{ تعالى يا قدوتي شوف شن صاير في بطلك }

في يوم من ايام طفولتي المخدوشة ، خشيت لداري وطلعت ورقة وقلم وكتبت فيها كم حاجة وهكي ، مسحت دموعي زيين وطلعت لجدي وقلتله ارفعني عند قبر باتي ، رفعني لان هدي عادتي السنوية وطلبت منه يمشي ويخليني ، قعمزت وانا مبتسم : بابا بنحكيلك شن صار مع الوحش نِضال ، فتحت الورقة وبديت نقرا من اول سطر :
بابا يابطل العالم ولدك كبر وبدي عُمره 13 اليوم يوم ميلادي وانا بنحمل مسؤوليتي بروحيعارفك بتعصب عليا لاكن من لما انت خليتني انا بروحي راهو مش زي ماانت تفكر كلهم جو يوم انت مشيت وبعدها معش شفت حد قعدت مع جدي وحناي لاكن مانبيش حد يقعد مشغول عليا وحامل همّي ، بنعدي لطرابلس ياباتي وبنقعد راجل بدون جميل حد عليا وبنعتمد ع روحي ، خنقتني العَبرة وكملت : تعرف رايفت ع هديتك ليا في هاليوم هذا لاكن يلا عادي اصلا كبرت ومانبيش هدايا ، ومش كان مشيت معناها بننساك ماتزعلش انا ديما بنجي نشكيلك راهو ومش حَـ ننساك ، وجيت قتلك لأنك تعرفني نحب نستشير صاحبي في كل شي ، نحبك واجد يابطلي نِضال الوحش حَـ يقعد وحش زي ماتعرفه نقولك حاجة ، انا مابكيتش قدام حد انا بطل زيك يابابا دير بالك ع روحك وديما ندعيلك وانت ماتخافش عليا ، تذكر ان حتى لو قعدت شيباني بنجي نشكيلك ونفضفضلك ياحبيبي ان شاء الله ماتصقعش واجد اليوم صقع , ,
مسحت دموعي وطبطبت ع التراب ، وقفت بنمشي لاكن رجعت حفرت حفرة صغيرة جنب حوشه وردمت فيها الورقة ، كل عام وانا ولدك اللي يشبهك وكل عام وانت باتي البطل ..