***
Бу уйда юзлаб «мен» яшайди,
Бири қозон ковлар, бири кир чаяр.
Бири кўнглин олар эримнинг,
Бири менга қараб илжаяр.
Бири шарф тўқийди,
Бошқаси эртак,
бири шеър, бири ёлғон...
Бири даричадан боқар дунёга,
Бири сўқир.
Мен - қийқим-қийқим.
Бири ухлар, бири уйғонар,
Бири мижжа қоқмас - мени ўйлайди.
Бири шовқин солар,
Одам, ахир,
бири жим - ўзига банди.
Чархпалакни айлантирар бири саҳардан:
Битта мен кетади эрим ортидан,
Яна бири мактаб,
бири боғчага.
Битта мен ўзидан ортиб, аста чўкар кўзгу рўпарасида.
Сўнг
жамлайман барча менни ўзимда,
Шарти шу ҳаётнинг: гоҳ бутунман, гоҳ тўзғин.
Лаббўёққа қўл
чўзаман ҳафсала билан,
Мен йўқ (!)
фош қилиб қўяди
кўзгу

Башорат Отажонова

@zulxumor_orifjonova