Tajribalar daftari

Deyarli 4 yildan beri marketingdaman

Mashinam yo’q, uy ham olmadim hali.

1 oylik daromadim yomon emas, balki. Lekin, huddi qolganlar kabi amal taqal harajatlarimni qoplayapti. Qarz ham bo’laman orada.

Ha, marketingda katta pul aylantirayotganlar yo’q emas. Lekin, umumiydan 1% bo’lsa kerak.

Huddi, quruvchilar, mashina ustalari, o’qituvchilar kabi. Ularning ham orasida 1% i katta daromadlarga erishishgan. Qolgani esa yoki o’rtacha yoki shunchaki yomon.

Ijtimoiy tarmoqda 1% ni kuzatib, bugun ITishnik, ertaga marketolog, indinga Treyder bo’lishni orzu qilib qoladigan “men”ga achchiq haqiqat shuki,
baribir mehnat qilishim, ilm olishim yillar davomida qiyinchilik bilan tajriba orttirishim kerak.

Qaysi sohada bo’lishimdan qat’iy nazar, ilm va mehnatsiz hech narsaga shunchaki oson erisha olmas ekanman.

Ha, menda mashina va uy yo’qligi, men kamroq harakat qilayotganim va dangasaligim sababli bo’lishi mumkin.

Lekin, “orqamni ko’tarmay” pul topish haqida hayolimga keladigan fikrlar bekorligini tushundim.

Narigi 1%ga o’xshashni orzu qilib soha almashtiraverib yillarimni yo’qotayotganimni his qildim.

Uchrashuvga chiqdim

14.12.24

Uylanmoqchiman. Uchrashuvga chiqdim.

Eng yaxshi sotuv samimiylik.

Mahsulotimni yoki xizmatimni sotmoqchiman. Ishga kirmoqchiman. Jamoa boshqarmoqchiman.

Samimiy bo’lish kerak ekan. Berkitmaslik, yolg’on gapirmaslik kerak ekan. Ko’zlar aldamaydi. Hotirjam bo’ldim.

Oson sotdim. Oson boshqardim.

Afsuslanmadim. Ikkilanmadim. Havotir olmadim.

Ko’zlarim yondi. Menga ishonch bildirildi.

Xulosa: Shu kungacha yolg’on gapirish va yolg’on va’dalar meni sindirdi. Ishonchni sindirdi. Hozir vaziyatdan chiqdim, ertam havotirda o’tdi.

Zarar: $50

01.12.24

Kursimni onlayn sotishga harakat qilib ko'rdim. Ishondim. Agar to'g'ri yetkaza olsak juda ham manfaatli kurs bo'lar edi.

metricsagency.uz

Veb sahifa yasadik va avto-varonka qilib sotishga harakat qildik.

Ya'ni, odam ishtirokisiz, shunchaki veb sahifaga kartamizni joylab qo'ydik.

10+ tanishlarga reklama chiqardik. $50 ga target yoqdik.

1500+ odam veb sahifamizga kirib ko'rdi.

Sotuv +-20.

Konversiya juda ham past.

Endi esa 3 ta yo'limiz bor.

Shaxsiy brend, Vebinar, Call center orqali sotuv.

Call center orqali sotuvni tanladik. Natijalarni bo'lishaman))

Xato: Shaxsiy brend yoki sizga ishonadigan insonlar bo'lmay turib avto-varonka qilish umuman ish bermadi.

O'zimning kichik kursimni shu yerda ham sotib qo'yay)

Targeting sizga cheksiz mijoz olib kelishning eng oson yo'li. Har holda hozirgi kunda.

Qanday sohada bo'lishingizdan qat'iy nazar, targeting orqali bemalol cheksiz mijoz topa olasiz.

Bu degani yangi yil uchun eng kerakli texnik qobiliyatlardan biri bu targeting.

