Dr Baacaa Official

DHUKKUBA GIFIRAA (MEASLES)
Dr. Baacaa F. tiin

SEENSA
Dhukkubni Gifiraa dhukkuba saffisaan nama irraa namatti darbuudha. Yeroo dhihoo asittis biyya keenya keessaa bakkeewwan hedduutti akka weeraraatti ka'ee mul'achaa jira.

AKKAMIIN DHUFA?
- Dhukkubni kun vaayirasii 'Morbillivirus' jedhamuun kan dhufu yoo tahu daa'imman irratti baay'inaan mul'ata.

MALLATTOON ISAA MAAL FA'I?
- Namni tokko vaayirasiin dhukkuba gifiraa fidu qaama isaa erga seeneen booda giddu galeessaan hamma guyyaa kudha afuriitti mallattoo agarsiisuu dhiisuu mala.
- sana booda mallattooleen akka gubaa qaamaa, miirri dadhabbii namatti dhagahamuu, fedhii nyaataa dhabuu, hoqqisiisuu, bowwuu mataa, qufaa, furreessuu, dhukkubbii/diimachuu/boo'uu ijaa akkasumas madaa'uun afaanii (waan akka ashaboo afaan keessatti xixiqqaatee bahuu) ni mul'atu.
- dhagna gubaan erga eegalee guyyaa 2-4 booda shiffeen/shifiin(rash) fuula irratti bahuu eegala. Fuula irraa ka'uunis gara qaama guutuutti babal'ata. Shifeen kun yeroo hedduu barruu harkaa fi miillaa irratti hin argamu.

AKKAMIIN DADDARBA? YEROO AKKAMIIS DADDARBUU DANDA'A?
- Dhukkubni kun nama dhukkuba kanaan qabame irraa tuttuqqii fi qilleensaan baatamee nama birootti darbuu danda'a.
- Namni tokko shiffeen utuu hin mul'atin dursee guyyaa shan irraa eegalee akkasumas shiffeen mul'atee erga badee booda hamma guyyaa afuriitti dhukkubicha nama biraatti dabarsuu danda'a.

Daa'imni dhukkuba kanaan qabamte dhukkubichi xaxaa kan biraa yoo hin qabaanne, shiffeen erga mul'ateen booda hamma guyyaa 3tti fooyya'iinsa agarsiisuu dandeessi.
Shiffeen fuula irraa eegaluun guyyaa sadii ykn afur gidduutti baduu jalqaba. Qufaan hamma torban tokkoo ykn lamaa turuu danda'a.

DHUKKUBICHI XAXAA AKKAMII QABA?
Namoota dhukkuba kanaan qabaman keessaa 30% kan tahan xaxaa (complication) ni qabaatu. Xaxaa kana keessaa warri dursa qabatan Garaa Kaasaa (diarrhea) fi infekshinii sombaa (pneumonia) dha. Kan biroon kanneen akka infekshinii ijaa(conjuctivitis), infekshinii gurraa(otitis media) fi infekshinii sammuu(encephalitis) illee jiraachuu malu.

NAMOOTA AKKAMIITU XAXAA DHUKKUBA KANAAF CAALAATTI SAAXILAMA?
Warreen xaxaan dhukkubichaa irratti hammaatu keessaa muraasni:
- namoota HIV/AIDS ykn kaansarii qaban
- Haadholii ulfaa
- ijoollee hanqina nyaataa qaban
- Daa'imman baay'ee kichuu tahan
- Namoota umurii dullumaa keessa jiran

DHUKKUBA KANA OFIRRAA ITTISUUN NI DANDA'AMAA?
Eyyeen. Kunis daa'imman talaallii akka fudhatan gochuuni. Talaalliin dhukkuba kanaa akka biyya keenyaatti yeroo lama, jechuunis daa'imni tokko dhalattee umurii ji'a 9 fi ji'a 15tti kennama. Kanaaf daa'ima ofii talaalchisuun dhukkubicha ittisuun ni danda'ama.

