قناة الشاعر الحسيني وسام الغراوي🇮🇶

قصيد لسيدتي المظلومة رقية عليها السلام

يالحنينه يارقيــــــــة .. يا أعز كل النــــــاس
غمضي عينچ مو هدية ..لاتشوفيــــــن الراس
~~~~~~~~~~~~~~~~~~~~~~~
انه ابوچ الشالچ بريته هـــــوه
ياعباره عن ضوه ..يا سمه وكلهه نجــــــــــوم
اني ادري تجرحج النسمه التمر
شلچ بطاري الهجر ..سالم گليبـــــــــــــچ دوم
عني گالولچ امسافر بس يـــرد
لايشغلچ اي بعد .. عوفي يبنيتي اللـــــــــــوم
لخاطري لاتهمل عيونچ دمـــــع
هرش گلبي ينشلع ..هذا بوية المقســـــــــوم

گولي هسه يعود الية ..وصدگي هذا الاحساس
اعليچ اخاف امن المنية.. لاتشوفين الــــــراس
~~~~~~~~~~~~~~~~~~
ياغصن گلبي الرويته بناضـــــري
يامهجتي وخاطـــري ـ خايف اعليج اهـــــــواي
وحرمة الشلعوهن امن اذنچ غصب
اطويل يبنيتي الدرب ـ وگلبچ ايريد المــــــــاي
العتب مرساله من عندچ وصــــل
اشلون اضل ابلا اهل ـ ياهو يعدل ممشــــــاي
الورد ماينسبي وهسه انسبـــــه
وذبحو احلام الصبـــه ـ شنهي يبنيتي الـــــراي

يازغيرونه شبديـــة ..ومني راح العبـــــــاس
بيه حلفتچ وبيـــــة ..لاتشوفين الـــــــراس
~~~~~~~~~~~~~~~~~~
عمتچ اتنشديهه عني بكل وكــــت
وتنجرح مثلچ شفت ـ والجواب الدمعـــــات
تگلچ اعرف مايعوف ابنيتـــــــــه
ومن تطول سفرته .. بعينچ طيوفه اتبـــــــات
عمه لتنشدين فززتي الجــــــــرح
چان وياي الصبـح ـ عمه ابشرچ مامــــــــات
هسه يم الزهره گاعد اني اضــــن
چان محتاج لحضن ـ يداوي بيه الطعنـــــــات

هسه شابگتة الزچيـــة.. شبگة النسمة ليــاس
ارتاحي عمة وهاي هية..لا تشوفين الـــــراس
~~~~~~~~~~~~~~~~~~
ادري من ادخلتي مجلسهم واحس
نزلت بصدرچ شمس ـ ومهجتچ ذابت نـــــوح
والدچ امرچ يهمه وينجــــــــــرح
بوية لاچن مايصـــح .. صعبة جيت المذبــــوح
دمعتج سهم المثلث منهه أحـــــن
يالصفيتي بلاوطــن ـ وأدري گلبچ مجــــروح
بذنچ تسمعين من شتمو هلــــچ
وعمتچ تعاين الــــچ ـ وانتي احس ابـــلا روح

