Myanmar Update News 🇲🇲

ပြီးခဲ့တဲ့ ဒီဇင်ဘာ ၂၄ ရက်နေ့အထိ ချင်းပြည်တောင်ပိုင်းက မြို့တွေဖြစ်တဲ့ ပလက်ဝ၊ မတူပီ၊ မင်းတပ်နဲ့ ကန်ပက်လက် မြို့ (၄)မြို့က ချင်းလက်နက်ကိုင်လက်ထဲ ရောက်သွား ခဲ့တာတွေ့ရတယ်။ ၂၀၂၃ ခုနှစ် နိုဝင်ဘာလလောက်မှ စဖြစ်ခဲ့တဲ့ ပလက်ဝမှာ မီးဝဗျူဟာလိုမျိုး သမိုင်းဝင် တိုက်ပွဲဖြစ်စဉ်တွေရှိခဲ့ပေမယ့် ခုတော့ အကုန်လက်လွှတ်ခဲ့ ရပြီလို့ ပြောရမယ်။ ကိုယ့်အတွက် သတိရရှိတဲ့ မြို့ကို ပြောပါလို့ဆိုရင် ၅၄ ရက်ကြာ ခံတိုက်ခဲ့ရတဲ့ ကျင်ဒွေးမြို့ကိုပဲ ပြေးသတိရမိတယ်။
----
လက်ရှိ ကချင်ပြည်နယ်မှာ ဗန်းမော်မြို့ကို ရဖို့ ပြင်းပြင်းထန်ထန်တိုက်နေတာ တွေ့ရ တယ်။ ဗန်းမော်ရဖို့အတွက်လည်း လက်ရှိ အမ်းကို တိုက်သွားသလို ဘေးပတ်ဝန်းကျင် မြို့တွေကို ဖြတ်လေးဖြတ် လုပ်သွားတာ တွေ့ရတယ်။ အရင်ကလည်း ရေးခဲ့ဖူးသလို ပင်လည်ဘူး၊ ကသာ၊ ကောလင်း၊ ထီးချိုင့်-ရွှေကူ၊ ဗန်းမော်-မံစီ၊ ပူတာအို- ဝိုင်းမော် အားလုံးကို ထိန်းချုပ်နိုင်အောင် ကြိုးစားနေတာတွေ့ရတယ်။
-----
ရခိုင်မှာတော့ လက်ရှိ ဂွမြို့ဟာ နောက်ဆုံးခံစစ်စည်းလို့ ဆိုရမယ်။ ဂွမြို့ကျခဲ့ရင် ဧရာဝတီ ဟာ စိတ်ပူစရာအခြေအနေရှိတယ်။ သေချာတာကတော့ မိုးမပြို၊ ပြိုခဲ့သည်ရှိသော်ပေါ့။ ပြီးခဲ့တဲ့ရက်ပိုင်းမှာ ဧရာဝတီက PDF ဖွဲ့တယ်ဆိုတာ အကြောင်းမဲ့မဟုတ်ဘူးဆိုတာ တာဝန်ရှိသူတွေ သိဖို့ ကောင်းတယ်။ လက်ရှိချင်းက ကန်ပက်လက်မြို့တွေ ချင်းလက်နက်ကိုင်တွေ ရတယ်ဆိုတာ ယောဒေသက လက်နက်ကိုင်တွေ ပါဝင်တယ်ဆိုတဲ့ အချက်ကို သတိပြုမိရင်…လက်ရှိ ရခိုင်ထဲက မြို့တွေ AA သိမ်းနိုင်ဖို့ ဧရာဝတီ PDF အင်အားစုတွေလည်း ပါဝင်တိုက်ခိုက်နေတယ်ဆိုတာ သတိပြုမိဖို့ လိုပါတယ်။ ဆိုလိုတာက…AA က ဧရာဝတီမဆင်းတောင် ဧရာဝတီကို ဒီတိုင်းလွှတ်မထားပါဘူး။ PDF အားကောင်းအောင် စစ်မီးမွှေးထားခဲ့မှာပါ။
------------
နိုင်ငံရေးကွဲလွဲမှုဟာ နိုင်ငံရေးစကားဝိုင်းမှာ ဆွေးနွေးတာကတော့ အကောင်းဆုံး အဖြေပါပဲ။ ဒီပုံစံတိုင်းဆက်သွားရင်တော့ ဘယ်ရွေးကောက်ပွဲနဲ့တက်လာတဲ့ အစိုးရ ဖြစ်ဖြစ် ပြည်မလောက်ကိုပဲ ထိန်းချုပ်ခွင့်ရမဲ့ အစိုးရပုံစံမျိုး ဖြစ်ဖို့ ရာခိုင်နှုန်းများ မယ် ထင်ပါတယ်။ ဘင်္ဂလားဒေရှ့်လိုနိုင်ငံမျိုးကတောင် AA နဲ့ အဆက်အဆံ မလုပ်ဘူးလို့ ငြင်းပေမယ့် KIA ကို မြေရှားကြောင့် ကုန်သွယ်ရေးဂိတ်တွေ ပြန်ဖွင့်ပေးတဲ့ တရုတ်ရဲ့ လုပ်ရပ်ဟာ ထင်သလောက် အားကိုးစရာလည်း မမြင်မိပါဘူး။
--------------
သေချာတာကတော့ တပ်မတော်က ဒီနယ်မြေတွေ ပြန်မရသရွေ့တော့ ပြည်ထောင်စုရဲ့ အချုပ်အခြာဟာ ပြည်မထဲပဲ သက်ရောက်နေသလိုမျိုး ဖြစ်နေတော့မှာပါ။ ဒါတောင် နွားထိုးကြီးလို အညာ PDF မျိုးက အမြန်လမ်းကို ရန်ရှာတာမျိုးကြုံရဦးမှာပါ။

