Sabina Sadinova |Uzdavkarantin matbuot kotibi

#помидор

Кузатувчилар сони кескин ошди. Қизиқарли мавзу топишим керак деб ўйлаб тургандим — мавзуни ўзи келиб қолди 😁

557 мингдан ортиқ обуначиси бор "Uzbekistanofficial" сайтининг Telegram ижтимоий тармоғидаги канали хабар беришича, Ўзбекистон помидорининг Россиядаги ишқибозлари Владимир Путин билан очиқ мулоқотда Ўзбекистон помидори нархини туширишни сўрашган.

Келинг, маҳсулотни нархи қандай шаклланиши ҳақида қисқача тушунтириб ўтаман.

1. Маҳсулотнинг тан нархи. Бунда маҳсулотни етиштириш, тайёрлаш учун кетадиган ҳаражатлар (уруғ, ўғит, зараркунандалардан ҳимоя воситалари, ишчиларнинг маоши, энергия-ёқилғи, транспорт ва логистика сарф-ҳаражатлари)

2. Етиштириш шароитлари:
- иқлим шароити (қурғоқчилик ёки ёғингарчилик помидорларнинг сифати ва ҳосилдорлигига таъсир кўрсатади)
- мавсумийлик (ёз мавсумида далада экилган помидор, қишда иссиқхонада етиштирилгандан кўра анча арзон)

3. Талаб ва таклиф масаласи.
Помидорга талаб мавсум, байрам ва бошқа шу каби омилларга қараб ўзгариши мумкин. Таклиф эса ҳосилга қараб бўлади.

4. Импорт ва экспорт.
Импорт бўлган маҳсулот бозор қонуниятига кўра, бироз қиммат бўлади.

Ва энг асосийси - яхши нарса арзон бўлмайди 😁

Тан олиш керак Россия бозорида Ўзбекистонда етиштирилган мева-сабзавотлар бир мунча қиммат ростанам. "Ташкентские", "узбекские" дейилса — истеъмолчида маҳсулот мазали эканлигига ишонч бор. Ўзига ҳос сифат учун кафолатдек мазкур иборалар.

Аслида бозор мураккаб консистенция, арзон ёки қиммат бўлсин демайман. Лекин деҳқон-фермерларимизнинг пешона тери билан етиштираётган маҳсулотлар бозорда муносиб ўрин эгаллаши ва меҳнатга яраша тўлов олиниши тарафдориман.

P.S. 19 декабрь куни йил якунларига бағишланган очиқ мулоқотда Владимир Путин бу саволга нима деб жавоб бергани номаълум. Мулоқотнинг матн форматида бу ҳақда маълумот тополмадим.

#Sadinova_Karantinda

#карантин_назорат

Кўчада ҳаво ҳарорати бугун 0 даража. Тошкентда. Республикамизнинг шимолий ҳудудларида яна -5-8 даража паст.

Кинолог-инспекторларимиз чегара постларида хизматда. Катта жасорат эмас, тўғри. Лекин Ўзбекистоннинг хавфсизлиги, жумладан, фитосанитар хавфсизлиги учун шу тариқа ҳисса қўшиб келмоқдалар.

📱 Суратда Андижон вилоятининг Хўжаобод туманидаги “Дўстлик” ўсимликлар карантини чегара масканида хизмат фаолиятини юритиб келаётган кинолог-инспектор Абдуқодиров М. Элгиз лақабли хизмат ити билан.

#Sadinova_Karantinda

ОГОҲЛАНТИРИШ: ПОКИСТОНДАН ИМПОРТ ҚИЛИНГАН МАҲСУЛОТДА ХАВФЛИ ЗАРАРКУНАНДА АНИҚЛАНДИ

Ҳурматли тадбиркорлар,
Покистондан импорт қилинаётган мандарин маҳсулоти карантин назоратидан ўтказилганда маҳсулотларда “Қизил померанец қалқондори” аниқланди ва кўрилган фитосанитар чоралар натижасида мазкур зазаркунанданинг Ўзбекистонга кириб келиши олди олинди.
Мамлакатимизда мавжуд бўлмаган мазкур зараркунанда лимон, хурмо, олма ва узум каби экинларнинг зарарланиши хавфини туғдириб, келгусида экспортбоп маҳсулотларимизнинг ҳосилдорлигига жиддий салбий таъсир кўрсатади.

ҚАЛБАКИ СЕРТИФИКАТЛАР?
Ҳолат юзасидан, Покистон карантин хизмати билан олиб борилган тезкор музокаралар натижасида, 26 транспортдаги зарарланган маҳсулотларнинг фитосанитария сертификатлари қалбаки эканлиги тасдиқланди.
Келгусида шу каби ҳолатларнинг олдини олиш мақсадида икки давлат карантин хизматлари ўртасида электрон интеграция мавжудлигини инобатга олиб, Покистондан келтирилаётган ҳар бир маҳсулот учун берилган фитосанитар сертификатлар (QR-кодли) электрон тизим орқали текширилишига келишилди. Шунингдек, Покистон томони ишончли экспортёрлар рўйхатини Ўзбекистон карантин хизматига тақдим этади.

