни.
Ҳарби майли, дин ҳам майли, ёғийлик ҳам,
Оҳ, Бухоро, номусингга тушди мотам:
Борми, агар бўлса айтсин эрлар қавми,
Ожизага қилич чопган эр бўларми?
Мўъминага қилич чопган эр бўларми?
Маҳшаргача шаъни қаро ер бўларми?
Оҳ Бухоро, қайга отдинг ор сасини,
Билмасмидинг “Байда-Бобур” қиссасини?
Шу ҳам шавкат, шу ҳам мақсад-қасд бўлдими,
Осмонларинг тупроқлардан паст бўлдими?
Зафар бу деб, нусрат бу деб ким ҳам айтди?
Қўқон ёқдан отлар бошин эгиб қайтди...
Водий узра учар оппоқ каптарлари,
Каптарми ё тўзғиган шеър дафтарлари?
Шамол эмас ҳувлаган у, Моҳларойим,
Қўқонингиз ҳануз тортар оҳлар, ойим.
Шеърми айтдим, оё орнинг хуружлари?
Бўғзимдадай Насруллонинг қиличлари...
НОДИРА АФОҚОВА
@anordonalari_uz
