SHOX PROTECT

❗Кассация шикоятимиз қаноатлантирилди, аммо, лекин, бироқ...

Тошкент шаҳар суди жиноят ишлари бўйича судлов ҳайъати кассация инстанцияси (судья М.Ахмедов бошчилигида) суди  томонидан бугун 25 июль куни шикоятимиз кўриб чиқилиб,  тўлиқ қаноатлантирилди ҳамда адолат қарор топди.

Бироқ, Жиноят процессуал кодекси (ЖПК)даги бўшлиқ туфайли ҳимоям остидаги шахсни кассация инстанцияси суди (ўзлари хоҳласаларда) дарҳол жазодан озод қила олмади, сабаби ЖПКда кассация инстанциясига бунақа ваколат берилмаган экан.

Шу сабабли, суд томонидан ишимиз ноилож яна қайтадан кўриш учун биринчи инстанция судига юборилди.(албатта ўзлари хоҳламаган ҳолатда)

Юқоридагиларга кўра, Бош прокуратура ва Олий судга ўтадиган зўр таклиф бермоқчиман, тайёр зўр таклиф.

ЖПКнинг 509-12-моддасига қуйидаги мазмунда янги банд қўшиш лозим:

- биринчи инстанция судининг ажримини бекор қилишга ва янги қарор қабул қилишга.

Тасаввур қилинг, биз биринчи инстанция судининг қароридан норози бўлиб юқори судга, яъни кассация инстанциясига шикоят  берсакда, бироқ кассация инстанция суди ваколати йўқлиги сабабли ишни яна ўша судга қайтадан юборса, адолат қаерда қолади. Шунга кўра, ушбу таклифимни ўйлаб кўринглар.

Telegram | Instagram | Facebook

Суднинг адолатсиз қарори ортида нима туради?

Дўстлар, судларнинг адолатсиз қарорлари ортида қуйидагилардан бири тургани аниқ:

➖биринчиси, судьянинг билимсизлиги;

➖иккинчиси, судьянинг мустақил қарор қабул қилмасдан, ташқи таъсирга берилганлиги;

➖учинчиси, судьянинг тўғридан-тўғри коррупция аралашганлиги;

➖тўртинчиси, юқоридагиларнинг барчаси.

P.S. Айниқса иккинчиси жуда кучли, ҳаттоки айби йўқлиги аниқ кўриниб турсада мажбуран айблов ҳукми чиқаради, мажбуран санкция беради, худди қўғирчоқ сингари. Афсус (Учинчиси алоҳида мавзу)

Сенаторларга мурожаат: Олий суд таркиби қайта кўриб чиқилиши керак!

Ҳурматли Танзила Камоловна, ҳурматли сенаторлар,

Бугун мамлакатимиздаги судларга бўлган ишончни кучайтириш ва ушбу ишончли бир маромда ушлаб туришда Олий суд судьялари асосий ва ҳал қилувчи ролни ўйнайди. Буни мендан кўра яхшироқ билишингиз аниқ.

Чунки Олий суд судьяларининг қарорлари бутун бир суд тизимига, жумладан, қуйи судларга у ёки бу маънода “илҳом” беради ва шу билан бирга аҳоли кайфиятига ҳам тўғридан-тўғри таъсир ўтказади.

Бироқ, ҳозирги кунда Олий суднинг айрим судьялари томонидан қабул қилинаётган суд қарорлари ва ажримларларни кўриб ҳайратда ёқа ушлайсиз ва уларни адолат ҳимоячилари эмас, балки "адолат бузғунчилари" деб атагингиз келади рости.

Қонунчилигимиз бўйича Олий суд таркибига ўзгартириш киритиш, жумладан, Олий суд судьяларининг ваколатини муддатидан олдин тугатиш Олий Мажлис Сенатининг ваколатига киради.

Фикримча, бу нафақат сенаторларимизнинг ваколати, балки бошқа бир томондан уларнинг халқ олидаги масъулияти ва мажбурияти ҳам ҳисобланади.

Сенаторлар судлар, хусусан, Олий суд судьяларининг хатти-ҳаракатлари юзасидан келиб тушаётган аҳоли мурожаатларига асосан мавжуд вазиятга ўз ваколатларидан келиб чиқиб бемалол баҳо бериши мумкин деб ҳисоблайман.

Фикримча, бугун Олий суд судьяларининг фаолиятига баҳо беришнинг айни вақти, адолатсиз қарорлар чиқариб, бутун бир суднинг обрўсига зарар келтираётган ва креслосида занглаб қолганларининг ўрнини бироз силжитиб қўйиш онлари бугун.