MAAL GOCHUU QABNA?
Dhukkubni kun salphaatti hammaatee kan daa'ima ajjeesuu danda'uudha. Kanaaf mallattoolee armaan olii nama/daa'ima inni irratti mul'ate:-
- ariitiin mana yaalaa geessuu
- namoota kaan itti akka dhukkubicha hin dabarsineef qofaatti baasuu
- nyaata madaalamaa kennuufii
Ittisa isaaf immoo daa'imman keenya yeroon (umurii ji'a 9 fi 15tti) talaalchisuun barbaachisaadha.


Yaadaa fi gaaffii qabdaniif karri keenya banaadha.
Ani @DrBaacaa dha.
Fayyaa hin dhabinaa!

t.me/DrBaacaaofficial

DHUKKUBA TIRUU
@DrBaacaa tiin

Tiruun fayidaa akkamii qaba?
- Xuraawaa qaama keenya keessatti omiishamu dhabamsiisuuf akka calaltuutti tajaajila. Amooniyaa, alkoolii fi qorichoota garaagaraa qaama keenyatti summii tahan ni dhimbiiba.
- hadhooftuu (bile) maddisiisa. Kunis bullaa'insa soorataa saffisiisuu fi mar'immaan keenya baakteeriyaa irraa ittisuuf shoora qaba.
- Pirootinoota kanneen akka albuuminii fi kanneen dhiigni keenya akka kantaru taasisan (clotting factors) omiisha.
- kolestiroolii maddisiisa.
- madaala giluukosii qaama keenyaa to'ata.
- infekshinii garaa garaa nurraa ittisuu keessatti shoora ni taphata.

Waantotni dhukkuba Tiruuf nu saaxilan maal fa'i?
- alkoolii baay'inaan fayyadamuu
- infekshinii vaayirasii
- nyaata madaalamaa hin taane soorachuu
- furdina garmalee
- dhukkuba sukkaaraa (Type -2 diabetes)
- wal quunnamtii saalaa daangaa hin qabne
- Tumaa qaamaa (tattoo)
- wantota qara qaban waliin fayyadamuu
- dhangala'aa qaamaa ykn dhiiga namoota dhukkuba tiruu qabaniin wal quunnamuu
- Qorichoota aadaa fayyadamuu, qoricha hamma fudhatamuu qabuu ol liqimsuu (overdose) fi keemikaalota garaagaraa
- maatii keessa namni dhukkuba kalee qabu jiraachuu

Namni dhukkuba Tiruun qabame tokko mallattoolee akkamii agarsiisuu danda'a?
- fedhii nyaataa dhabuu
- of dadhabsiisuu
- ol ol jechuu fi ol deebisuu
- dhangala'aa hedduun qaama keessatti kuufamuu...kunis dhiita'uu ykn bokokuu garaa (ascites) fi dhiita'uu miilaan mul'achuu danda'a.
- ijaa fi gogaan halluu keelloo qabaachuu
...kunis hammi biliruubinii qaama keenya keessaa yoo heddummaatu kan uumamuudha.
- halluun bobbaa fi fincaanii jijjiiramuu
- salphaatti dhiiguu fi yoo dhiigu immoo dafee dhaabachuu dhiisuu
- dhiiga hoqqisiisuu
- qalbii dabarsuu, hirriba dhabuu fi of wallaalchisuu faa tahuu mala.

Dhukkuba Tiruu akkamiin of irraa ittisuu dandeenya?
- alkoolii baay'ee dhuguu irraa of qusachuu
- wal quunnamtii saalaa of eeggannoon raawwachuu
- furdina qaamaa hir'isuu
- qorichoota mana yaalaatii nuuf ajajaman seeraan liqimsuu
- qorichoota aadaa fi kan ogeessi nuuf hin ajajne callisnee fudhachuu irraa of qusachuu
- Qulqullina nyaataa fi dhugaatii keenyaa eeggachuu
- Wantota qara qaban waliin fayyadamuu dhaabuu
- Dhangala'aa ykn dhiiga qaama nama biraatii bahu akka argan qaqqabuu fi tuttuquu irraa of qusachuu

Dhumarratti, mallattoolee armaan olii fi kanneen biroo namni of irratti arge mana yaalaa deemee ilaalamuu qaba.