(နရီမိုး)

စမ်းချောင်းမြို့နယ် ရပ်ကွက်အုပ်ချုပ်ရေးမှူး သေနတ်ဖြင့် ပစ်ခတ်ခံရ

ဒီဇင်ဘာ ၂၄

ရန်ကုန်တိုင်းဒေသကြီး၊ စမ်းချောင်းမြို့နယ်၊အမှတ်(၃၅)၊ ဟုမ်းလမ်းဘူတာရပ်ကွက်၊ ပန်းလှိုင်လမ်းရှိ ဟုမ်းလမ်းဘူတာရပ်ကွက် အုပ်ချုပ်ရေးမှူးရုံးတွင် ယနေ့နံနက် ၁၀ နာရီ ၂၀ မိနစ်အချိန်ခန့်က ရပ်ကွက်အုပ်ချုပ်ရေးမှူး သည် ရုံးလုပ်ငန်းများလုပ်ဆောင်​နေစဥ် သေနတ်ဖြင့် ပစ်ခတ်ခံရကြောင်း သိရပါတယ်။

အခင်းဖြစ်ပွားစဉ် ရပ်ကွက်အုပ်ချုပ်ရေးရုံးအတွင်း အုပ်ချုပ်ရေးမှူး ဦးစန်းငွေ တစ်ဦးတည်းသာရှိကြောင်း ဒဏ်ရာရရှိသူ ဦးစန်းငွေမှာ သေနတ်ဖြင့် ပစ်ခတ် ခံရမှုကြောင့် ဝဲဝမ်းဗိုက်ကျည်ဖောက်ထွက်ဒဏ်ရာ ၁ ချက်(မစိုးရိမ်ရ)ဒါဏ်ရာ ရရှိခဲ့ပြီးရန်ကုန်ဆေးရုံကြီး အရေးပေါ်လူနာဌာနသို့ပို့ဆောင်ထားကြောင်းသိရပါတယ်။

အဆိုပါဖြစ်စဥ်အားတာဝန်ရှိလုံခြုံရေးအဖွဲ့တို့က တရားခံရှာဖွေ ဖော်ထုတ်ဖမ်းဆီးရေးအသေးစိတ်ဆောင်ရွက်လျှက်ရှိပါတယ်။