Адвокат Саидали Мухторалиев

Telegram | Instagram | Facebook

Энди ҳокимлар бир вақтнинг ўзида маҳаллий кенгаш раиси бўлолмаслиги мумкин, чунки...

Олий Мажлиси Қонунчилик палатасининг навбатдаги мажлисида ҳокимлар бир вақтнинг ўзида халқ депутатлари кенгаши раиси бўлиши мумкин эмаслиги назарда тутилган қонун лойиҳаси кўриб чиқилди.

Қонун лойиҳасида қуйидагилар белгиланмоқда:

– маҳаллий кенгашлар фаолиятига депутатлар орасидан сайланадиган раис бошчилик қилиши;

– халқ депутатлари кенгаши раиси ўз вазифаларини бажариш даврида доимий ва бошқа комиссиялар, партия гуруҳлари таркибига кириши мумкин эмаслиги;

– кенгашлар йиғилишларида ҳоким номзоди кўриб чиқилаётганида номзод маҳаллий кенгаш депутатларига ҳудудни ривожлантириш дастурини тақдим этиши шартлиги;

– маҳаллий кенгаш ва ҳоким қабул қиладиган ҳужжатлар Ягона электрон тизимда (e-qaror.gov.uz) рўйхатдан ўтказилиши ва тизимга жойлаштирилиши, рўйхатдан ўтказилмаган ҳужжатларнинг ҳақиқий эмас деб ҳисобланиши.

Депутатлар қонун лойиҳасини биринчи ўқишда қабул қилди.

Telegram | Instagram | Facebook

Ҳайдовчилар қандай ҳолларда транспорт воситасини бошқариш ҳуқуқидан маҳрум қилиниши мумкин?

Маъмурий жавобгарлик тўғрисидаги кодексга кўра, ҳайдовчилар жами 12 та ҳолатда транспорт воситасини бошқариш ҳуқуқидан маҳрум қилиниши мумкин. Булар:

1) тегишли рухсатномасиз юк ташиш қоидаларини бузса (125-1-модда);

2) бир йил давомида 3 марта ва ундан ортиқ пиёдалар йўлкаларидан юргизса, ташқи ёритиш асбобларидан фойдаланиш қоидаларини бузса, худди шунингдек йўловчиларга лойқа сачратса, йўл белгилари ва йўл ҳаракати бошқа қоидаларини бузса (128-модда 4-қисми)

3) бир йил давомида 2 марта ҳаракат тезлигини соатига 20 километрдан ортиқ, лекин 40 километрдан кўп бўлмаган катталикда ошириб юборса ёхуд 1 йил давомида 3 марта ҳаракат тезлигини соатига 20 километрдан кўп бўлмаган катталикда ошириб юборса (128-3-модда 4-қисми)

4) бир йил давомида 2 марта ҳаракат тезлигини соатига 40 километрдан ортиқ катталикда ошириб юборса ёки бир йил давомида уч марта ҳаракат тезлигини соатига 20 километрдан ортиқ, лекин 40 километрдан кўп бўлмаган катталикда ошириб юборса ёхуд бир йил давомида ҳаракат тезлигини соатига 20 километрдан кўп бўлмаган катталикда 4 марта ошириб юборса (128-3-модда 5-қисми)

5) бир йил давомида 3 марта светофорнинг тақиқловчи сигналига ёки йўл ҳаракатини тартибга солувчининг тақиқловчи ишорасига бўйсунмасдан ўтса (128-4-моддаси 4-қисми)

6) бир йил давомида 2 марта тезкор ва махсус хизматларнинг ялтироқ маёқчани ёққан ҳолда ҳамда махсус товушли сигнал билан яқинлашиб келаётган транспорт воситалари тўсиқсиз ўтиб кетишига халақит берса ёки йўлнинг қарама-қарши томонига чиқса (128-5-модда 3-қисм)

7) бир йил давомида 2 марта йўлларда йўл ҳаракати хавфсизлигига таҳдид солувчи ёки авария ҳолатини келтириб чиқарувчи гуруҳ бўлиб ҳаракат қилишда қатнашса; (129-модда 2-қисм)

8) бир йил давомида 2 марта темир йўлнинг ўтиш жойларидан ўтиш қоидаларини бузса (130-модда 2-қисм)

