بصیرت افروز

:::::::::::::::::::::::::

میرے بیٹے خبیث ہیں!

🍂🍂🥀🍂🍂

⚜️ بات یہ نہیں کہ مجھے آپ کی بیٹی کے کردار پر شک ہے۔ حقیقت یہ ہے کہ مجھے اپنے بیٹوں پر اعتماد نہیں جو بہت چالاک ہیں۔ ان کے برخلاف آپ کی بیٹی بہت معصوم ہے۔ اتنی معصوم کہ ایک آئسکریم پر بھی پٹ جاتی ہے۔ اگر یقین نہیں تو شہر کے کسی بھی آئسکریم پارلر میں چل کر میرے بیٹوں کی چالاکی اور اپنی بیٹی کی معصومیت دیکھ لیجئے۔ بات آئسکریم تک کہاں رکتی ہے۔ وہ الو کے پٹھے اس کے بعد آپ کی بیٹی کو سی ویو دکھانے بھی لے جاتے ہیں ،جو اپنی گوناگوں مصروفیات کے سبب آپ خود بیٹی کو دکھا نہیں سکے۔ وہاں وہ آپ کی بیٹی کو صرف مہیب سمندری لہریں دکھانے پر قانع نہیں رہتے۔ وہ تو ساحل پر لے جا کر پیر گیلے کرنے کی دعوت بھی دیتے ہیں۔ یقین کیجئے جب ہاتھ میں ہاتھ ہو اور قدموں تلے گیلی سمندری ریت، تو بڑی شدت سے کسی گوشہ تنہائی کی طلب انگڑائی لینے لگتی ہے، جو ان دونوں کو مد و جزر والی سمندری لہروں کی طرح غرق کرنے کو بیتاب ہوتی ہے۔ میرے بیٹوں کی خباثت دیکھنی ہو تو کراچی کے پوش علاقوں میں قائم وہ گیسٹ ہاؤسز جا دیکھیے جو کمرہ یومیہ نہیں، گھنٹے کے حساب سے کرائے پر دیتے ہیں اور کسی تنہا یا شریف شخص کو نہیں دیتے۔ اگر آپ اسلام آباد یا پنڈی میں رہتے ہیں تو شکر پڑیاں کے جنگل میں ذرا اندر تک گھوم لیجیے جہاں درختوں کے نیچے پڑے کنڈوم بھی میرے بیٹوں کی خباثت خود بیان کر دیں گے۔

📱 آپ موبائل خریدتے ہیں تو اس کی سکرین پر الگ پروٹیکٹر لگاتے ہیں اور باڈی کے لیے کور کا الگ بندوبست کرتے ہیں۔ جتنا اہتمام ایک دو ٹکے کے موبائل کے تحفظ کے لیے کرتے ہیں، اتنا ہی بیٹی کے تحفظ کے لیے بھی کر لیں تو عریانیت اور اوریانیت کا سوال ہی پیدا نہ ہو۔ میں کہتا ہوں اسی فیس بک پر دیکھ لیجیے جہاں میرے بیٹوں کی والز پر بہت کار آمد بات کو بھی دس لائیک نہیں مل پاتے۔ لیکن آپ کی بیٹی صرف اتنا کہہ دے کہ "اُف اللہ آج کتنی گرمی ہے" تو لائیکس کے روم کولرز اور کمنٹس کے ایسے ایئرکنڈیشنز چل پڑتے ہیں کہ صحرائے تھر پر بھی مری کا گمان گزرنے لگتا ہے۔ میں قسم کھا کر کہتا ہوں کہ مجھے آپ کی بیٹی کے کردار پر کوئی شک نہیں۔ میرے رب کی قسم! میں اس کی معصومیت کا قائل ہوں۔ مسئلہ فقط یہ ہے کہ میرے بیٹے خبیث ہیں، آپ کو اپنی بیٹی کی حفاظت کم از کم اپنے موبائل کی طرح تو کرنی ہوگی ! ! !

🍂🍂🥀🍂🍂

✒️ رعایت اللہ فاروقی

______________