O'rganmoqchi bo'lsangiz yoki qiziqarli bo'lsa barcha ma'lumotlar shu yerda: metricsagency.uz

Ma'lumot olish bepul aytgancha : )

#8

Zarar (pul): $80
Zarar (vaqt): 4 soat

Foyda: Xulosa

11.24

Targeting (aslida Performance marketing bo'yicha, shunchaki men tanlagan auditoriya bunday nomli kursni tushunmagani uchun, targeting nomi tanlandi) bo'yicha mentorlik boshladim.

60 ta qiziqish bildirgan mijoz bilan gaplashdim.

$1000 narxga sota olmadim

$500 ga tushirdim sota olmadim

$300 ga tushirdim sota olmadim

Sotuv: 0

Ha, har xil faktorlar bor, masalan, mentorlikning tanlangan auditoriyasi, mentorlik nomi, taklif, men sota olmaganim va hkz. Gap unda emas. Sababi 60 ta odam bilan suhbatdan keyin minimum 1 ta bo'lsa ham sotuv bo'lishi kerak edi.

Kamida 5 ta odam aniq o'qiyman deb aytdi. Lekin, pul to'lamadi. Nima uchun?

Ishonmadi.

Men shunga urg'u bermoqchiman. Ishonch. Brend.

Buni qanday sezdim?

Men 60 ta qiziqish bildiruvchilarni targeting orqali yig'dim va meni tanimagan odamlarga bog'landim.

Shu reklamani ko'rib qolib meni taniganlardan 2-3 tasi: "Mentorligingiz juda arzon ekan. O'qiymiz, qayerga pul to'lash kerak?", - deyishdi.

Men faqat meni tanimaganlarga sota olmadim xolos. Agar meni tanishganida, yuqoridagi kabi qayerga pul to'lashni ko'rsatishim kifoya edi.

Xato:

1. Shaxsiy brendni shakillantirmadim. Har holda katta ko'lamdagi shaxsiy brend.

Xulosa:

1. Meni 10,000 ta auditoriyam bo'lsa Xudo izni bilan och qolmayman. Eng minimum bitta platformada shaxsiy brendni shakillantirish shart.

#7

Foyda: Hurmat

10.24

metrics nomidan turli loyihalar bilan ishlaymiz.

Doim bir loyiha boshlaganimizda, yangi jamoa, insonlar va muhit.

E'tibor bergan bo'lsangiz bilasiz, odatda har qanday loyihada ishlaydiganlarning juda katta qismi yangiliklarga yopiq insonlar bo'lishadi.

Masalan, biznes o'smayapti. Hattoki tizim umuman yo'q. Holbuki, uni kimdir o'zgartirish uchun intilsa darhol jamoa unga qarshi kurashishni boshlaydi. Ayniqsa, jamoa eskidan ishlab kelayotgan bo'lsa va siz yangi inson bo'lsangiz. Hamma sizni yomon ko'radi...

Biz doim shunday jamoalar bilan ishlashimizga to'g'ri keladi.

Oxirgi holatda bir o'quv markazga loyihani o'stirish uchun kirdik.

Jamoani yig'dim va samimiy: "Mendagi maqsad sizlar ko'proq pul topishingiz, siz ko'proq pul topsangiz, biznes va men ko'proq pul topaman", - dedim. Ularning hozirgi holatda ko'proq pul topa olmasliklarini va men qanday qilib ularga bunda yordam bermoqchiligimni tushuntirib berdim.

Hammaning oyligini KPI ga bog'lab, oyliklarini juda oz miqdorda oshirib berdim.

Kimda e'tiroz va taklif bo'lsa eshitishimni doim ular berayotgan taklif agar asosli bo'lsa va xodimlarga qulaylik bersa uni qabul qilishimizni aytdim. Sababi, ular qanchalik maza qilib ishlasa, biz shuncha ko'p pul topishimizni qayta qayta takrorladim.

Kim yangi qoidalarga amal qilmasa ishdan ketishini ham eslatdim. Shu jumladan men ham.

Qoidalar bilan tanishish uchun biron hafta vaqt berdim.

