zouᴉɹɥǝW

San’atkor – tuyg’ular degustatori.

Haddan tashqari ko’p va xilma-xil tuyg’uning ta’mini his qilganing sari, har olgan nafasing san’atga aylanib boraveradi.

@mehrnoz_abbos

Sizlarga bir yangiligim bor.

Anchadan beri niyat qilardim, paytini poylardim. Katta odam bo’lsam, boy bo’b ketsam….. derdim. Ammo, ko’ngilga tushgan ezgu tilakni imkon qadar vaqtida qilish kerak ekan, bu ham bir ne’mat ekan.

Orangizda she’r yoki hikoya yozadigan talaba qizlar bormi? “Kontrakt”da o’qiydiganlar, ayniqsa?

Kommentda + qo’yinglar-chi?

Kemtik she’r

Salom, birinchi dunyo,
birlashgan qirollik.
Sirtdan ko’rinsam-da baxtli xonimdek
Ichimda bo’zlaydi birlashmagan el.
Mayin tabassumla kutib olding lek,
Donishmand qushlaring sezdi ko’zimdan,
Mo’ysafid daraxtlaring his qildi zimdan
uchinchi dunyodan kelganligimni…

Aldab nima qildim sizni, dunyodosh,
Qora yolg’onlarni ko’chirmam oqqa.
Umrimiz yonmoqda*, tugamoqdamiz.
O’tni o’chirmadi ko’z yoshlarimiz.
Biz ham haqli edik baxtli bo’lmoqqa.
Biz ham haqli edik har narsaning eng oliysiga,
oliy navli orzuga, oliy navli hisga,
oliy navli lazzatga, oliy navli og’riqqa.

Men ham ishonardim, qo’ygandim ixlos
Jannat deb atalmish illuziyaga.
Jek London shivirlar quloqlarimga:
“Dunyoga kuchlilar chiqadi ega”
Egam, kuchsizlarni yaratding nega?
Sira g’azabingni keltirmaydimi
benihoya qashshoq mamlakatlarning
pulni xudo qilgan amaldorlari?
Senga ham ayyorlik qilurlarmi, yo
yodingdan chiqqanmi uchinchi dunyo?

Zarra to’g’ri so’zga yo’qdir toblari,
Ko’rdim, ko’zlaridan firib quyilar.
Quruq va’dalari,
bejalgan so’zlari,
arzon niqoblari,
Mudom o’z fojelarini yashirmoqqa urinishlari
televizorga chiqishimni ta’qiqlashganidek
kulgili va mantiqsiz tuyilar.

Har ne bo’lganda ham vatan begunoh,
shundoq ham imkonsiz sevmaslik uni.
men shoir sho’rlikni kechirgil illo,
Erkni istamagan badbaxt tutqunim.

Qafasga qaytaman shodmonu hurram,
Qo’l silkir birinchi dunyo vakili:
“Faqat va’da bergil qaytib kelmoqqa”
O’ksinar, xo’rsinar qaroqlari nam:
“Biz ham haqli edik baxtsiz bo’lmoqqa…”

✍️MehrNoz

@mehrnoz_abbos

A. S. Pushkinning “Bog‘chasaroy fontani” dostonini o‘qib...

Saroy bu – qafasning yaltiroq nomi,
Podshoh kim–hashamdor to‘n kiygan mahbus.
Haram qizi – cho‘qqa tushgani oni
qaytadan tirila olmagan qaqnus.

Qalʼani cho‘ktirgan sukut dengizi,
Shoh Garoy qalbiga solar dolg‘alar.
Vazirlar ko‘zida xiyonat izi,
Eshikdan ham hissiz eshikog‘alar.

Arslonni ohuga evirar hadik,
Sultonga qulligin anglatar qo‘rquv.
Insonning eng yaqin do‘sti yolg‘izlik,
Aslo yengib bo’lmas dushmani ham – u.

Xilvatda ibodat qiladir besas,
Garoyxon – ho‘l bo‘lgan soqoli o‘siq.
Kim u yig‘layotgan favvora emas,
Go‘zal Mariyaning qayg‘urang ko‘zi.

Birdan Bog‘chasaroy do‘nar bo‘shliqqa,
Isrofil surini chalar favvora.
Ko‘k to‘lar Zarema aytgan qo‘shiqqa,
Qo‘shiqlar qushlarga aylandi, qara:

“Balki laʼnatlaydi, qarg‘aydi balki,
Kecha duo qilgan maloikalar.
Jamiyki hujayram topgandir tarkib
Qaynoq gunohingdan – bo‘yi muattar.

Farishta qalbini zabt etgan iblis,
Qanday do‘zaxsanki – jannatdan muhim.
Juftiga talpingan oqqushdek ilkis,
Hijobini otdi muslima ruhim.

Ammo isyonlarim lahzalik xolos,
Chorasiz taqdirdan kutmadim shafqat.
Dunyo yugurardi ortimdan xallos,
Ko‘zingga qochardim, ko‘zingga faqat.

Tushda hamma bolam sening pushtingdan,
Tashda sarob – qizim, iztirob – o‘g‘lim.
Ruhingni o‘ragan yo‘rgak ham kafan –
Mening yosin ko‘nglim, taborak ko‘nglim”

Har tomonda ruhlar kezar sarosar,
Yolg‘izlikni yolg‘iz qoldirmas yohu.
Garoyning yuragin ezadi battar,
Qo‘shig‘in tugatmas Zaremabonu.

Mana, unutildi har kim va har ne,
Dunyosidan o‘tdi podsho Garoyda.
Lek, hanuz eslatib qora kunlarni,
Oppoq gunoh o‘ynar Bog‘chasaroyda.

✍MehrNoz

@mehrnoz_abbos