Рада БНР: афіцыйны канал

РАДА БНР ЗАКЛІКАЕ ДА САНКЦЫЙ СУПРАЦЬ РЭЖЫМУ ЛУКАШЭНКІ І ДА ЦІСКУ НА РАСЕЮ

Рада Беларускай Народнай Рэспублікі заклікае міжнародную супольнасьць да неадкладнай рэакцыі на беспрэцэдэнтны палітычны тэрор, які супраць беларускага грамадзтва разгортвае аўтарытарны рэжым былога прэзыдэнта Аляксандра Лукашэнкі.

Падзеі 2020 года ў Беларусі – гэта найбольш маштабовае і брутальнае падаўленьне мірных дэмакратычных пратэстаў у эўрапейскай краіне за многія дзесяцігодзьдзі.

Саўдзельнікамі паліцэйскага тэрору ў Беларусі робяцца дзяржаўныя і прыватныя прадпрыемствы, якія аказваюць незаконны ціск на страйкуючых працаўнікоў, або банкі, якія незаконна канфіскуюць грошы, сабраныя дабрачынцамі на дапамогу ахвярам рэпрэсій. Саўдзельнікамі злачынстваў рэжыма Лукашэнкі робяцца і некаторыя замежныя кампаніі, такія, як мабільныя апэратары, якія па загаду аўтарытарнага рэжыму абмяжоўваюць сувязь падчас пратэстаў, каб перашкаджаць апэратыўную публікацыю інфармацыі пра падзеі.

Рада БНР заклікае да ўвядзеньня максымальна шырокіх і жорсткіх санкцый супраць рэжыма Лукашэнкі і ягоных саўдзельнікаў. Гэтыя санкцыі могуць уключаць эмбарга на імпарт нафтапрадуктаў, калійных угнаеньняў і іншай прадукцыі беларускіх дзяржаўных прадпрыемстваў, адключэньне беларускіх банкаў ад сыстэмы SWIFT, арышт замежных рахункаў дзяржаўных прадпрыемстваў і іншыя меры. Сілавыя структуры рэжыма Лукашэнкі, сыстэмна адказныя за гвалт і забойствы, павінны быць абвешчаныя злачыннымі арганізацыямі: у тым ліку АМАП, САХР (СОБР), КДБ і іншыя.

Рада БНР заклікае, разам з гэтым, аказаць увесь магчымы міжнародны ўплыў на ўлады Расейскае Фэдэрацыі, чыя палітычная, матар'яльная і прапагандысцкая падтрымка зьяўляецца ключавым фактарам захаваньня дыктатуры ў Беларусі.

Працягваючы аказваць падтрымку рэжымку Лукашэнкі, Расейская Фэдэрацыя падзяляе адказнасьць за палітычны тэрор у Беларусі, за катаваньні і забойствы мірных беларусаў.

У беларускім грамадзтве існуе кансэнсус адносна непрымальнасьці гвалту і неабходнасьці адкрытага й сумленнага агульнанацыянальнага палітычнага дыялёгу. Абсалютная большасьць беларусаў не прымае мэтады кіраваньня А. Лукашэнкі, разгоны мірных пратэстаў, катаваньні і забойствы палітычных апанэнтаў. Беларусь хоча быць свабоднай дэмакратычнай эўрапейскай краінай і мець сяброўскія стасункі з усімі сваімі суседзямі. Аляксандар Лукашэнка не зьяўляецца легітымным кіраўніком краіны і будзе прыцягнуты да адказнасьці будучымі законнымі ўладамі Рэспублікі Беларусь.

http://www.radabnr.org/belarus-sanctions-nov-2020/

РАДА БНР ЗАКЛІКАЕ ДАЛУЧАЦЦА ДА АГУЛЬНАНАЦЫЯНАЛЬНАГА СТРАЙКУ

Рада Беларускай Народнай Рэспублікі выказвае сваю падтрымку агульнанацыянальнаму страйку, да якога заклікала Сьвятлана Ціханоўская, прызнаны лідар беларускага пратэстнага руху і верагодная пераможца прэзыдэнцкіх выбараў у жніўні гэтага году.

Агульнанацыянальны страйк даказаў сваю эфэктыўнасьць як сродак негвалтоўнага супраціву ва ўмовах жорсткага аўтарытарнага рэжыму яшчэ ў часы польскай "Салідарнасьці", калі нашыя суседзі палякі чынілі супраціў таталітарнаму у камуністычнаму рэжыму.

Пратэстуючы негвалтоўнымі мэтадамі, беларускае грамадзтва дэманструе сваю цывілізаванасьць і мірнасьць, заваёўваючы падтрымку ўсяго сьвету.

