## Oduu Ammee
Abukaatoon Andu’aalam “Qananiin yeroo hedduu of ajjeesuuf yaaluu ishee yaadannoo barreessite irraa hubadheera” jechuun falme Du’a jaalallee isaa shamarree Qananii Addunyaan shakkamee to’annoo seeraa jala kan jiru Artist Andu’aalam Gosaa har’a Ebla 07, 2025 yeroo sadaffaaf mana murtii dhiyaate.
Shakkamaan Andu’aalam Gosaa har’a ganama abukaatoo isaa waliin Mana Murtii Federaalaa Dhaddacha Ramaddii Araadaatti yeroo dhiyaatu poolisiin guyyaa qorannoo 12 dhaddacha kanaan dura kennameef keessatti ragaalee sassaabe mana murtiitti dhiyeesseera.
Artist Andu’aalam Gosaa du’a Qananii Addunyaan shakkamee erga to’atamee booda kanaan dura yeroo lama, Bitootessa 13 fi Bitootessa 26 bara 2025, mana murtii dhiyaachuu ni yaadatama.
Oolmaa dhaddacha har’a ooleen poolisiin guyyoota qorannoo dabalataa kennameef keessatti dhimma kanarratti ragaa namoota dabalataa 15, waliigalaan ragaa namoota 28 walitti qabuu beeksiseera.
Akkasumas mana jireenya Qananii Addunyaatti qorannoo jibbaa lafarra afamu irratti taasifame dabalatee saamuda adda addaa fudhachuun qorannoo foorensiikiitiif poolisii federaalaatti ergamuufi bu’aan qorannoo kanaa garuu hanga ammaatti akka hin qaqqabne ibseera.
Dabalataan bilbila harkaa miidhamtuu fi shakkamaa irratti qorannoon akka gaggeeffamu Waajjira Odeeffannoo fi Nageenyaa Biyyaalessaatti ergamee bu’aan qorannoo kanaa eegamaa akka jiru mana murtiitti ibseera.
Ragaaleen osoo hin sassaabamiin hafan kunneen, bu’aa qorannoo reeffa shamarree Qananii beellama kanaan dura ture irratti dhiyeesse waliin galtee dabalataa naaf ta’u kan jedhe poolisiin, ragaalee sassaabamuu qaban dabalataa argachuuf guyyaa qorannoo dabalataa gaafateera.
Qorannoo reeffa shamarree Qananii Addunyaa irratti taasifameenis miidhamtuun ol ka’insa irraa kuftee lubbuun darbuu akeekamuu poolisiin beellama darbe irratti eeree ture. Ta’uus bu’aa qorannoo reeffaa kanarratti ogeessota fayyaa irraa ibsa dabalataa gaafatee deebii eegaa akka jiruus ibsuu ni yaadatama.
Haata’u malee, poolisiin dhaddacha har’aa irratti ogeessota fayyaa ragaalee kanneen harkaa qaban muraasni biyya keessa akka hin jirreefi isaan qunnamuudhaaf toftaalee garagaraa fayyadamaa jiraachuu ibsuun, hanga isaan irraa galtee argatutti guyyaa qorannoo dabalataa 14 gaafateera.
Gama biraatiin abuukaatoon Andu’aalam Gosaa, poolisiin ammas sababoota wal fakkaataa dhiyeessuun guyyaa qorannoo dabalataa gaafacuun isaa fudhatama hin qabu, shakkamaan mirga wabii eegamuufi qaba jechuun falmeera.
Abukaatoon shakkamaa yaadannoo (diary) shamarree Qananii Addunyaa harkaa qabaachuu eeruun, achi irrattis [Qananiin] yeroo hedduu of ajjeesuuf qoricha humnaa ol fudhachaa akka turte hubachuu mana murtiitti ibseera. Kanaanis sababni du’a ishees kanumaan kan walqabatu akka ta’e falmeera.
Itti dabaluudhaanis, Andu’alam Gosaan du’a Qananii irratti harka qabaachuu isaa kan agarsiisu ragaaleen nama fi sanadoota ragaa qorannoo akka hin jirre eeruun, kunis “qulqullummaa isaa kan mirkaneessu waan ta’eef” shakkamaan mirgi wabii isaa eegameefi gadda jaalallee isaa mana isaatti galee akka baafatu gaafateera.
Kana malees miidiyaleen garagaraa, keessummaa miidiyaa yuutuubii irratti hundeeffate ‘Itiyoo Fooram’, dhaddacha darbe irratti akka waan shakkamaa Andu’aalam Gosaa ayyaana faasikaa dhufuuf koonsartii waan qabuuf mirga wabii gaafateetti godhanii gabaasa dhiyeessan “duula maq-baleessii maatii Qananii fi hawaasni isaa jaallatu garaa akka itti jabaatuuf yaadame” ta’uu eeruun, manni murtiin dhimma kana akka ilaaluuf dhiyeesseera.
Manni murtii gama isaatiin falmii gama lamaanii erga dhaggeeffateen booda bu’aa qorannoo poolisiin dhiyeesse fi gaaffilee gama lachuu dhiyaatan qoratee murtoo laachuuf boru Ebla 08, 2025 ganama sa’aatii 3:00’tti beellameera.
Share @BUBBEEMEDIA
Share @BUBBEEMEDIA