Fayyaan qabeenya hunda caala.

Ulfaadhaa!
@DrBaacaaOfficial

HARRII MATAA

Rifeensi mataa namaa giddu galeessaan guyyaatti hanga milimeetira 0.3 guddata. Kunis ji'atti hamma 1cm tahuu danda'a.

Harrii mataa maaltu fida?
Rifeensi namaa uumamaan halluu garaagaraa qaba. Kaan gurraacha, kaan akka keelloo, kaan immoo daalacha...hedduudha. Halluu rifeensa mataa namaa kanaaf sababa kan tahu piigimentii Melaanin jedhamuudha. Piigmentiin kun seelota Melaanoosaayitis jedhamaniin maddisiifama. Seelotni kunneenis gogaa keenya jalaan bakka ka'umsa hundee rifeensaa (hair follicles) jedhaman keessatti argamu.
Melaaniniin yoo heddummaatu rifeensi mataa keenya ni gurraacha'a. Melaaniniin halluu rifeensa keenyaa qofa osoo hin taane bifa gogaa keenyaaf illee gumaacha qaba.

Akkuma umuriin namaa dabalaa deemuun hammi melaaninii qaama namaa keessaa xiqqaachaa deema. Melaaniniin yoo xiqqaatu rifeensi mataa gurraachina isaa dhabaa deema. Harriitu dhufa jechuudha. Kun taatee uumamaati.

Hatahu malee namoota tokko tokko irratti osoo umuriin hin gahin harriin yeroon itti mul'atu ni jira. Umurii malee harrii baasuu (Premature greying of hair) jechuudha. Kanaaf sababoota hedduutu jiru. Isaan keessaa muraasni:

1. Hanqina Vaayitaaminii fi Albuudota nyaata keessaa
Fknf: Vaayitaamin B6, B12, D fi E akkasumas albuudota kanneen akka zinkii, kaalshiyeemii, kopperii

Soorata vaayitaaminii fi albuudota kanneeniin badhaadhan soorachuun rifeensa mataa keenya akka deebi'ee gurraacha'u gochuun ni danda'ama.

2. Dhaalaan darbuu (Genetics)
Yeroo baay'ee maatii fi firoota keessaa namni umurii malee harrii qabu yoo jiraate carraan isaa bal'aadha. Akka qorannoo saayinsiitti Jiiniin IRF4 jedhamu kan kiromoosomii 6 irratti argamu harrii umurii malee waliin akka wal qabatu lafa kaa'ameera.

3. Dhiphina (Stress)
Yeroo dhiphatnu hoormooniin Noradireenaaliin jedhamu qaama keenya keessaa baay'inaan madda. Hoormooniin kun immoo seelotni bu'uuraa (melanocytes) halluu rifeensa keenyaaf murteessoo tahan akka xiqqaatan taasisuun umurii malee harriif nu saaxiluu danda'a. Hawaasuma keenya keessattuu nama yaada baay'isutti harriin dafee ba'a jedhama mitiiree!

4. Sigaaraa Xuuxuu
Akka qorannoon biyya Hindiitti godhame tokko agarsiisutti namootni araada sigaaraa qaban carraan umurii malee harrii baasuu isaanii kan warra sigaaraa hin xuuxnee waliin yoo ilaalamu harka 2-3n caala jedha.

5. Dibata mataa fi halluu rifeensaa garaagaraa
6. Ho'aa fi ifa aduu humnaa olii
7. Dhukkuba Taayirooyidii
Dhukkubni kun keessattuu kan 'haayipootaayirooyidizim' jedhamu dubartoota keessatti harrii umurii malee fiduun gahee taphata.


