書生後生時做過工人。工種就唔講，但就同地盤佬一樣需要係戶外日曬雨淋。
當時每日十個鐘，大量的體力勞動，返到屋企真係唔好話睇書，連上網打機都無精神，食完飯，用陣電腦，就直接訓覺。
最難捱的日子一定係夏天，30幾度高溫，成個大陽曬落黎，香港仲要特別焗，空氣差，有時係馬路中間做野，加埋汽車的廢氣（所以做野果段馬路千其唔好塞車），真係呼吸都有困難。
可能我後生驚我唔捱得，「阿頭」成日叫我頂唔住要同佢講，驚我中暑。不過阿頭上左一把年紀，近退休年齡，即使做慣做熟，有時見佢樣好辛苦，我反而驚佢捱唔住（佢仲要係專做最辛苦果part）。
有次有單大工程，果日35度，我地不斷連續做左三個鐘，做到雙眼模模糊糊，已經分唔清係汗水澀眼定係太熱沖昏頭腦關係，我地終於頂唔順要抖下。果時先知太熱太累，人係唔想講野，一切說話從簡，阿頭只係講左句「走」，手指指去便利店，我就知係去買水飲。我地買左兩支兩公升大水，一半飲，一半用黎淋身淋頭，因為實在太熱。
淋完水飲完水好啲，眼睛睇得返清楚，我先發現阿頭上半身連頭黑晒，佢既皮膚本身已經係深黑同粗糙，而家更黑得誇張，黑中仲要帶熱透的紅。我第一次近距離見人既皮膚可以有咁既顏色。當時我無鏡，但我知自己既膚色都唔好得去邊。阿頭見我望一望自己手臂，似係知我睇咩，仲同我講笑：「唔怕，後生曬黑顯壯好睇。」
之後我地去左餐廳坐，阿頭慰勞下屬請飲野食個下午茶餐。依個永遠係工作中最嘆的「蛇王」時間，但驚比上級發現，一個星期最多一兩次。餐廳對工人黎講，唔單止係食飯既地方，更係休息抖下氣既好場所。出面熱到仆街，做到死狗咁，入到餐廳享受冷氣飲杯凍飲，簡直係帝王級的享受了。「蛇王」休息通常半個鐘，又要離開「天堂」做野。而家回想起來，所謂蛇王，其實係救命鐘。無依半個鐘，人真係會訓低。
我地正式午飯時間都係得半個鐘，加上人工極低，我通常都係自己帶飯坐公園食（工作放飯地點近公園）。我會盡量搵個有大樹遮陰最陰涼的地方，但有凳既地方唔等於陰涼，好多時都係花叢雜草入面最陰。二擇其一，我通常選坐凳，始終想坐得舒服啲食野，但就要繼續捱熱。
可能有人問，點解唔行入啲搵個陰涼既地方，一般公園入啲都有亭座。但一黎十幾年前既公園係比較少有依啲亭，二黎果啲亭有時遮唔到陽光，三黎得半個鐘時間，去搵位坐，不如快啲食完，攤係凳上訓。
沒錯，做果份工時我係無咩尊嚴感，完全唔介意別人目光，成個爛佬咁，每次放完工都成身臭汗，衫褲污穢不堪，但我懶理，最多搭車時企開啲驚臭親人。訓街訓公園實屬閒事，稱唔上特別，好多工人都係咁。三十分鐘食飯時間，十分鐘用黎食飯，十五分鐘用黎眠一眠休息，（剩下五分鐘係出入羅野既雜時間），依個就係我既午餐日常。
不過其實話睡十五分鐘都係假，一來驚訓過龍鬧鐘響都聽唔到，二來好熱根本唔好訓，所以只係閉目養下神。有時熱得制，曬得制，我就會加條濕毛巾蓋住個頭側睡。
當然，有時天氣真係太熱、feel到果日身體狀態唔好、或睇天文台預知翻風落雨，就會選擇去餐廳堂食，咁係對自己最好，但成本就比帶飯貴，唔可以日日咁食法。
所以政府禁堂食，我相信唔少基層工人一早就領受過，只係而家政府將其他選擇都封殺埋，逼人一定要係烈日當空下食午飯。假如果日打風落雨、太曬太熱或身體唔太舒服，想趁短短既食飯時間涼下冷氣食下飯休息下都唔得。
而最荒謬既係，唔少清潔工人都係走在保護城市衛生抗疫的前線，佢地保護裝備唔夠、待遇差、薪酬低，而家只係講人既基本需求食飯，想係公園搵個好啲既地方食飯，都可能要同其他人爭。
而最令書生覺得悲涼的係，佢地成日覺得「已經好好做」既工，其實都係相當辛苦、人工低到生活都唔夠的工。係依個城市，或許基層工人就要習慣咁樣被剝削，要「捱得苦」，即使依個苦係「無人性尊嚴」。
所以話，依個香港，可唔可怕？唔講政治，只提民生，依個政府都係垃圾。
圖片來源：網民王小明
https://www.facebook.com/makeinterestingreading/photos/a.2054575688144748/2721826931419617/