ယနေ့ နံနက်အစောပိုင်း သရက်မြို့အနီး ၄ ဒဿမ ၄ အဆင့်ရှိ ငလျင်လှုပ်ခတ်


ယနေ့ ဒီဇင်ဘာ (၂၄)ရက် နံနက်အစောပိုင်း (၁၂)နာရီ (၂၇)အချိန်တွင် သရက်မြို့အနီး ၄ ဒဿမ ၄ အဆင့်ရှိ ငလျင် တစ်ခု လှုပ်ခတ်မှုဖြစ်ပွားခဲ့သည်ဟု မြန်မာနိုင်ငံ မြေငလျင်သတင်းများနှင့် သုတေသနပြုစင်တာထံက သိရသည်။

အသိပေးချက်တွင် မကွေးတိုင်းဒေသကြီး၊ သရက်မြို့အနောက်ဘက် မိုင်(၃၀) မိုင်ကျော်အကွာ၊ မင်းတုန်းအရှေ့တောင်ဘက် (၁၂)မိုင်ခန့်အကွာ မြေအောက်အနက် (၆) မိုင်ကျော်၌ မဂ္ဂနီကျု ၄ ဒဿ မ ၄ အဆင့် မြေငလျင်လှုပ်ရှားသွားခဲ့ကြောင်း ဆိုသည်။

ထို့အပြင် ပြီးခဲ့သည့် ၂၄ နာရီအတွင်း ရှမ်းပြည်နယ်အတွင်း (၈) ကြီမ်၊ မကွေး တိုင်းအတွင်း (၁)ကြိမ်၊ တနင်္သာရီ တိုင်းအတွင်း(၂) ကြိမ်၊ စုစုပေါင်း (၁၁) ကြိမ် လှုပ်ခတ်ခဲ့သည်ဟု အသိပေးထားသည်။

အလားတူ မိုးလေဝသနှင့်ဇလဗေဒညွှန်ကြားမှုဦးစီးဌာနကလည်း ယနေ့ ဒီဇင်ဘာ (၂၄)ရက် မြန်မာစံတော်ချိန် (၁၂)နာရီ၊ (၂၇)မိနစ်၊ (၂၅) စက္ကန့် အချိန်တွင် နေပြည်တော်မြေငလျင်စခန်းမှ အနောက်-အနောက်တောင်ဘက် မိုင် (၇၀)ခန့်ကွာဝေးသော (ဆင်ပေါင်ဝဲမြို့၏ အနောက်တောင်ဘက် (၁၂) မိုင်ခန့်အကွာ)၊ အနက်(၆၇) ကီလိုမီတာကို ဗဟိုပြု၍ အင်အားရစ်(ခ်)တာစကေး (၄ ဒဿမ ၃) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားကြောင်း အသိပေးထုန်ပြန်ထားသည်။

ယခု ဒီဇင်ဘာလအတွင်း မြန်မာနိုင်ငံ အတွင်း နေရာအချို့တွင် အင်အားအ သင့်အတင့်ရှိ ငလျင်ငယ်များ ဆက် တိုက်လှုပ်ရှားမှုများဖြစ်ပေါ်နေသည်ကို အသိပေးချက်များအရ တွေ့လာရသည်။

ညစ်ညမ်းစာများဖော်ပြပါရှိသည့် ထုတ်ဝေစာများအား အရေးယူဆောင်ရွက်မှု အသိပေးကြေညာခြင်း

၁။  ပြန်ကြားရေးဝန်ကြီးဌာနသည် ပုံနှိပ်ခြင်းနှင့်ထုတ်ဝေခြင်းလုပ်ငန်းဥပဒေ ပုဒ်မ ၈ ပါ စည်းကမ်းချက်တစ်ရပ်ရပ်နှင့် ငြိစွန်းသည်ဟု သံသယရှိသောထုတ်ဝေစာကို ပုံနှိပ်၊ ထုတ်ဝေခဲ့ကြောင်း ခိုင်လုံသောအထောက်အထားဖြင့် သတင်းပေးပို့ခြင်းကို လက်ခံရရှိ လျှင်သော်လည်းကောင်း၊ ကိုယ်တိုင်သိရှိ လျှင်သော်လည်းကောင်း သတ်မှတ်ချက်နှင့်အညီ စစ်ဆေးပြီး ငြိစွန်းကြောင်းတွေ့ရှိပါက လုပ်ငန်းအသိအမှတ်ပြုလက်မှတ်ကို ပြန်လည်ရုပ်သိမ်းခြင်း သို့မဟုတ် ကာလအကန့်အသတ်ဖြင့် ရပ်ဆိုင်းခြင်းပြုနိုင်ကြောင်း ပုံနှိပ်ခြင်းနှင့်ထုတ်ဝေခြင်း လုပ်ငန်းဥပဒေ ပုဒ်မ ၆ တွင် ပြဋ္ဌာန်းထားရှိပါသည်။