9) транспорт воситаларини алкоголли ичимликдан, гиёванд модда таъсиридан ёки ўзгача тарзда маст ҳолда бошқарса; (131-модда 1-қисм)

10) алкоголли ичимликдан, гиёванд модда таъсиридан ёки ўзгача тарзда маст шахсга транспорт воситасини бошқаришни топширса; (131-модда 3-қисм)

11) йўл ҳаракати қоидаларини бузиш транспорт воситалари, йўл ҳаракатини тартибга солувчи воситалар ёки бошқа мол-мулк шикастланишига олиб келса, лекин анча миқдорда моддий зарар етказмаса (134-модда)

12) транспорт воситалари ҳайдовчиларининг алкоголли ичимликдан, гиёванд модда таъсиридан ёки ўзгача тарзда мастлиги ёки маст эмаслигини белгиланган тартибда аниқлаш учун текширувдан ўтишдан бўйин товлаши (136-модда 1-қисми) транспорт воситаларини бошқариш ҳуқуқидан маҳрум қилишга асос бўлади.

❗ИЗОҲ: бир йил давомида 2, 3, 4 ва ундан ортиқ марта содир этилса жумлалари уларнинг ҳар бири учун маъмурий жазо қўлланилгандан кейин алоҳида содир этилишини англатади.

Telegram | Instagram | Facebook

⚡КОНСТИТУЦИЯ –ЭНГ ОЛИЙ ЮРИДИК КУЧГА ЭГА.

“Ўзбекистон Республикаси Давлат хавфсизлик хизмати тўғрисида”ги қонуннинг 44-моддаси 1-қисмига кўра, Давлат хавфсизлик хизматининг фаолиятида қонунларнинг аниқ ҳамда бир хилда ижро этилиши устидан назорат Ўзбекистон Республикаси Бош прокурори ва унга бўйсунувчи прокурорлар томонидан ўз ваколатлари доирасида амалга оширилади.

2-қисмига кўра, Прокурорлар Давлат хавфсизлик хизматининг тезкор-қидирув фаолияти тўғрисида ўзига тақдим этилган ҳужжатлар ва материалларда кўрсатилган маълумотларнинг махфийлигини таъминлайди.

Олий Мажлис Қонунчилик палатасида 25 июнь куни бўлиб ўтган йиғилишда “Ўзбекистон Республикаси Давлат хавфсизлик хизмати тўғрисида”ги Қонунга ўзгартириш ва қўшимчаларни қабул қилди.

Жумладан, Қонуннинг 44-моддаси 3-қисм билан тўлдирилиб, унга кўра давлат хавфсизлик хизмати фаолиятини ташкил этиш усуллари, шакллари ва махсус воситалари ҳақидаги маълумотлар прокурор назорати предметидан чиқариб ташланмоқда.

Ушбу 3-қисм Конституция ва мазкур Қонуннинг 44-моддаси 1-қисм мазмунига зид бўлиб ҳисобланади, чунки давлат хавфсизлик хизмати фаолиятини ташкил этиш усуллари, шакллари ва махсус воситалари албатта қайсидир Қонун асосида амалга оширилади.

Ўша қайсидир қонунни назорат қилиш эса прокуратура органларига Конституция даражасида ваколат қилиб берилган.

Жумладан, Янги Ўзбекистон Конституциясининг 143-моддасига кўра, Ўзбекистон Республикаси ҳудудида қонунларнинг аниқ ва бир хилда бажарилиши устидан назоратни Ўзбекистон Республикасининг Бош прокурори ва унга бўйсунувчи прокурорлар амалга оширади.

Янги Ўзбекистон Конституциясининг 15-моддаси 2-қисмида Ўзбекистон Республикаси Конституцияси мамлакатнинг бутун ҳудудида олий юридик кучга эгалиги, тўғридан-тўғри амал қилиши ва ягона ҳуқуқий маконнинг асосини ташкил этиши;

16-моддаси 2-қисмида Ўзбекистон Республикасининг қонунлари ва бошқа норматив-ҳуқуқий ҳужжатлари Ўзбекистон Республикасининг Конституцияси асосида ва уни ижро этиш юзасидан қабул қилиниши, бирорта қонун ёки бошқа норматив-ҳуқуқий ҳужжат Конституциянинг принцип ва нормаларига зид бўлиши мумкин эмаслиги қатъий равишда белгиланган.

