𝙵𝚊𝚛𝚛𝚞𝚡 𝙷𝚊𝚜𝚊𝚗𝚘𝚟

ТАЙЁРГАРЛИК

Дунё шаклланур тун қучоғида,
Ғариб нигоҳлардан узилур кишан.
Шеър сачраб кетади ой дудоғидан,
Қалам йўниб берур нишидан тикан.

Асов гоҳидалик уйғонур туйқус,
Ялқов эҳтимоллик бўлажак содир.
Зилдай замин уйғоқ, само уйқусиз,
Буюк фожеага кўрар ҳозирлик.

Ридоий ҳижобин ечур тафаккур,
Ҳар бир ҳужайрада ўрмалайди ҳис.
Сабабият олчоқ, натижаси сур,
Ҳиссиёт ўта зич, кечинма тиғиз.

Энсизланиб борур дунё осуда,
Ширин ёлғон ила алдаюр Малик.
Қалбаки бефарқлик исканжасида
Узоқ куттиради кутилмаганлик.

Ва сўнгги воқелик рўй берар они
Бирламчи руҳ танга бўлмайди дохил.
Ҳақ кўнгилга диққат солар замони
Олис осмон яқин – нариги соҳил.

Farrux Hasanov

https://t.me/farrux_hasanov

***
Тобора торайиб бормоқда йўллар,
Кўнгил дарвозаси кетар кенгайиб.
Дарвешдек дайдийман беманзил, чўллаб,
Иссиқ тупроқларда руҳимни чайиб.

Бошдан шундаймидим – саҳройимижоз,
Шундай яратилган эдими тарҳим?
Аввалим шаклини унутдим бироз,
Бугун сен кимсан, деб сўрайди ҳар ким.

Кеча кўз ўнгимда дунё йўқолди,
Фақат борларимнинг чопдим ортидан.
Ҳеч вақт изламадим, лек топиб олдим
Бир дунё йўғимни пировардида.

Ўзимдан қизғониб, ўзимдан қийиб
Яшаб қўймадимми умримдан зиёд?
Бугун қай эшикни қоқмай, кўк кийиб
Қуюқ саломлашар суюқ ҳиссиёт.

Дунё кўз етмаган тасаввур туссиз,
Тақдирим туш бўлди келмаган қайтиб.
Фақат энг муҳими, кўнглим ланг – қулфсиз,
Тўртта томон қибла юрарга дайдиб.

Бошдан шундай эдим – саҳройимижоз…

Farrux Hasanov

https://t.me/farrux_hasanov

Ситора ХИДИРОВА

1
Мен сени отмаган тонгларда севдим...
Очилмаган гулда,
Кўрилмаган тушларда,
Яшалмаган лаҳзаларда,
Сезилмаган оғриқларда,
Айтилмаган қўшиқларда,
Сурилмаган ҳаёлларда,
Туйилмаган туйғуларда,
Қилинмаган гуноҳларда
Севдим...

2
Соғиндим...
Соғинчинг куйида рақс этдим...
Мен билан рақс тушди бутун борлиғим...
Бошим узра осмон рақс этди,
Оёғимнинг остида замин...
Юрагимнинг ичига қамалиб олиб,
Соғинчингнинг оғир куйида,
Оловли куйида,
Жимжит, товушсиз куйида
Рақс этдим...
Рақсимдан кўз ёшлар тўкилиб кетди...
Ғурурдан тик бошлар эгилиб кетди...
Ичимда бир томир узулиб кетди...
Соғинчингнинг ўтли, дардли куйида
Рақс этдим....

3
Суратингни чиздим кўзим оқига.
Қарочиқларимнинг рангила чиздим.
Энди бутун олам -- сен...
Сен бўлиб кўринар
Кўзгуда аксим.
Мен борлиқни сенда кўрдим...
Сени борлиқда...

Март.2020

https://t.me/farrux_hasanov

ЎЗИМГА САВОЛ

Мен бор эдим бунда минг йил илгари,
Худди ҳозиргидек яшар эдим жим.
Бугунгидек эди дунё ҳам – ғариб,
Ҳеч ким билмас эди унинг борлигин.

Ўшанда ҳам чаппа айланмасди ер,
Қуёш чиқаверар эди машриқдан.
Туронни таниган қанча баҳодир
Ўлимни топарди хоин тиғидан.

Ортига қайтмасди шунда ҳам сойлар,
Зухро вовайлоси етган осмонга.
Кўр сандиқ Тохирни сандиққа жойлаб
Оқиб кетаверган олис Журжонга.