Keyin qayta ko'rishdik. Taklif, talablar, e'tirozlarni eshitdim va hammaga shu kundan qoidalar ishlashini va hamma unga amal qilishi shartligini eslatib, yuqoridagi gaplarni bir yo'la eslatib o'tdim.

Foyda:

1. Yuqoridagi sistema ishladi. Sababi, men ularga biznes egasi bilan aynan ular uchun kurashayotganimni ko'rsatdim. Oyliklarini oshirib berdim, sistemani maksimum ularga qulay ko'rinishga keltirdim va eng muhimi yolg'on gapirmadim. Samimiy bo'ldim.

2. Xodimlar meni hurmat qilishni va bir o'rinda hayiqishni boshlashdi. Endi ular bilan ishlash ancha oson bo'ladi. Sababi, ishdan bo'shatish vakolatim borligi lekin ular uchun kurashayotganimni bilishadi.

3. Yangi sistemani biznesga oson olib kirdik. Jamoa qarshi reaksiya bermadi. Hech kimni ishdan bo'shatishga to'g'ri kelmadi.

Xulosa:

1. Samimiy bo'lish juda muhim. Har qanday inson siz ikkiyuzlamachi ekaningizni bilib qolishi juda ham oson. Rostini aytishim kerak ekan. Doim yutaman.

2. Imkoniyat berganchalik, talab ham juda muhim. Ikkisini me'zonini qattiq ushlash zarur.

#6

Zarar: Shaxsiy brend
Zarar vaqt miqdori: 3 oy

03.24

Freelance'likning oxirgi bosqichlari edi.

O'sha vaqt 5 ta loyiha bilan ishlardim. Bir vaqtda yana 4 ta yangi loyihadan taklif tushdi.

Nima bo'lganini topish muammo emas.

Hammasini oldim.

Natija nima bo'lganini ham topa olasiz.

Oxir oqibat 3 ta loyiha bilan qoldim.

Xato:

1. Shunchaki, "5 barmoqni og'zingga solma" degan gap bor. Amal qilinsa kifoya edi.

Xulosa:

1. Ustozimiz Aziz aka Rahimov ajoyib maslahat bergan edilar: "Sen umring davomida bir marta keladi deb o'ylagan imkoniyat, har 2 oyda keladi". Hovliqma. Muhimi sifatni ushlab qolish. Pul keladi.

#5

Zarar pul miqdori: $50,000 +

Zarar vaqt miqdori: 6 oy

05.24

Jamoa. O'g'riqli mavzu.

Start-up loyiha - metrics uchun jamoa yig'ayotganda xato qildim.

Atrofimdagi jamoa a'zolarimning hammasida metrics asosiy loyiha emas edi.

Barcha a'zolar bu loyihaga B variant sifatida qarashdi.

Mening miyamdagi vision'ga ishonishsa ham risk, pul sababli asosiy loyihalaridan kechib bor fokusni metrics'ga qaratisha olmadi.

Aybdor faqat o'zim edim. Jamoani ayblay olmasdim. Sababi, ularda ma'suliyat bor va u metrics'dan ustun.

Xatolar:

1. Oila oldida ma'suliyati bor odamlar bilan start-up'ni 0 dan boshladim. 0 pul bilan.

2. Start-up'ga asosiy loyihasi sifatida qaray olmaydigan insonlar bilan loyihani boshladim.

Xulosalar:

1. Start-up loyihalarda jamoada shu loyiha uchun bor vaqti va quvvatini sarflay oladigan insonlar bo'lishi shart.

2. Jamoada yosh, oilasi undan hech narsa kutmayapgan, lekin nimanidir isbotlashga ich-ichidan intilayotgan insonlar yig'ilgani ko'proq foyda beradi.

3. Jamoa har biri loyihaga qayg'urishi va vision'ga ishonishi shart.

#4

Potensial zarar pul miqdori: $74,000 (Agar to'g'ri shartnoma qilinsa, ishlab topishimiz ehtimoli bor edi)

Real zarar pul miqdori: $30,000

Vaqt zarari: 5 oy

05.24

"metrics"ning ilk loyihalaridan yana biri xususiy maktab edi.

