Бу ёруғ оламдаги энг қадрли инсоним учун

СИНГЛИМ КАМОЛАГА
Икки шеър

Кўзларим симирар меҳринг майини,
Дудоқларимда бол, севингил кўнгил.
Меҳрим ортар сенга жоним кун сайин,
Бахтингдан баланд бўл, азизам синглим.
Қаро кўзларингнинг кўрмай ёшини,
Яшагин, сен билан яшарсин олам.
Тутқазмасман сенга ғамлар бошини,
Онам дуо қилар: “Кўп яша болам!”
Камолам, бахтингдан куйсин риёлар,
Бахтингни куйласин бу бахтиёрлар.
Бўламан кўзингдан сачраган учқун,
Бўламан, зўр опа бир кун сен учун!

СИНГЛИМГА
2
Шафақ алвонланар, рангланар юрак,
Соҳир туйғулар-ла безанар ҳислар.
Ўзинг керагимсан, сен ўзинг керак,
Ахир дилда туғён, бир сени излар.

Юрган йўлларимда рангланар дунё
Сезган ҳисларимда қолади рўё.
Дарахтлар шохига осилиб гўё,
Беланчак учяпти буғубор дунё.

Ана шу дунёда ўзинг керагим,
Мана шу дунёда сен суянганим.
Сени кипригимда келар асрагим –
Фариштадек синглим, жоним, жигарим.