اشلون بيه لو شفت زفة شباب
وانه بغيابه اكل روحي العذاب

بيش اصبر دمعتي
هو روحي ومنيتي

********

شلون لو عريس شفته او يمه ملتمين ربعه
شلون لو زفوه اكبالي وشاهدت حلقه بصبعه
شلون لو كاللهم امي خل تجيي تحنيني اسمعه

شلون ما اهل الدمع
ولا ونيني الينسمع
يمه اذوب وي الشمع
وانته مصدرهه ضحكتي

لو ذكرته كوه انه اشتمه هواي
توشل عيوني وتظل ابلايه ماي

هناك تظلم دنيتي
هو روحي ومنيتي
_________________________

علم اعله النوح روحي الحيل جانت يمه ترفه
وانه احسب كمره كمره يمته يكبر حتى ازفه
الفاركت مثلك يجاسم عدهه شم الانفاس كلفه

راح البعمر الورد
وخله دمعاتي تهد
وانه ذابحني البعد
وسفه رايح ضنوتي

تيهت دربي وصبح كل عمري ليل
للدمع ياناس ماظل بيه حيل

ماكو حل لحيرتي
هو روحي ومنيتي
_________________________

والله من راح من اديه ما ردت من بعده عمري
شلون اكابر وانه اول ليله بعده وخلص صبري
ردته كون بموتي يحضر يهل اتراب اعله كبري

ليله ووليدي الكمر
فكده علمني السهر
ماردت بعده العمر
كلي تطول سفرتي

من مرار اجفاه صار ابعيني شيب
ظلمت من شمسي راحت للمغيب

الجان سلوة لوحشتي
هو روحي ومنيتي
______________________

الحلوة جانت كل صفاته من رحل شلي بحياتي
لوحدي كل ليلة من احنله ابجي واتنطر مماتي
الجنت مثل العيد يمه اوهسه ذبلت كل حلاتي

ليه بس ذكره صفه
المثله بيش انوصفه
غاب وبلحده غفه
وماتت وياه بسمتي

اغيابه جاسم علماني اشلون انوح
من اذكره اتأذن ابروحي الجروح

يصبح الون غايتي
هو روحي ومنيتي

_________________حسين المحامي