Tushunish uchun aytaman, yangi maktablar uchun Toshkentdagi xususiy maktab bozorida yashab qolish ehtimoli 2024-yilga kelib 2-3 barobarga kamaydi.

May oyida qilgan prognozimizda bu voqea bo'lishiga yana kamida 1 yil bor edi. Adashdik. Toshkentdagi xususiy maktab bozorida mijoz olib kelish narxlari 3x ko'tarilib ketdi.

Biznes hamkorlarimizga esa biz 2023 ga nisbatan 30%lik o'sishni hisoblab prognoz bergandik. Xato.

Hamkorlar mavsum oxirida bizdan prognoz bergan natijamizni so'rashdi. Bizda esa u yo'q edi.

Xatolar sabablari:

1. Shartnoma tuzayotganda natijaga va'da berdik. Natija bizga bog'liq emas edi. Biz sababiyatni imkon doirasida qilganimiz bilan natijani o'zgartira olmasdik. Xato.

2. Kelishuvda har xil holatlarni ko'rib chiqmaganmiz. O'xshamay qolsachi degan savol bermaganmiz. Xato.

3. Orada mijozlar bizga boshida tuzgan shartnomamizni yangilashni so'rashdi. O'zligining foydasiga. Biz rozi bo'ldik. Xato.

4. Yangi loyiha edi. Hali produkti test qilinmagan Start-up loyiha olmaslik kerak. Sotish ham qiyin bo'ladi, natija ham shubha ostida. Xato.

5. Bozorda bo'layotgan o'zgarishlarni to'g'ri baholamadik. Xato.

6. Mijozdan reklama byudjetini oldindan tayyorlab qo'yishini so'ramadik. Eng pul kerakli mavsum o'rtasida pul tugab qoldi. Xato.

7. Maktablar hali bitmagan edi. Mavsum tugashiga bir oy qolganda qisman bitirishdi. Vaqt yo'qotdik. Boshida va'da olishimiz kerak edi. Xato.

Xulosalar:

1. Natijaga va'da bermaymiz. Doim qiladigan sabablarni to'liq bajarishga va'da beramiz. Natija bo'lmasa nima qilamiz degan savollarni to'liq ko'rib chiqamiz.

2. Hali produkti test qilinmagan Start-up loyiha olmaslik kerakligini tushundik. Sotish ham qiyin bo'ladi, natija ham shubha ostida.

3. Prognoz - va'da emas. Biznes egasiga ham, o'zimiz uchun ham buni to'liq tushunib olish muhim.

4. Bozordagi katta o'zgarishlarga tayyor turish kerak. Katta o'zgarishlar yoki sindirib yuboradi, yoki uchirib yuboradi.

5. Har qanday shartnomada, boshida qilingan kelishuv eng muhimi. Shoshilmay, har tomonlama "agar bo'lmasachi?" degan savollar bilan shartnomani puxta qilish muhimligini tushundik.

#3

Zarar vaqt miqdori: 3 kun

09.24

Yangi loyiha bo'yicha bog'lanishdi.

Marketolog bilan uchrashuv belgiladik va ko'rishdik.

Mendan CJM va Konversiyalarni prognoz qilib berishni so'radi va 2 kun vaqt oldim.

Tayyorladim. 2 kundan so'ng olib bordim.

Boshqa narsa so'ragan ekan. Boshidan tayyorlashga kelishdik.

3 kun vaqt yo'qotdik. 2 tomon ham.

Sabab:

1. Mijoz nima xohlayotganini aniq detallarigacha so'rab olmadim. Aniq Texnik vazifa olishim kerak edi. Imkonim bor edi. Xato.

Xulosa:

1. Har qanday taqdimot qilganda, vazifa olganda uni kim uchun qilayotganimni aniq tasavvur qilib, unga nima kerakligini aniq so'rab olaman.

