በአሏህ ስም በጣም ሩህሩህ እና አዛኝ በሆነው

بسم الله الرحمن الرحيم

በወሊዮች ና በሷሊሆች( ደጋጎች)የአሏህ ባሮች ተወሱል የማድረግ ፍርዱ

حكم التوسل بالأولياء والصالحين

ክፍል ሁለት

ባለፈው ትምህርታችን እንዳሳለፍነው የተወሱልን ምንነት፣በስንት እንደሚከፈል፣ከእርሱም ውስጥ የሚፈቀደውን የተወሱል ዐይነት ተምረን ነበር ከዛው ስንቀጥል

ሁለተኛው ከተወሱል ዐይነት በሸሪዐ ያልተፈቀደ፣ያልተደነገገ የሆነ ነው።

القسم الثاني: توسل غير مشروع

በመጀመሪያው ክፍል ከዘረዘርናቸው ውጭ ያሉት በአጠቃላይ ከሞተ ሰው ምልጃን ና ዱዐን መፈለግ፣በነቢዩ ክብር(جاه) መለመን፣ ሌሎችንም ጨምሮ ካልተፈቀደው እና ከሚከለከለው የተወሱል ዐይነት ስር የሚመደቡ ናቸው።

በዝርዝር ስንመለከታቸው

አንደኛው: ከሞተ ሰው ምልጃን ና ዱዐን መፈለግ አይቻልም።

الأول: طلب الدعاء والشفاعة من الأموات لا يجوز

ምክንያቱም የሞተ ሰው ከሶስት ስራዎች ውጭ ስራው በአጠቃላይ ተቋርጧል።በሂይወት እያለ ዱዐ ማድረግ እንደሚችለው ከሞተ ቡሀሏ ግን ማድረግ አይችልም እንደውም ዱዐ ሊያረግልን ቀርቶ እኛ ነን ለእርሱ ዱዐ የምናደርግለት ዱዐ አርጉልን ብለን ብንጠራቸው እንኳን ጥሪያችንን አይሰሙም ይሰማሉ ቢባል እንኳን መልስ አይሰጡንም።

{ ብትጠሯቸው ጥሪያችሁን አይሰሙም።ቢሰሙም ኖሮ ለእናንተ አይመልሱላችሁም።በትንሳኤ ቀን{እነርሱን በአሏህ ማጋራታችሁን} ይክዳሉ።እንደ ውስጥ አዋቂው ማንም አይነግርህም} አል ፋጢር 14

አዎ ወሏሂ ከውስጥ አዋቂው አሏህ ውጪ ማን ሊነግረን!!!

ሁለተኛው:በረሱል ክብር(جاه) ና በሌሎችም ክብር ይሁንብህ ብሎ ተወሱል ማድረግ አይቻልም።

الثاني: التوسل بجاه النبي أو بجاه غيره لا يجوز

በዚህ ነጥብ ዙሪያ ሰዎች ረሱል ሰለላሁ ዐለይሂ ወሰለም ብለዋል ብለው የሚጠቀሙት የተቀጠፈ ሀዲስ አለ።

እርሱም {አሏህን በጠየቃችሁ ጊዜ በኔ ክብር ጠይቁት፣የኔ ክብር አሏህ ዘንድ ትልቅ ደረጃ አለውና}

ይህ ሀዲስ የተዋሸ ና በነቢዩ ላይ የተቀጠፈ ሲሆን በየትኛውም ትክክለኛ በኾኑ የሙስሊሞች መዛግብት አልሰፈረም። ሀዲሱ ትክክል አለመሆኑ ከተረጋገጠ ደግሞ ለመረጃነት መጠቀም አይቻልም።

ሶስተኛው:በሰዎች በአካላቸው ይሁንብህ ብሎ ተወሱል ማድረግ አይቻልም።

الثالث: التوسل بذوات المخلوقين لا يجوز

በዚህ አባባል(بذوات) ውስጥ ያለችው (ب) ባ ፊደል ለመሐላ ከሆነች በአሏህ ላይ በፍጡሮች መማል ነው። ወይም ደግሞ መሐሏው በፍጡሮች ከሆነ ከአሏህ ውጭ በፍጡር መማል በሀዲስ እንደመጣው ትንሹ ሽርክ ነው። ከአሏህ ውጭ በፍጡሮች መማል ሽርክ ከሆነ በአሏህ ላይ በፍጡሮች መማል ምን ሊሆን ነው? ከባድ ነው።

ወይም ደግሞ በዚህ አባባል (بذوات) ውስጥ ያለችው (ب) ባ ፊደል ምክንያትነትን (ሰበቢያነትን) የምታመለክት ከሆነ አሏህ እርሱን ልንጠይቀውም ሆነ ልንለምነው በፍጡሮች ተወሱል ማድረግን ሰበብ አላደረገልንም።

አራተኛው፣ በፍጡሮች መብት (ሀቅ) በአሏህ ተወሱል ማድረግ ለሁለት ነገሮች ሲባል አይቻልም።

الرابع: التوسل بحق المخلوقين لا يجوز لأمرين

አንደኛ: አሏህ ለባሪያዎቹ ከትሩፋቱ ይለግሳቸው እንጂ አሏህ ላይ የማንም መብት (ሀቅ) የለበትም።

ሁለተኛው:ይህ አሏህ ለባሪያዎች ከትሩፋቱ የለገሳቸው መብት(ሀቅ) ለአሏህ ብቻ የተገባ ነው፣ሌሎች መብት የላቸውም። መብት በሌላቸውን ሰዎች ይሁንብህ ብሎ ተወሱል ማድረግ ምንም ጥቅም የሌለው ውሀ ወቀጣ ነው።

አሁንም በዚህ ነጥብ ዙሪያ ሰዎች ነቢዩ ብለዋል ብለው የሚጠቅሱት ቅጥፈት አለ።

ይሀውም { በጠያቂዎች ሀቅ (መብት) እጠይቅሀለሁ} የሚል ሲሆን ይህ ሀዲስ ውድቅ ነው፣ምክንያቱም ይህን ሀዲስ ከዘገቡት ሰዎች መሀከል ዐጢየቱል ዐውፊ የሚባል የሀዲስ ሊቃውንቶች ሀዲስን በማስተላለፍ ደካማ በመሆኑ የተስማሙበት ግለሰብ በውስጡ ስላለ ነው።

የሶስተኛ ና የአራተኛው ልዩነቱ ሶስተኛው በፍጡሮች በዛታቸው(አካላቸው) ተወሱል ማድረግ ሲሆን አራተኛው ደግሞ ለፍጡሮች ባላቸው መብት ይሁንብህ ማለት ሲሆን ሁለቱም የተከለከሉ ናቸው።

በዚህ ርዕስ ዙሪያ ባለችኝ ጥቂት እውቀት ላቀርብላችሁ የወደድኩት የእስካሁኑ ሲሆን ያልገባችሁ ነገር ፣ የተሳሳትኩት ነገር ካለ ብትጦቅሙኝ ደስ ይለኛል።


ወሏሁ አዕለም