كل رزية تجر رزية ..والحزن ماينقاس
واني اذكرچ يالبنية.. لاتشوفين الراس
~~~~~~~~~~~~~~~~~~
رادو تشوفين راسي بالطشـــــت
وحيل من نحري صحت .. زينب ارقية اشلــون
وفوگ ذبحت نحري مذبوح اصبحـت
مدري چم مره متـــت ـ ودمعتي تهز الكــون
حين نضرت راسي المخضب دمـــه
حضنته بصدر الضمــه ـ والملايك يبچــــــون
عاتبت نحري رقية وباستــــــــــه
اوهده ونهه وشبگتــه ..واختلف منهه اللـون

ماتت بنيتي الوفية.. بمجلس اهل الوسواس
وهسه بالجنه سوية ..لا تشوفين الـــــراس


لخادمكم الشاعر وسام الغراوي

قصيدة عن شرف الخدمة الحسينية

يكفيني حب حسين يكفيني
وخادم شسع نعله يخلينـي
هو اني شمحصل يهالوادم
لوبية خير اني انكتب خادم.. يكفيني

شنهو آني وشنو تحصيلي الولائــي
بخدمتك روضه وطموحي الابتدائــي
و زحمة اگولن لبو السجاد انتمائــي
امطفي خيمة حته اسولف عن عطائي
اني خادم للخدم اقصى رجائـــــــي
حاضــر بطف حتى تتشرف دمائـــي
لاعابس بشعري و مناجاتي
ولا روت العطشان دمعاتي
مثقال خنصر ماوصل ديني .يكفيني

مفتخر جيه كاتب اني اشچم قصيدة
وناسي تضحيت الذي حزو وريــده
چفي يكتب عود لطمية جديــــــدة
وينسه چفين الهون لجل العقيــده
المثلي كون النوح يتحول نشيـــده
للزم ضهره وكت طيحة عظيـــــده
لا راد ترچيتهــــــه واتباهــــه
ولا حافي وأمشي الدرب وياهه
ولا من صدگ صاب الرمد عيني .يكفيني

توني احبي بعالم الخدمة بعدنـي
لولا احضر مجلسك ياهو العرفني
لاوصل يم كاظم المنضور ونـــي
ولاني عبود ابن غفلة ودمعي فني
لوردت اتوفق ويحچون عنــــــي
كون عالورقة تطيح عيوني منــي
كون الحوافر تنبت بصـــدري
وآخر قصيدة اكتبهه من نحري
وخيمة احترگ محد يطفيني. . يكفيني

اني مشكلتي شأگول بشعري عنهــه
البعد اخيهه الشمر ضل يحدي بضعنهه
مرت اعليه وسمع كافلهـــه ونهــــه
لچن ماگالتلـــه عالصـــار بمتنهــــه
تخاف لاتجرح ابو الغيرة بحزنهــــــه
وتدري يزعل لوسمع سطرو وجنهــه
اكتب سبوهه بشعري بس خايف
يزعل گمرهـه .بعيني ماشايـف
تيهت ياجرح اليدليني ..يكفيني

مثل فطرس جنح گلبي يرده هــوه
العشره سحگن صدره وبدمه ايتلوه
لوسمعت اسمه الوجن من دمعي يروه
ولو عمن من البچي لعيونه فدوه
يلا يا چف دگ صدر عبد الله يسوه
وخل نون مثل امه مانحتاج فتوى
لو طفل يبچي لاتسكتونه
امن يلوع. عبد الله تذكرونه
نهرين دمعي فوگ خديني ..يكفيني

خادمكم الشاعر ..وسام الغراوي

بداية مجلس بحق سيدي الشهيد عبد الله الرضيع .ع

حرام حرام ..من يعطش يموت الورد
رضيع رضيع ..يشبگ سهم ما مستعد
~~~~~~~~~~~~~~~~~~
طير جنة و لاتنشدون شحلاته
گماطة ماخذ لون من گلبه وصفاته
تصور انت بگلب الحسين شغلاته
محضره باچر لو كبر يكفل خواته

يغير يغير ..مثل الگمر عمه ويهد
رضيع رضيع ..يشبگ سهم ما مستعد
~~~~~~~~~~~~~~~~~~
زهرة النرجس خجوله اگبال عطره
الفراشه تعشگه عدهه امن الله فطره
مو شهور و ينحسب..چم ورده عمره
بعمره هم سامع طفل قرٱن يقره

جميل جميل ..ومن الحمامه ينحسد
رضيع رضيع ..يشبگ سهم ما مستعد
~~~~~~~~~~~~~~~~~~
قحط شربة ماي سبع بحور يسوه
شكو ماي بهألارض لشفافه فدوه
ليش عبد الله بلا ماي ايتلوه
الماي ياخذ كون من حسين عطوه

عجيب عجيب ..هالموقف يطر الچبد
رضيع رضيع ..يشبگ سهم ما مستعد
~~~~~~~~~~~~~~~~~~
ابلايه احساس السهم قرٱن يذبح
كون لعابه بحضن عبد الله يصبح
لو فرح گلب الرباب هواي يفرح
تبچي ماي امن الفرح وبشفته ينضح

تشوف تشوف ..ينزل على گليبه البرد
رضيع رضيع ..يشبگ سهم ما مستعد
~~~~~~~~~~~~~~~~~~
ياحقوق انسان مذبوحه الطفوله
بيا شرع يادين هالموقف حصوله
سجلوا يمكم هالطفل سجل بطوله
وين موسوعة (غينيس) شنهو التگوله

يفيض يفيض ..من هالطفل نبع المجد
رضيع رضيع ..يشبگ سهم ما مستعد
~~~~~~~~~~~~~~~~~~
ان چان بالعالم احرار وعدهه رحمه
تعلن بحقه حداد وتكتب اسمه
طفل قدم من اجل الاصلاح دمه
هالطفل للعالم امن الباري نعمه

يصير يصير.. تمثال اله في كل بلد
رضيع رضيع ..يشبگ سهم ما مستعد
~~~~~~~~~~~~~~~~~~
خادمكم الشاعر وسام الغراوي