“Норматив-ҳуқуқий ҳужжатлар тўғрисида”ги Қонуннинг 8-моддасида Ўзбекистон Республикаси Конституцияси мамлакатнинг бутун ҳудудида олий юридик кучга эгалиги, тўғридан-тўғри амал қилиши ва ягона ҳуқуқий маконнинг асосини ташкил этиши;

Ўзбекистон Республикасининг қонунлари ва бошқа норматив-ҳуқуқий ҳужжатлар Ўзбекистон Республикасининг Конституцияси асосида ва уни ижро этиш учун қабул қилиниши ҳамда унинг нормалари ва принципларига зид бўлиши мумкин эмаслиги,

18-моддасида турли норматив-ҳуқуқий ҳужжатларнинг юридик кучи бўйича ўзаро нисбати Ўзбекистон Республикасининг Конституциясига мувофиқ белгиланиши, норматив-ҳуқуқий ҳужжат ўзига нисбатан юқорироқ юридик кучга эга бўлган норматив-ҳуқуқий ҳужжатларга мувофиқ бўлиши кераклиги ва норматив-ҳуқуқий ҳужжатлар ўртасида тафовутлар бўлган тақдирда юқорироқ юридик кучга эга бўлган норматив-ҳуқуқий ҳужжат қўлланилиши белгиланган.

Юқорида келтирилган асосларга кўра, ушбу киритилган қўшимча Конституцияга зид.

📝 Назаримизда, ушбу ҳолатда, мазкур Қонунга киритилган қўшимчанинг Конституцияга мувофиқ ёки мувофиқ эмаслиги юзасидан Конституциявий суднинг хулосаси олиниши лозим.

Telegram | Instagram | Facebook

📝 Ишга қабул қилиш, меҳнат шартномасини бекор қилиш, хизмат сафарига юбориш ва бошқа меҳнатга оид ҳужжатлар шахсга доир маълумотларга кирадими?

“Шахсга доир маълумотлар тўғрисида”ги Қонуннинг 4-моддасида шахсга доир маълумотлар — муайян жисмоний шахсга тааллуқли бўлган ёки уни идентификация қилиш имконини берадиган, электрон тарзда, қоғозда ва (ёки) бошқа моддий жисмда қайд этилган ахборот эканлиги;

20-моддасида шахсга доир маълумотлар базалари Шахсга доир маълумотлар базаларининг давлат реестрида рўйхатдан ўтказилиши лозимлиги, ўз таркибида меҳнат тўғрисидаги қонунчиликка мувофиқ ишлов бериладиган шахсга доир маълумотлар мавжуд бўлган шахсга доир маълумотлар базалари рўйхатдан ўтказилмаслиги белгиланган.

❗Демак, қонун талабига кўра шахсга доир маълумотлар базаси давлат реестрида рўйхатдан ўтказилиши, меҳнатга оид қонунчилик ҳужжатлари мавжуд бўлган шахсга доир маълумотлар базалари рўйхатдан ўтказилмайди.

✅Бундан келиб чиқадики, ишга қабул қилиш, меҳнат шартномасини бекор қилиш, хизмат сафарига юбориш ва бошқа меҳнатга оид ҳужжатлар шахсга доир маълумотлар базасига кирмайди.

“Адвокатура тўғрисида”ги Қонуннинг 6-моддаси 1-қисми 4-хатбошисида:
адвокат юридик ёрдам кўрсатилиши муносабати билан адвокат томонидан сўралган ҳужжатларни ёки уларнинг тасдиқланган кўчирма нусхаларини қонунчиликда белгиланган тартибда бериши шарт бўлган давлат органлари ва бошқа органлардан, шунингдек корхоналар, муассасалар ва ташкилотлардан маълумотномалар, тавсифномалар ҳамда бошқа ҳужжатларни сўраш ва олиш ҳуқуқига эга эканлиги;

8-хатбошисида адвокат юридик ёрдам кўрсатаётган ишдаги зарур маълумотларни ёзиб олиш, материаллар ва ҳужжатлардан техника воситалари ёрдамида ўз ҳисобидан нусхалар олиш ёки уларда кўрсатилган маълумотларни ўзга шаклда қайд этиш, бунда давлат сирлари, тижорат сири ёки бошқа сирни ўз ичига олган ахборотни ошкор қилмаслик, яъни бу ерда адвокатнинг ҳаттоки давлат сири билан ҳам танишиш ҳуқуқига эга эканлиги назарда тутилмоқда.