Рэакцыя рэжыма дэманструе, што масавы негвалтоўны супраціў мае моцны эфэкт на маральны дух асабовага складу карніцкіх органаў і бюракратычнага апарату, які не заўсёды бачны на паверхні, але вядзе нас да непазьбежнай перамогі. Гэткі супраціў размывае і без таго абмежаваныя матар'яльныя рэсурсы адміністрацыі А. Лукашэнкі. Рэжым ня здолее пратрымацца доўга ў такіх умовах.

Рада БНР заклікае ўсіх супрацоўнікаў дзяржаўных і калядзяржаўных прадпрыемстваў і ўстановаў далучыцца да агульнанацыянальнага страйку з патрабаваньнем спыненьня гвалту і рэпрэсій, сыходу А. Лукашэнкі, правядзеньня новых сумленных выбараў ва ўсе органы ўлады.

Рада БНР заклікае прадстаўнікоў беларускае дыяспары ў сьвеце і прадстаўнікоў прыватнага бізнэсу, якія ня могуць далучыцца да страйку, ахвяраваць у профільныя фундацыі дзеля дапамогі страйкоўцам.

Рада БНР заклікае грамадзяніна А. Лукашэнку да складаньня сваёй фактычнай улады дзеля агульнанацыянальнай згоды і дзеля таго, каб Беларусь пачала рух да разьвіцьця ва ўмовах цяперашняга складанага часу.

ЛЁС БЕЛАРУСІ ПАВІННЫ ВЫРАШАЦЬ БЕЛАРУСЫ, А НЕ ЎЛАДЗІМІР ПУЦІН - ЗАЯВА РАДЫ БНР

Рада Беларускай Народнай Рэспублікі выказвае сваю занепакоенасьць умяшальніцтвам расейскага аўтарытарнага рэжыма Ўладзіміра Пуціна ўва ўнутраныя справы Беларусі ў сувязі з падзеямі пасьля прэзыдэнцкіх выбараў, што адбыліся ў жніўні гэтага году.

У апошні час адбываецца інтэнсіфікацыя кантактаў паміж рэжымам Лукашэнкі і Крамлём. Прэзідэнт Расеі Ў. Пуцін заявіў пра наяўнасьць збройнага рэзэрва, які можа быць прадстаўлены рэжыму Лукашэнкі для падаўленьня пратэстаў. У Беларусь былі накіраваныя расейскія дзяржаўныя прапагандысты для працы ў беларускіх дзяржаўных СМІ замест беларускіх супрацоўнікаў, што звольніліся альбо абвесьцілі страйк. Расейская дзяржаўная прапаганда аказвае інфармацыйную падтрымку А. Лукашэнку.

На панядзелак, 14 верасьня, заплянаваная асабітая сустрэча А. Лукашэнкі і Ў. Пуціна, рэальны парадак дня якой хаваецца ад публікі.

Ёсьць рэальная рызыка таго, што ва ўмовах поўнай страты падтрымкі беларускага грамадзтва і набліжаючагася эканамічнага крызісу А. Лукашэнка пойдзе на саступкі нацыяналістычнаму рэжыму ў Расеі і пагадзіцца на істотнае павелічэньне залежнасьці Беларусі ад Крамля ўзамен на эканамічную і, магчыма, вайскова-паліцэйскую падтрымку.

На працягу даўгіх гадоў рэжым Аляксандра Лукашэнкі здолеў выжываць, нягледзячы на міжнародныя санкцыі і на закансэрваваную неэфэктыўную эканоміку савецкага тыпу, выключна за кошт падтрымкі Расейскае Фэдэрацыі. Крэмль аказвае рэжыму Лукашэнкі фінансавую, палітычную і прапагандысцкую дапамогу ўзамен на няўдзел Беларусі ў працэсах эўрапейскай інтэграцыі і на працяг савецкай каляніяльнай палітыкі культурніцкай русіфікацыі з доўгатэрміновай мэтай далучэньня Беларусі да Расеі ў той ці іншай форме.

Рада БНР заклікае беларускае грамадзтва і міжнародную супольнасьць не дапусьціць усталяваньня крамлёўскага кантролю над Беларусьсю. Анэксія Беларусі або ператварэньне яе ў дзяржаву-сатэліт аўтарытарнай нацыяналістычнай Расеі істотна павялічыць рызыкі для міжнароднай бясьпекі ў нашым рэгіёне. Пазыцыя некаторых маргінальных заходніх палітыкаў, якія імкнуцца запісаць Беларусь у нібыта сфэру інтарэсаў і адказнасьці Масквы, зьяўляецца здрадай ідэалаў свабоды і дэмакратыі, здрадай фундамэнтальных каштоўнасьцяў, якія дапамаглі перамагчы нацызм і камунізм у Эўропе.

Дзяржаўная незалежнасьць зьяўляецца гістарычным дасягненьнем і найважнейшай каштоўнасьцю беларускага народу, якая ня можа ставіцца пад сумнеў. Падзеі жніўня і верасьня 2020 году яскрава прадэманстравалі, што беларусы зьяўляюцца годным сучасным народам, які дастойны жыць у свабодзе і дэмакратыі, як і ўсе ягоныя эўрапейскія суседзі.