၂။  လုပ်ငန်းအသိအမှတ်ပြု လက်မှတ်မရှိဘဲ ပုံနှိပ်ဖော်ပြခဲ့သည့် ပုံနှိပ်သူဒေါ်အေးမြတ်မွန်၏ Yangon Printing Service နှင့် ထုတ်ဝေသူ ဒေါ်ချိုဇင်သဲ (Maple စာအုပ် တိုက်-၀၃၂၉၅) တို့မှ ပုံနှိပ်၊ ထုတ်ဝေသော မြမိုရ်ရေးသားသည့် “မေတ္တာနှောင်သီ ချစ်ကြိုးချည်” နှင့် စာရေးသူ DIDI ZAW ရေးသားသည့် “Match Made in Clouds” စာအုပ်များတွင် ပုံနှိပ်ခြင်းနှင့်ထုတ်ဝေခြင်းလုပ်ငန်း ဥပဒေပုဒ်မ ၈၊ ပုဒ်မခွဲ (ဂ) ပါ စည်းကမ်းချက်ကိုဖောက်ဖျက်၍ ဟီရိဩတ္တပ္ပ ကင်းသော၊ မြန်မာ့လူ့အဖွဲ့အစည်းက လက်မခံသော၊ လူငယ်များ၏တွေးခေါ် မြော်မြင်မှုနှင့် ခံစားနားလည်မှုကို လွဲမှားစေနိုင်သော ညစ်ညမ်းစာများ ဖော်ပြပါရှိကြောင်း တွေ့ရှိရပါသည်။

၃။  သို့ဖြစ်ပါ၍ ၂၀၁၄ ခုနှစ်၊ ပုံနှိပ်ခြင်းနှင့်ထုတ်ဝေခြင်းလုပ်ငန်းဥပဒေပုဒ်မ ၈၊ ပုဒ်မခွဲ (ဂ)ပါ စည်းကမ်းချက်ကိုဖောက်ဖျက်၍ ပုံနှိပ်၊ ထုတ်ဝေဖြန့်ချိခဲ့သည့်အတွက် ထုတ်ဝေသူ ဒေါ်ချိုဇင်သဲ (Maple စာအုပ်တိုက်-၀၃၂၉၅) ၏ ထုတ်ဝေခြင်းလုပ်ငန်းအသိအမှတ်ပြု လက်မှတ်ကို ၂၀၂၄ ခုနှစ်၊ ဒီဇင်ဘာလ ၁၉ ရက်နေ့တွင် ရုပ်သိမ်းခဲ့ပြီး ယင်းစာအုပ်များအား တရားမဝင် ထုတ်ဝေစာဖြစ်ကြောင်း ထုတ်ပြန်ကြေညာခဲ့ပြီး ဖြစ်ပါကြောင်းနှင့် ပုံနှိပ်သူနှင့်ထုတ်ဝေသူတို့အား ပုံနှိပ်ခြင်းနှင့် ထုတ်ဝေခြင်းလုပ်ငန်းဥပဒေနှင့်အညီ တရားစွဲဆို ဆောင်ရွက်သွားမည်ဖြစ်ကြောင်း အသိပေးကြေညာအပ်ပါသည်။

ပြန်ကြားရေးဝန်ကြီးဌာန

ရွှေကျင်မြို့နယ်၊ ဒိုးပင်ကျေးရွာအား KNU နှင့် PDF အကြမ်းဖက်သမားများပူးပေါင်းအဖွဲ့က ရှော့တိုက်ဒုံးများဖြင့် ပစ်ခတ်တိုက်ခိုက်ခဲ့သဖြင့် ပြည်သူနှစ်ဦးထိခိုက်ဒဏ်ရာရ=======