Fayyaan tahaa!
@DrBaacaaOfficial

DHUKKUBA TAAYIFOOYIDII

Dhukkubni Taayifooyidii gosa baakteeriyaa Saalmoneellaa Taayifii jedhamuun namatti dhufa.

Dhukkubni kun akkamiin nama irraa namatti daddarba?
- bobbaa gara afaanii (feco-oral route)
- karaa nyaata ykn bishaan qulqullina hin qabnee (contaminated food and water)
- Tuttuqqiidhaa (direct contact)tiin namarraa namatti daddarbuu danda'a.

👉 Baakteeriyaan Saalmoneellaa Taayifii kun akka dhukkuboota kanneen akka Taayifasii bineeldotaan baatamee kan namatti daddarbu miti. Nama irraa qofaadha kan inni namatti darbuu danda'u.

Namni tokko akkamiin dhukkuba kanaan qabamuu danda'a?
Baakteeriyaan kun nyaata/bishaan qulqullina hin qabne waliin ykn bobbaa baanee osoo harka keenya sirriitti hin dhiqatin yoo afaan keenya tuqne, karaa afaanii gara garaacha keenyaa seena. Kana booda asiidii garaacha keenya keessa jiran yoo dandamate gara mar'immaan keenyaatti darbuun gara seelota Peeyers Paatchi jedhamaniitti babal'ata. Sana boodas dhiiga keenya keessa tamsa'uun gara tiruu, rajiijii fi Ispiliinii keenyaatti tamsa'uu danda'a.
Dhibeen kun irra caalaatti sirna bullaa'insa nyaataa keenya kan hubu tahus, kutaalee qaamaa hunda miidhuu danda'a.

Namni dhukkuba kanaan qabame mallattoolee akkamii agarsiisa?
Namni tokko baakteeriyaan Saalmoneellaa Taayifii erga qaama isaa/ishee seenee booda guyyoota 5-30 gidduutti mallattoo agarsiisuu jalqaba. Mallattooleen kunniinis irra jireessaan dhagna gubaa fi garaa dhukkubbii yoo tahanis sadarkaa sadiitti qoodnee ilaaluu dandeenya.

Inni jalqabaa torbee jalqabaa namni tokko mallattoo agarsiisuu eegaletti kan mul'atu yoo tahu:
- dhagna gubaa ykn tempireechara qaamaa dabalaa adeemu (stepwise fever)
- garaa kaasaa
- gogiinsa garaa, fedhiin nyaataa xiqqachuu fi
- bowwuu mataa of keessatti qabata.

Inni lammaffaa torbee lammataa irratti kan mul'atu yoo tahu mallattoolee torbee jalqabaa irratti mul'atan irratti dabalataan:
- dhukkubbii garaa fi
- dhukkubbii gogaa(madaa xixiqqoo) naannoo garaa irratti mul'atan kanneen yoo harkaan itti bu'an buruqan 'rose spots' jedhaman yeroo itti argamaniidha.

Torbee sadaffaa irratti dhiiguu fi dhohuu mar'immaanii, dhiita'uu tiruu fi Ispiliinii, akkasumas of wallaaluu, qalbii dabarsuufi mallattooleen biroon kutaalee qaamaa kanneen akka sammuu, onnee fi kalee waliin wal qabatan mul'achuu malu.

Dhukkuba Taayifooyidiif qorannoo akkamiitu godhama?
Dhukkuba Taayifooyidii qabaachuu keenyaaf qorannoon godhaman hedduutu jira. Kanneen keessaa garuu kan biyya keenya keessatti bal'inaan itti fayyadamu qorannoo dhiigaa 'Widal Test' jedhamuudha. Qorannoon kun haala salphaan kan hojjetamuu tahus garuu namni tokko kanaan dura dhukkuba taayifooyidiin qabamee yoo irraa kan fayye tahe irra deebiin akka posatiivii tahetti agarsiisa. Kanaaf widal test posatiivii tahe jechuun yeroo hunda namni tokko dhukkuba taayifooyidii qaba jechuu miti. Kanaafis qorannoon kun yeroo ammaatti badaa hin deggaramu.