Шунда ҳам қуёшни севарди замин,
Мендек таҳрирталаб, содда оломон.
Тоғлар тирик! Лекин чиқармас дамин,
ҳудди ҳозиргидек эди безабон.

Хўш, нима ўзгарди? Шу шамойилда
Турибдику дунё оқимсиз сувдай.
Унда нима фойда ёт тамойил-ла
Кераксиз шеър дея дунё тинтувдан?

https://t.me/farrux_hasanov

ҲУР

У дунёдан чекинди бадар,
Қўлларини чопди унинг тун.
Шум тақдирнинг шу кунга маҳтал
Арқонида кўпайди тугун.

Бир малак деб сипқорди шароб,
Сўнгги фоже бўлганди содир.
Гулни латта-путтага ўраб
Олиб кетди бир қора ботир.

Юрагини пайсалади жим,
Тўкмоқ учун қолди сўнгги қон.
Ланж руҳида уйғониб самум,
У ҳушига келди бир замон –

Қизил бўлди кўзларин ранги,
Қўли муштга тугилди қаттиқ;
Эски шифтнинг остида гангиб
Қон ҳидлади янги чимилдиқ.

Farrux Hasanov

https://t.me/farrux_hasanov

HAYDALISH

Qon simirar yuraging
jomdan sharobdek,
Kashkulingga sig'maydi
eng so'nggi diydor.
Biroz uzoq qolishing
mumkin edi, lek
Qulog'ingda
ket degan so'zning hidi bor.

26.11.2019

https://t.me/farrux_hasanov

TOMCHI

Ostonangga yetsam men daydib,
Tovonimni unga bog'lasam.
Sen nafratdan yuborsang haydab,
Yana ming yil ortimga qaytib
Yig'lasam...
Ko'zlarimdan gullasa bulut,
Osmonning dardiga berolmasam dosh.
Isyonimni sindirsa sukut,
Va barchasi bo'lsa-yu unut,
Faqat ko'zyosh...
Yashash azob ko'zga berkinib,
(tomchi bo'lish edimi oson)
Tomchilayman, tugayman tinib.
Men ketsamu tuproqqa singib,
Unutolmasang...

Farrux Hasanov

https://t.me/farrux_hasanov

СЕНГА

Танғиб танбаллайсан юрагинг энди,
“Нега”лар келади ҳеч кечиктирмай.
Суякларинггача ботган муҳаббат
Бир дард бўлиб чиқиб кетар сездирмай.

Яна ўтмишлана бошлайди хаёл,
Хотира осмонга урилар бориб.
Ҳеч қандай ўзгариш юзага чиқмас,
Қувончим кечаги, дардимчи жорий.

Сув сепилган кулдай сапчийди ўйлар,
Ҳаёт ёриб кирар хаёл бағрига.
Қара! Сенсизликдан сенланган дунё
Бўёқсиз. Кимсасиз. Ёлғиз. Қариган...

Кириб боролмайман юрагингга мен,
Томдан чакки бўлиб ўтган ёмғирдай.
Сен қайда? Мен қайда? Йўлим сарсари
Сандиқда қамалиб қолган Тохирдай.

На кўзим, на қўлим, на оёғим бор,
Кўролмайман, тутолмайман, боролмайман.
Тилим йўқ! Кесилган! Вужудим тутун!
Ҳар эсган шамолга бўлурман майна.

Сен тушсан илоҳий – Пайғамбари бор,
Менчи номуносиб бемаҳал уйқу.
Сени кўролмаган кўзларим ташна,
Кўнглимни тўйдирган хотиранг юқи.

Нега етолмайман сен томон, гулим?
Элакдан ўтмаган урвоқ сингари.
Сенсизман! Гулсизман! Рангсиз – куздаги
Дарахтдек бечора, хазондек ғариб.

Чаён чақиб олган кўримсиз умид
(оч ва тўйинмаган қофия каби).
Қачон ва қаерда бўламан таслим
(атайин қилгандай тугамас сабр).

Қанақа жараён бу интизорлик?
Нима қилай? Куяй, кулайми охир?
Ёрдек эркалайми, дўстимдек суяй?
Ҳеч бир жараённинг жинси йўқ ахир.

Ҳозир қайга боқмай сўроқ ва ундов
(тақдир яна қандай кўрсатар қилиқ).
Кеча товуш бўлиб кетгандинг, эрта
Холиқ қайтаради акс-садо қилиб.

02.06.2018

https://t.me/farrux_hasanov