“Qahramonlar” haqida (1/2)

Bu suratni o’tgan yilning o’rtasida o’qishimga yaqin joyda o’zim olgan edim. Bu o’sha mashhur Xristofor Kolumb nomiga qo’yilgan haykal. Haykallarni aslida yoqtirmayman. Meni bu haykalning 2020-yildagi namoyishlardan keyingi shu achinarli holati yaxshi ma’noda hayratga soldi. U o’z paytida Amerikaning mahalliy aholisiga ancha uzoq davom etgan zulmni boshlab berganligini bilardim. Lekin menga Kolumb AQShdagi ko’plab amerikaliklar orasida “yangi dunyo”ni ochib bergan zabardast ekspeditsiyachi va ko’chib kelgan amerikaliklarning qahramoni sifatida xotirlanishi hamda uning nomiga AQShda federal bayram — “Columbus Day” borligi ham ma’lum edi. Mana bu so’rovnomaga qarab aytish mumkinki AQSh aholisining ko’proq qismi (ayniqsa so'lchilar) Kolumbni jinoyatchi deb biladi. Amerikaning mahalliy aholisi Kolumbni qilgan ko’plab zulmlari uchun oldindan jinoyatchi deb bilgan, ammo keyin ko’chib kelgan aholining avlodlari ham u haqida ko’proq xolis ma’lumotlarni o’rganib, uning jinoyatchiligini tan olishi ajoyib.