У выпадку, калі пацьвердзіцца інфармацыя пра ўдзел расейскіх сілавых структураў у падаўленьні пратэстаў у Беларусі або іншая адказнасьць расейскага кіраўніцтва за тэрор, які рэжым Лукашэнкі чыніць супраць беларускага грамадзтва, Рада БНР заклікае ўжыць мэханізм міжнародных санкцый супраць Расеі нароўне з санкцыямі супраць рэжыму Лукашэнкі. Падпісаўшы ў 1994 г. “Будапэшцкі мэмарандум аб гарантыях бясьпекі” і добраахвотна адмовіўшыся ад атамнай зброі, Беларусь у праве разьлічваць на дапамогу Злучаных Штатаў, Вялікай Брытаніі і Францыі у выпадку зьяўленьня пагрозы незалежнасьці.

РАСЕЙСКІЯ СІЛАВІКІ НЯ ЗМОГУЦЬ ПАВЯЛІЧЫЦЬ ПАПУЛЯРНАСЬЦЬ А. ЛУКАШЭНКІ СЯРОД БЕЛАРУСАЎ – ЗАЯВА РАДЫ БНР

Рада Беларускай Народнай Рэспублікі расцэньвае фармаваньне Расеяй рэзэрва сілавікоў для падаўленьня беларускіх пратэстаў, аб чым 27 жніўня заявіў Уладзімір Пуцін, як пагрозу вайсковага ўмяшальніцтва з боку Расеі.

Сама па сабе заява Ўладзіміра Пуціна аб гэтым ужо можа быць расцэненая як умяшальніцтва ва ўнутраныя справы Беларусі.

Пратэсты ў Беларусі носяць выключна мірны характар. Іхныя патрабаваньні палягаюць у выкананьні законаў і павазе да грамадзянскіх правоў жыхароў Беларусі.

Масавасць пратэстаў сьведчыць пра тое, што Аляксандар Лукашэнка і ягоны недэмакратычны рэжым пазбаўленыя падтрымкі беларускага грамадзтва і павінны ў адпаведнасьці з законам і з агульнапрынятымі дэмакратычнымі нормамі саступіць месца новай уладзе, сфармаванай на свабодных і дэмакратычных выбарах.

Рада БНР заяўляе, што імавернае вайсковае ўмяшальніцтва і падаўленьэне пратэстаў расейскімі войскамі паставіць крыж на добрасуседзкіх адносінах паміж Беларусьсю і Расеяй.

Ніякая замежная сілавая дапамога ня зможа павялічыць падтрымку рэжыма Лукашэнкі ў беларускім грамадзтве.

Толькі дэмакратычныя рэформы і новыя свабодныя і сумленныя выбары могуць стаць выхадам зь цяперашняга палітычнага крызісу ў Беларусі.

Рада БНР заклікае міжнародную супольнасьць да салідарнасьці зь Беларусьсю і да абароны сувэрэнітэту Беларусі ў цяперашняй сытуацыі.

Будучыню Беларусі павінен вызначаць сам беларускі народ, а не замежныя войскі.

БУДУЧЫНЯ Ў РУКАХ КОЖНАГА І КОЖНАЙ З НАС. ЗВАРОТ СТАРШЫНІ РАДЫ БНР ІВОНКІ СУРВІЛЛЫ

Дарагія суродзічы-беларусы,

Ад імя Рады Беларускай Народнай Рэспублікі віншую вас з 25 жніўня, днём адраджэньня незалежнасьці Беларусі.

Пачынаецца юбілейны, трыццаты год існаваньня адроджанай Беларусі як сувэрэннай паўнавартаснай дзяржавы. Адраджэньне Беларусі было вынікам дзесяцігодзьдзяў упартай барацьбы, тысячы людзей ахвяравалі жыцьцём і свабодай дзеля гэтага.

Нашае змаганьне за свабоду і дэмакратыю ня скончаная і дагэтуль. Сотні тысячаў беларусаў у апошнія тыдні пераадолелі свой страх і, нягледзячы на пагрозы дыктатара і ягоных памагатых, выйшлі на вуліцы сваіх гарадоў, каб заявіць, што Беларусь павінна належаць усім яе жыхарам, а не аднаму чалавеку.

Перамога над тыраніяй ня будзе простай. Нашаму народу наканавана прайсьці праз больш жорсткія выпрабаваньні, чым іншым.

Я жадаю ўсім нам сілаў, трываласьці і веры ў лепшую будучыню. Гэтая будучыня ў руках кожнага беларуса, кожнага і кожнай з нас.

Будзьце сьмелыя, будзьце годныя, будзьце моцныя духам, каб дачакацца перамогі і наблізіць яе. Праўда на нашым баку, і перамога будзе нашай.

Івонка Сурвілла
Старшыня Рады БНР