ဒီဇင်ဘာ ၂၄၊ ၂၀၂၄

ပဲခူးတိုင်းဒေသကြီး၊ ရွှေကျင်မြို့နယ်၊ ဒိုးပင်ကျေးရွာအား ဒီဇင်ဘာလ ၂၂ ရက်နေ့ ၌ KNU နှင့် PDF အကြမ်းဖက်သမားများပူးပေါင်းအဖွဲ့က အများပြည်သူထိခိုက်စေရန် ရည်ရွယ်၍ ရှော့တိုက်ဒုံးများဖြင့် ပစ်ခတ်တိုက်ခိုက်ခဲ့ရာ အဆိုပါကျေးရွာရှိ "သံသယမျက်ဝန်း" စားသောက်ဆိုင်အနီးသို့ ရှော့တိုက်ဒုံးသီးတစ်လုံးကျရောက်ပေါက်ကွဲခဲ့မှုကြောင့် ပေါက်ကွဲမှုဖြစ်ပွား သည့်နေရာအနီး ဖြတ်သန်းသွားနေသည့် ရွှေကျင်မြို့နယ်၊ တံခွန်တိုင်ကျေးရွာနေ ဦးငြိမ်းချမ်းအောင် (၄၄) နှစ်နှင့် ဝင်းခနိမ်ကျေးရွာနေ ဦးဇော်ဝင်း (၅၀) နှစ်တို့တွင် ရှော့တိုက်ဒုံးသီးပေါက်ကွဲစထိမှန် ဒဏ်ရာများရရှိခဲ့သဖြင့် ဆေးကုသနိုင်ရေး ဆေးရုံသို့ပို့ဆောင်ထားရှိကြောင်းသိရသည်။

ရန်ကုန်၊ ဒီဇင်ဘာ ၂၃

မြန်မာနိုင်ငံ တရုတ်ဘာသာစကားသင်ကြားရေး တွေ့ဆုံပွဲကို ရန်ကုန်မြို့၌ ဒီဇင်ဘာလ ၂၀ ရက်နေ့တွင်ကျင်းပခဲ့ပြီး  မြန်မာနိုင်ငံဆိုင်ရာ တရုတ်သံရုံးမှသံမှူး Mr. Li Qianguo၊ မြန်မာနိုင်ငံဆိုင်ရာ တရုတ်သံရုံး ကောင်စစ်ရေးရာဌာန ဌာနမှူး Mr. Liu Xin၊ ရန်ကုန်တရုတ်ယဉ်ကျေးမှုစင်တာဌာနမှူး Mr. Xiang Jianbo၊ မန္တလေးမြို့ဖူချင့်ကွန်ဖြူးရှပ်စာသင်ကျောင်းမှ ကျောင်းအုပ် Mr. Li Zu qing ၊ မန္တလေးအင်းဝကိုယ်ပိုင်အထက်တန်းကျောင်း မှ ကျောင်းအုပ် Mr. Yang Zhou ၊  ရန်ကုန်မြို့ရှိ တရုတ်စာသင်ကျောင်းများနှင့် နိုင်ငံတကာစာသင်ကျောင်းများမှ ကိုယ်စားလှယ် ၆၀ ခန့် တွေ့ဆုံပွဲသို့ တက်ရောက်ခဲ့သည်။ 