НИМА ҚИЛИШ КЕРАК?
1. Импорт карантин рухсатномасига (ИКР) ариза беришдан олдин https://karantin.uz веб-сайтидаги реестрдан покистонлик ҳамкорингиз мавжуд эканлигига ишонч ҳосил қилинг.
2. ИКР олганингиздан сўнг покистонлик ҳамкорингизга юборинг.
3. Маҳсулотлар учун Покистондан берилган фитосанитар сертификатлар QR-кодли бўлишига эътибор беринг.
4. Фитосанитар сертификатлар ҳаққонийлигини https://view.psw.gov.pk расмий сайтдан QR-код орқали текширинг.

ҚОНУН ТАЛАБЛАРИ!
Покистондан Ўзбекистонга олиб кириладиган ҳар қандай мева-сабзавот учун:
1. Импорт карантин рухсатномаси.
2. Покистон карантин хизмати томонидан берилган фитосанитар сертификат (QR-кодли) талаб этилади.

Тадбиркорларга ушбу хавфларни олдини олиш мақсадида ишончли ҳамкорлар билан ишлашни тавсия қиламиз.

Масъулликни ошириш ва ҳалоллик тамойилларига амал қилиш Ўзбекистон иқтисодиёти ва тадбиркорлик тараққиётининг кафолатидир!

#экспорт

Айни вақтда Буюк Британия бозорларига Ўзбекистон маҳсулотларини олиб чиқиш истагида бўлган тадбиркорлар учун ўқув семинари бўлиб ўтмоқда.

Семинарни Ўзбекистон-Британия жамияти вакили Ева Новикова олиб боряпти. Эътиборлиси, қироллик бозорига кириш учун мавжуд талабларни содда ва тушунарли тарзда етказиб бермоқда.

Онлайн-учрашув ёзиб олинмоқда. Қизиқиши юқори бўлган тадбиркорлар Карантин агентлигининг Марказий экспорт штабига мурожаат қилиб, ёзиб олинган семинарни олишлари мумкин.

P.S. Баъзи маълумотларга кўра, Ева Новикованинг эксперт сифатида консультацияси $500 атрофида. Ўзбекистонлик тадбиркорлар учун бундай имконият бепул тақдим этилмоқда.

Учрашув якунига етай деб қолган бўлсада ҳаволани улашаман: https://us06web.zoom.us/meeting/register/tZ0ocuGsqDkvGNyLPNiUnNra6gkiv2K8VBop

Сизда ўзингизни қизиқтирган йўналиш бўйича савол бериш имкони бор!

#Sadinova_Karantinda

Chat GPTга савол билан мурожаат қилганда шундай жавоб қайтарди 👇

«Сабина Садинова — Ўзбекистон Республикаси Қишлоқ хўжалиги вазирлиги ҳузуридаги Ўсимликлар карантини ва ҳимояси агентлигининг матбуот котиби. У агентликнинг ахборот сиёсатини юритиш ва оммавий ахборот воситалари билан алоқаларни таъминлаш учун масъулдир.

Сабина Садинова турли брифинглар ва матбуот анжуманларида иштирок этиб, агентлик фаолияти ва ўсимликлар карантини ҳамда ҳимояси соҳасидаги долзарб масалалар бўйича ахборот беради. Масалан, 2022 йил июль ойида у ғўза зараркунандаларига қарши »Долзарб 30 кунлик« тадбири эълон қилингани ҳақида маълумот берган.
YUZ

Шунингдек, 2021 йил ноябрь ойида Сабина Садинова Ўзбекистонга импорт қилинган картошка маҳсулотларида хавфли зараркунандалар аниқлангани сабабли 775 тонна картошка йўқ қилингани ҳақида хабар берган.
Daryo

Бундан ташқари, 2023 йил май ойида Россияда Ўзбекистондан экспорт қилинган гилосда шарқ мевахўри ҳашароти аниқлангани юзасидан ҳам у изоҳ берган.
Daryo

Сабина Садинова ўсимликлар карантини ва ҳимояси соҳасидаги муҳим янгиликлар ва тадбирлар ҳақида жамоатчиликни хабардор қилишда фаол иштирок этади.»

Демак, анчадан буён ўйлаб юрган ишимни қилиш вақти келди... яъни канални "реанимация" қилиш вақти келди

Янги йил — янги лойиҳалар билан!

Бугун "Ўзбекистон Республикаси фитосанитария хизмати салоҳиятини ривожлантириш – Ўсимликлар карантини чегара масканларини такомиллаштириш" лойиҳаси доирасида KOICA мутахассислари билан 2024 йилдаги илк учрашув бўлиб ўтди.

Истиқболли лойиҳа доирасида 4 та асосий йўналиш белгиланган бўлиб, мутахассислар 4 та вилоятдаги чегара масканларини модернизация қилиш масалаларини муҳокама этишди.

Лойиҳани амалга ошириш бўйича баённома 2023 йилнинг июнь ойида имзоланган. 2023-2027 йиллар давомида ҳаётга татбиқ этилади.

Эътиборлиси, икки томоннинг ҳам лойиҳа самарали бўлишидан умиди катта. Биз учун, яъни Ўзбекистон учун бу фитосанитария тизимини такомиллаштириш, жаҳон стандартларига яқинлаштириш имкони бўлса, ҳамкорларимиз учун импорт/экспорт жараёнларининг амалга оширилишида фитосанитар хавфсизликни таъминлаш нуқтаи назаридан қўллаб-қувватлаш.

Кенгқамровли лойиҳанинг босқчилари ҳақида батафсил маълумот бериб борилади.