#2

Potensial zarar pul miqdori: $6000 (Agar to'g'ri shartnoma qilinsa ishlab topishimiz ehtimoli baland edi)

Real zarar pul miqdori: $1500

Vaqt zarari: 2 oy

05.24 "metrics"ning ilk loyihalaridan biri IT o'quv markazi edi.

Shartnoma tuzayotgan vaqtimiz yoshlik sababidan bo'lsa kerak, yangi loyiha olganimizga xursand bo'lib e'tiborsizlik qildik.

Odatda sotuvdan pul olamiz. Biznesga olib kelgan mijozimiz soniga qarab bizga foiz ajratiladi.

Shartnomada 45 kun ichida olib kelingan 30+ mijozga palon pul, 50+ mijozga palon pul... deb kelishuv qildik.

Bizga bog'liq bo'lmagan reklama uchun pul kechikishi, blogerning kechikishi, video montaj ustasining kechikishi sababidan boshlab olishga 30+ kun ketib qoldi.

Reklamalar boshlangandan so'ng odatda 10-14 kun ichida natijalar sezilishni boshlaydi. 45 kun o'tib ketdi qisqasi.

Biz hech qanday pulsiz qoldik. Biznes 30+ o'quvchiga ega bo'ldi. Faqat 45 kun ichida emas.

Ular juda rozi edi (kim rozi bo'lmaydi deysiz). Keyin boshidan shartnoma tuzib ishlashni taklif qilishdi. Biz xohlamadik. Vaqtimiz ham yo'q edi.

Sabablar:

1. Shartnomada 45 kun muhlat olganmiz va kechikish holatlarini inobatga olmay kelishuv qilganmiz. Xato.

2. 30 tadan kam mijoz uchun hech qanday pul miqdori belgilamaganmiz. Xato.

3. Kelishuvda har xil holatlarni ko'rib chiqmaganmiz. Xato.

Xulosalar:

1. Har qanday shartnomada, boshida qilingan kelishuv eng muhimi. Shoshilmay, har tomonlama "agar bo'lmasachi?" degan savollar bilan shartnomani puxta qilish muhimligini tushundik.

#1

Real zarar pul miqdori: $700

Vaqt zarari: 1,5 oy stress

05.24

"metrics"ni endi boshlagan vaqtimiz Qurilishga oid loyiha oldik.

Loyihada tahminan $1000 reklama byudjeti sarf qildik va sotuv bo'lgan bo'lsa ham kutilgan natijani qila olmadik.

Sabablar:

1. Loyihani umuman tushunmas edik. Mijozimiz kim, ularga qanday reklama qilamiz, nima sotyapmiz o'zi, bu mahsulotga ehtiyoj bormi? O'rganishga vaqtimiz yo'q edi. Xato.

2. Loyiha start-up edi va bozorda bu narsaga ehtiyoj bor yoki yo'qligini bilmay katta ma'suliyat oldik. Xato.

3. Boshidan aniq kelishib olmadik va test qilishga, xato qilib o'rganishga vaqt va mablag' so'ramadik. Xato.

4. Dunyoqarash, biznesni boshqarish usullari 180° farq qiladigan insonlar bilan ishladik. Xato.

Natijada oldindan olgan ish haqimiz va reklamaga xato sarflangan pulni qaytarib berdik. Zarar.

Xulosalar:

1. Tushunmagan sohamizda bizga xato qilishga imkon bermaydigan insonlar bilan ishlamaymiz yoki loyihalarni olmaymiz bundan keyin. Katta ma'suliyat ham.

2. O'rtada ish muomalasi bo'lmasa ham do'st bo'la olishga ko'zimiz yetmagan insonlar bilan hamkorlik qilmaymiz.

3. Hali sinalmagan start-up loyiha olmaymiz.

4. Boshida o'zimizning ma'suliyat va huquq chegaralarimizni aniq va tiniq kelishib olamiz.

Demak, bu blog biznesda, kasbda qilinayotgan tajribalar va ulardan olingan xulosalarni jamlab borish uchun shakillantirilyapti.

Sohamiz sotuv va marketing. Asosan shu sohaga oid tajribalar yoritiladi.