တွေ့ဆုံပွဲအား မြန်မာနိုင်ငံဆိုင်ရာ တရုတ်သံရုံးမှ ကြီးမှူး၍ ရန်ကုန်မြို့တရုတ်ယဉ်ကျေးမှုစင်တာမှ စီစဉ်ကျင်းပပြီး မြန်မာနိုင်ငံရှိ တရုတ်ဘာသာစကားသင်ကြားရေး၏ ပကတိအခြေအနေမှန်ကို အခြေခံကာ မြန်မာနိုင်ငံရှိ တရုတ်ဘာသာစကားသင်ကြားရေးနှင့် ယဉ်ကျေးမှုဆိုင်ရာ ကူးလူးဖလှယ်မှုများ၊ ဒေသခံ တရုတ်ဆရာ ဆရာမများ ပြုစုပျိုးထောင်ပေးခြင်းများ၊ တရုတ်ဘာသာကျွမ်းကျင်မှုစာမေးပွဲ (HSK)၊ နိုင်ငံတကာ တရုတ်ဘာသာစကားသင်ကြာရေးအသိမှတ်ပြု လက်မှတ်များ၊ တရုတ်နိုင်ငံသို့ပညာတော်သင်သွားခြင်းဆိုင်ရာလမ်းညွှန်များ၊ လေ့လာမှုခရီးစဉ်များ၊ အမှတ်တံဆိပ်လှုပ်ရှားမှုအစီအစဉ် စသည့်အကြောင်းအရာများကိုဆွေးနွေးခဲ့ကြသည်။ 

အဆိုပါတွေ့ဆုံပွဲသို့ တက်ရောက်လာသူများသည် သက်ဆိုင်ရာ သင်ကြားရေးနှင့် ပညာရေးဆိုင်ရာ အတွေ့အကြုံများကို အခြေခံ၍ မြန်မာနိုင်ငံရှိ တရုတ်ဘာသာစကားသင်ကြားရေး ရေရှည်ဖွံ့ဖြိုးတိုးတက်မှုကို မြှင့်တင်ရန်အတွက် သက်ဆိုင်ရာများကို နက်ရှိုင်းစွာကူးလူးဖလှယ် ဆွေးနွေးခဲ့ကြသည်။

AA လို အစိုးရမဟုတ်တဲ့အဖွဲ့နဲ့ နယ်စပ်ပြဿနာ မဆွေးနွေးဘူးလို့ ဘင်္ဂလားဒေ့ရှ်အစိုးရပြော

ဒီဇင်ဘာ ၂၃

လက်ရှိဖြစ်ပေါ်နေတဲ့ ရခိုင်ပြည်နယ်က အကျပ်အတည်းတွေနဲ့ နယ်စပ်ပြဿနာတွေကို ကိုင်တွယ်ဖြေရှင်းဖို့ မြန်မာအစိုး ရကို တိုက်တွန်းလိုက်ပြီး ရခိုင်တပ်တော် ခေါ် AA လို အစိုးရမဟုတ်တဲ့အဖွဲ့အစည်းတွေနဲ့ ဆွေးနွေးဖို့ မဖြစ်နိုင်ကြောင်း ဘင်္ဂလားဒေ့ရှ်အစိုးရက ပြောကြားလိုက်ပါတယ်။

ထိုင်းနိုင်ငံမှာ ပြီးခဲ့တဲ့သီတင်းပတ် ကြာသပတေးနေ့ (ဒီဇင်ဘာ ၁၉ ရက်နေ့) က ပြုလုပ်ခဲ့တဲ့ မြန်မာ့အရေး အလွတ်သ ဘောဆွေးနွေးပွဲမှာ ဘင်္ဂလားဒေ့ရှ်နိုင်ငံခြားရေးဝန်ကြီးဌာန အကြံပေးအရာရှိ တူးဟစ်ဟူစိန်က မြန်မာ့ကိုယ်စားလှယ်ကို ပြောဆိုခဲ့တာဖြစ်တယ်လို့ BSS သတင်းဌာနမှာ ဖော်ပြထားပါတယ်။

ဒေသတွင်း ငြိမ်းချမ်းရေးနဲ့ တည်ငြိမ်ရေးဟာ ဘင်္ဂလီဒုက္ခသည်တွေအရေး မဖြေရှင်းရင် ပြေလည်မှာ မဟုတ်ဘူးဆိုတာ ကိုလည်း တူးဟစ်ဟူစိန်က အလေးထားပြောခဲ့တယ်လို့ ဆိုပါတယ်။