نزلة لطلب الحاجات من ابا الفضل العباس عليه السلام

عندي طلبه ازغيـــره وادري ماتصعب عليك
****************************
اسمك العباس وانه اسمي مجرد خادم
وعيب احجيهه طلبتي وأشتكي للوادم
راح اكل لزينب اختك وين غيرة هاشم
انه كاتبلك قصايد بالدمع موبالقلـــــــم
انه اعض ايدي اذا اذكر جربتك والعلم
راح اجيب اهمومي وأعتني لدارك وأجيك
********************************
تره موبس انه اريدك حاجتي تكضيهه
الناس هاي التلطم انته بسدك تخليهه
واسطه اللطمه بدمعنه لكبرك انوديهه
كلوبنه تجدي اعله بابك هايسبع الكنطره
وهذا فايل ضيم جبنه وبيه ادموع امصوره
بداعة اختك زينـــــــب وقع الفايل بديــــــــك
********************************
انته ابو الزينات كلهه يامدير الغيره
مايحير اللي يندبك واحنه طحنه بحيره
جفك المكطوع لوينطينه بس تأشيره
بالسجل اشرنه يمك مانسينه مصيبتك
وتدري ياعباس احنه بصاية الله وصايتك
نعرف احنه اطباعك ماتــــــرد اليعتنيك
********************************
اخرس وحجيته يمكن حلفك بالزهره
ورجعت مشلول يمشي بس وصل للحضره
وانه احلفك بالضلع وبزينبك والطبره
راح اجيك بدمعتي وأستحلفك بم البنين
راح من بابك وأصيحن عألرمح راس الحسين
واخذ انه امـــــرادي من تفور الغيره بيك
********************************
يابوفاضل جيه غيور الناس دكت بابك
الشيعي يتسودن عليك وغالي عنده ترابك
نحلفك بمحسن وامه نريد هسه اجوابك
امك الزهره تكلك مانسيت طفوفك
كاعده بطارف المجلس انحب اعله اجفوفك
لاترد احبابــــــــــي فرحه كلب الينتخيك
********************************
هسه عباس اشكلت تكضيهه الي لو لاله
اني ادري ماتقصر سهله هاي الحاله
الله رادك بالشدايد للمحب تبراله
كفو منك يابو فاضل ماترد مطلب الي
خاسر المايندب العباس ابن حيدر علي
فقره بس بأرواحنه يبو فاضل نشتريك
********************************
الشاعر وسام الغراوي

قصيدة ملح الطف بحق الامام العباس عليه السلام

يملح الطف تبختر ..يصگر الحر تخير
الصيد الك ..من يوصلك
غير انت عباس

غيم زعل وامطر بكيفك
يكشخ رگب هاليوم سيفك
وبمشتهاك الحگ حليفك
انت التهد لو يهد طيفك
بگصتك مطر بس حار صيفك
ملگاك چن گهوة مضيفك

ابو حگ وتدلل..على العايل تخيل
حي مرضعك..ربك معك
غير انت عباس

من غير نخوة تطگ يمنتك
اشلون من تحشمك اختك
چم ضهر يكسر چف يسرتك
چم نهر حطيته بجربتك
چم الف چتفته بخزرتك
چم خشم ساحگته مهرتك

وفي وتعرگ مراجل..غيور وماتجامل
احصد زلم..واثلم ثلم
غير انت عباس

شيصير ملچ الموت منك
انت علي لو علي چنك
حگها العواسل من تحضنك
عطرك يدليهه اعله غصنك
حالف بزودك انه اضنك
فوگ الجماجم يمر ضعنك

ترف بس بالطلابة..اسد والدنيا غابة
يبن المجد .. لاتنحسد
غير انت عباس

امعگل يوزع موت رمحک
والسفره صمصامك ودرعك
يطيحون ماواحد يطيحك
عن النهر وينه اليمنعك
ارواح تطلع ويه صبحك
سيفك تعب تطبر بصبعك

واذا سبعين الف هم..تحت نعلك تلفهم
انت القدر ..زودك بحر
غير انت عباس

ساعة لزم ضهره يندبك
مارف على المظلوم گلبك
ها ياعضيده وسيف ربك
دمعه على خدوده يكتبك
واختك المضلومه التحبك
كل ساع للحومة تطلبك

تگلك گوم اسنده ..اخوك حسين وحده
وحده صبح.. ضامي انذبح
غير انت عباس

زينب بدمعتها تحشمك
ياكافلي خليني يمك
ساعه تشمك من تكلمك
وساعه يبو فاضل تضمك
تگلك خلافك شاخ خصمك
كل ساعه وينه يصيح بسمك

تفارگني هضيمه ..انا اخلافك يتيمة
يالواعدت..ماگصرت
غير انت عباس

الشاعر وسام الغراوي ..اسألكم الدعاء

وفي خبر عبد الحميد الرّابشي عن أبي جعفر (ع) أنه قال في حديث :
(ليس من عبد يذكر عنده أهل البيت فيرق لذكرنا، الا مسحت الملائكة ظهره وغفر له ذنوبه كلّها، إلا أن يجيء بذنب يخرجه عن الإيمان)

📚الكافي ج ٨ باب٢٥ ص١٠١ ح٧٢

امرأة شاهدت بنتها في المنام وهي تعذب
عذاب شديد فأستيقظت من النوم باكية حزينة

وبعد يومين شاهدت تلك الأم بنتها
في المنام وهي مسرورة !!

تتنزه في رياض الجنة فقالت لها
يا ابنتي قبل يومين رأيتك معذبة ؟؟

فقالت البنت .. لقد كنت معذبة
بأشد العذاب ولكن في هذا اليوم

دخل رجل الى هذه المقبرة وقال
{ اللهم صل على محمد وال محمد }
واهدى ثوابها لنا فأنقلب عذابنا الى فرح وسرور

.
.

كتاب القطرة (ج١ ص١١٦)
دار السلام {ج٢ ص١٨٨}