7-1-моддасида адвокат давлат органларига ва бошқа органларга, шунингдек корхоналар, муассасалар ва ташкилотларга мазкур органлар ҳамда ташкилотларнинг ваколатларига кирадиган масалалар юзасидан адвокат томонидан малакали юридик ёрдам кўрсатилиши учун зарур бўлган маълумотномалар, тавсифномалар ва бошқа ҳужжатларни тақдим этиш масалалари юзасидан АДВОКАТ СЎРОВИНИ юборишга ҳақли эканлиги;

агар давлат органи ёки бошқа орган, шунингдек корхона, муассаса, ташкилот сўралаётган ахборотга (ҳужжатларга) эга бўлмаса, улар ўзларига мурожаат этган адвокатга сўров олинган санадан эътиборан беш кундан кечиктирмай бу ҳақда хабар қилиши шартлиги белгиланган.

📌 Яъни, адвокатлик сўрови фақат сўровда кўрсатилган маълумотлар мавжуд бўлмаган тақдирдагина рад қилиниши мумкин.

Бундан ташқари, “Адвокатлик фаолиятининг кафолатлари ва адвокатларнинг ижтимоий ҳимояси тўғрисида”ги Қонуннинг 4-моддасида ҳам адвокат қонунда белгиланган тартибда ишнинг барча материаллари билан танишиш ва ундан зарур маълумотларни кўчириб олиш ҳуқуқига эгалиги белгиланган.

Юқоридагиларга кўра, адвокатнинг профессионал касбий вазифаларини бажариш юзасидан давлат ташкилотлари ва органларига ҳимояси остидаги шахснинг манфаатларини кўзлаб киритган адвокатлик сўровларига жавоб бермаган шахслар белгиланган тартибда маъмурий жавобгарликка тортилиши шарт ва лозим.

Telegram | Instagram | Facebook

Радарлар ҳақида

Жуда кўпчилик томонидан кўчма фоторадар ва мултирадарлар орқали аниқланган қоидабузарлик ҳайдовчига ўша жойнинг ўзида маълум қилиниши керакми деган мазмунда асосли саволлар келиб тушмоқда.

Вазирлар Маҳкамасининг 975-сонли қарорининг 31-бандида кўчма фоторадар ва мобил комплекслардан фойдаланганда, ЙПХ ходими мазкур мосламанинг кўрсаткичлари билан ҳайдовчини таништириши, унинг талаби билан мосламанинг сертификати (нусхаси)ни кўрсатиши лозимлиги белгиланган.

Мисол учун, Сиз 60 км/соат тезликда ҳаракатланиш керак бўлган жойда 80 км/соатда ҳаракатланиб, қоидани буздингиз. Дейлик, қоидабузарлик мультирадарда қайд қилинди.

Мазкур ҳолатда ЙПХ ходими Сизни мосламанинг кўрсаткичлари билан таништириши, талабингизга биноан сертификатни тақдим қилиши, қанча тезликда ҳаракатланиб қоидани бузганлигингиз ҳақида Сизга маълум қилиб, иштирокингизда маъмурий баённомани расмийлаштириши шарт.

Ушбу тартибга амал қилинмасдан чиқарилган қарор ноқонуний ҳисобланади.

Сизда мазкур ҳолат кузатилган бўлса маъмурий қарорни бекор қилиш бўйича прокуратура органларига ёки тегишли тартибда жиноят ишлари бўйича судга мурожаат қилишингиз мумкин.

Telegram | Instagram | Facebook

Агар ЙПХ инспектори Сизни мастлигингизни аниқлаш мақсадида тўхтатиб, текширувдан ўтказишни талаб қилганда бўйин товласангиз транспорт воситасини бошқариш ҳуқуқидан маҳрум қилинишингиз мумкин. Бундан хабарингиз борми?

Ўзбекистон Республикаси Соғлиқни сақлаш вазирлиги, Ички ишлар вазирлиги, Олий суд ва Бош прокуратуранинг 2018 йил 20 ноябрдаги “Транспорт воситалари ҳайдовчиларининг маст ҳолатда эканлигини аниқлаш тартиби тўғрисида”ги қўшма қарорига кўра, транспорт воситаси ҳайдовчиси текширувдан ўтишдан бўйин товлаган тақдирда ДЙҲХХ ходими унга нисбатан Ўзбекистон Республикаси Маъмурий жавобгарлик тўғрисидаги кодексининг 136-моддасига мувофиқ маъмурий баённома расмийлаштириши белгиланган.