အဆိုပါ မြန်မာ့အရေးအလွတ်သဘောဆွေးနွေးပွဲကို ဘင်္ဂလားဒေ့ရှ်၊ မြန်မာ၊ အိန္ဒိယ၊ တရုတ်၊ လာအိုနဲ့ တခြားနိုင်ငံ တွေက ထိပ်တန်း ကိုယ်စားလှယ်တွေတက်ရောက်ခဲ့ကြပါတယ်။

Ref: Conflict in Rakhine: Dhaka cannot engage with non-state actors

Dec -23

ရွှေကုက္ကိုလ်မြို့တွင် ကာလဝမ်းရောဂါ ဖြစ်ပွားနေသဖြင့် ထိုင်း- မြန်မာနယ်စပ်ကို တစ်လကြာပိတ်ထားရန် ထိုင်းအာဏာပိုင်များ ထုတ်ပြန်

ရွှေကုက္ကိုလ်မြို့တွင် ကာလဝမ်းရောဂါဖြစ်ပွားနေသဖြင့် ထိုင်း- မြန်မာနယ်စပ်ကို တစ်လကြာပိတ်ထားရန် ထိုင်းအာဏာပိုင်များက ထုတ်ပြန်လိုက်ကြောင်း ထိုင်းအခြေစိုက် KhaosodEnglish က သတင်းဖော်ပြထားသည်။

ဒီဇင်ဘာ ၂၃ ရက်မှစတင်ကာ ထိုင်း-မြန်မာနယ်စပ် တာ့ခ်ခရိုင်အတွင်း ကာလဝမ်းရောဂါ မပြန့်ပွားအောင် ကာကွယ်ရန် ကာကွယ်ရေးဝန်ကြီး Phumtham Wechayachai က ထိုင်း-မြန်မာနယ်စပ်ကို တစ်လကြာ ပိတ်ထားရန် အမိန့်ထုတ်လိုက်ခြင်းဟု အဆိုပါသတင်းတွင် ဖော်ပြထားသည်။

ထို့ပြင် ကာလဝမ်းရောဂါတားဆီးရန်အတွက် တာ့ခ်ခရိုင်တွင် အရေးပေါ်ခွဲစိတ်ကုသရေးဌာန (EOC) ကို ပြည်သူ့ကျန်းမာရေးဝန်ကြီးဌာနက ဖွင့်လှစ်လိုက်သည်ဟု ဘန်ကောက်ပို့စ်၏ သတင်းတွင် ဖော်ပြထားသည်။

■ news-eleven.

မြစ်ကြီးနားတွင် ဆောက်လက်စတိုက် (၄) လွှာပေါ်မှ လူငယ်အလုပ်သမားတစ်ဦး ပြုတ်ကျ၍ သေဆုံး

ဒီဇင်ဘာ ၂၃

ကချင်ပြည်နယ်၊ မြစ်ကြီးနားမြို့၊ ခေမာသီရိရပ်ကွက်၊ ဈေးအနီးတွင် ဆောက်လက်စတိုက် (၄) လွှာပေါ်မှ လူငယ်အလုပ်သမားတစ်ဦး ပြုတ်ကျ၍ သေဆုံးသွားကြောင်း သိရပါတယ်။

မကြာသေးမီရက်ပိုင်းက အမျိုးသားတစ်ဦး တိုက်ပေါ်မှပြုတ်ကျကြောင်း သတင်းရရှိသောကြောင့် ဖြစ်စဉ်နေ ရာသို့ ဒေသခံလူမှုကူညီရေးအသင်းမှ သွားရောက်ခဲ့ကြောင်း သိရပါတယ်။

“လေးထပ်အမြင့်ပေါ်ကနေပြုတ်ကျတာ။ ဦးခေါင်းကွဲပြီး ဆုံးသွားတယ်။ သူက အသက် ၁၇ နှစ်ပဲရှိသေးတယ်” လို့ အလုပ်သမားတစ်ဦးမှ ပြောပါတယ်။

တိုက်ပေါ်မှ ပြုတ်ကျ၍ သေဆုံးသည့် ရုပ်အလောင်းကို မြစ်ကြီးနားမြို့ပြည်သူ့ဆေးရုံသို့ ပို့ဆောင်လိုက်ကြောင်း သိရပါတယ်။