МЖтКнинг 136-моддасига кўра, транспорт воситалари ҳайдовчиларининг алкоголли ичимликдан, гиёванд модда таъсиридан ёки ўзгача тарзда мастлиги ёки маст эмаслигини белгиланган тартибда аниқлаш учун текширувдан ўтишдан бўйин товлаши транспорт воситасини бошқариш ҳуқуқидан бир йилу олти ойдан уч йилгача муддатга маҳрум қилиб, базавий ҳисоблаш миқдорининг ўн беш баравари миқдорида жарима солишга сабаб бўлади.

❗Шундай экан, агар ичмаган бўлсангиз текширувдан ўтишдан бўйин товламанг, агар ичган бўлсангиз асло транспорт воситасини бошқарманг.

Унутманг, мастлик барча ёмон иллатларнинг сабабчисидир.

🍺Ушбу постни маст ҳолатда транспорт воситасини яширинча бошқариб юрадиган танишларга юбориб қўямиз.

Telegram | Instagram | Facebook

Маҳкум жазони ўташ даврида касал бўлганда жазодан зудлик билан озод қилиниши керак

Иш юритувимга бир фуқародан мурожаат келиб тушди. Унинг айтишича фарзанди жазони ижро этиш колониясида жазони ўташи давомида аҳволи ўта оғирлашган, яъни ўпкаси саратон (рак) бўлган.

Маҳкумнинг касаллиги Ички ишлар вазирлигининг махсус тиббий комиссияси хулосаси билан тасдиқланганлиги сабабли маҳкум зонадан маҳкумлар учун ихтисослашган касалхонага этап қилинган.

Сўнг, касалхона бошлиғи томонидан маҳкумни касаллиги туфайли жазони ўташдан озод қилиш ҳақида тегишли судга тақдимнома келтирилган, бироқ тақдимнома суд томонидан рад қилинган.

Суд ўз ажримига маҳкумнинг даволаниш учун келганига оз муддат бўлганлигини, даволаниши зарурлигини, қилмиши жамият учун хавфли эканлигини ҳамда ўталмай қолган жазо муддати жуда кўплигини асос қилган.

Жиноят кодексининг 75-моддасида ҳукм чиқарилганидан сўнг жазони ўташга тўсқинлик қиладиган бошқа оғир касалликка чалинган шахс жазони ўташдан озод қилиниши лозимлиги белгиланган.

Жиноят процессуал кодексининг 534-моддасида маҳкум жазони ўтаётган вақтида бошқа оғир касалликка дучор бўлган тақдирда судья жазонинг ижро қилинишига мутасадди органнинг тақдимномасига биноан, махсус тиббий комиссиянинг хулосасига асосан маҳкумни ўталмай қолган жазони ўташдан озод қилиш тўғрисида ажрим чиқаришга ҳақли эканлиги белгиланган.

Суд томонидан юқорида келтирилган важлар ҳеч қайси қонун ва қонун ости ҳужжатларида назарда тутилмаган, яъни маҳкумнинг ЖИЭКдан даволаниш учун келганлигига оз муддат бўлганлиги, унинг даволаниши зарурлиги, қилмиш жамият учун хавфли эканлиги ва ўталмай қолган жазо муддати жуда кўплиги маҳкумни касаллик туфайли жазодан озод қилиш учун киритилган тақдимномани рад қилишга асос бўлиши кўрсатилмаган.

Мисол учун, ЖКнинг 73-74-моддаларида жазони ўташдан муддатидан илгари шартли озод қилиш ва жазони енгилроғи билан алмаштиришда маълум бир муддат қатъий равишда белгиланган, бироқ шахс касал бўлганда муддат талаб қилинмайди.

Шунга кўра, суднинг мазкур ажримига нисбатан кассация тартибида хусусий шикоят берилди.

Натижаси ҳақида қўшимча равишда маълум қилинади.

Telegram | Instagram | Facebook

Ассалому алайкум ҳурматли обуначиларим.

Бугундан бошлаб кўпчиликнинг талаб ва таклифларини инобатга олган ҳолда телеграм каналимни юритишни бошладим.

Ушбу каналда Сизни адвокатлик соҳасидаги фаолиятим билан боғлиқ бўлган ҳолатлар билан таништириб бораман.

Шунингдек, каналда асосан жиноят ва маъмурий ҳуқуқбузарлик тўғрисидаги ишлар ҳамда қонунчиликдаги энг сўнгги янгиликлар ҳақида шахсий фикр ва қарашларим бериб борилади.

📝 Қисқаси каналда Сизга олтинга тенг керакли маълумотлар бериб борилади.

telegram | instagram | facebook