Qorannooleen biroon kanneen akka 'blood culture' fi 'stool culture' kan Widal test irra fooyya'oo tahanis biyya keenya keessatti garuu bal'inaan hin argamani.

Dhumarratti, yeroo hedduu namootni taayifooyidiitu tayifesiitti jijjiiramee sammuu na lixe yeroo jedhan ni dhaga'ama. Kun hubannoo dogoggoraati. Taayifooyidiin sammuu hubuu ni danda'a. Tahus garuu Taayifooyidii fi Taayifasiin dhukkuboota garaagaraa waan tahaniif walitti hidhata hin qabani. Namni tokko garuu carraan isaa baay'ee xiqqaa tahus lamaan isaaniin wal faana qabamuu ni danda'a.

Fayyaa hin dhabinaa!
@DrBaacaaOfficial

TAAYIFESII


Taayifesiin dhukkuba hawaasa keenya biratti heddumminaan beekamuudha. Namootni gara mana yaalaa yoo deeman dhukkubni isaan qabda jedhaman keessaa Taayifesiin heddumminaan ka'a.

Taayifesiin kun maali?
Taayifesiin gosoota dhukkubaa Infekshinii jalatti kan ramadamu yoo tahu baakteeriyaadhaan dhufa. Baakteeriyootni kun akka gosa Taayifesii sanaatti garaagaradha. Isaanis gosa lama:

Inni jalqabaa 'Endemic Typhus' jedhamuun kan beekamu yoo tahu gosa baakteeriyaa Rikeetisiyaa Taayifii jedhamuun dhufa. Dhukkubni kan daddarbu tafkii hantuutaa fi adurree irraa gara namaa dhufaniini.

Inni lammaffaa 'Epidemic Typhus' kan jedhamu yoo tahu gosa baakteeriyaa Rikeetisiyaa Pirowaazakii jedhamuun kan dhufu yoo tahu, injiraan dhagnaa fi uffata namaarra jiraataniin kan daddarbuudha.

Dhukkubni Taayifesii mallattoo akkamii agarsiisa?
Mallattoolee dhukkuba Taayifesii mallattoolee dhukkubni infekshinii kanneen biroon agarsiisan irraa adda baasuuf ni ulfaatu.
- dhagna gubaa hamaa
- dhukkubbii garaa fi ol deebisuu(hoqqisiisuu)
- dhukkubbii maashaalee fi buusaa qaamaa
- of dadhabsiisuu, qorrisiisuu
- mataa bowwuu
- dhukkubbii gogaa(rash) kan yeroo muraasa booda mul'atu fa'i.

Dhukkubni kun yeroo hedduu qulqullina ofii eeggachuu dhabuu fi namoota mana sirreessaa keessa jiran irratti heddumminaan ni mul'ata. Qulqullina ofii eeggachuun mala ittiin ofirraa ittisan keessaa isa jalqabaati jechuudha.

Namni tokko Taayifesiin qabamuu isaa kan mirkanaa'u qorannoo laaboraatoorii dhiigaa erga isaaf godhamee boodadha.

Taayifesii fi Taayifooyidiin tokkoo?
Dhumarratti, Taayifesii fi Taayifooyidiin akka waan dhukkuba tokko ta'aniitti ykn immoo inni tokko yoo hammaate akka waan isa tokkotti cehuutti namootni hubatan ni jiru. Kuni dogoggora. Lamaan isaanii dhukkuba garaagaraati. Baakteeriyaa adda addaan dhufus. Nama tokko irratti lamaan isaanii mul'achuu danda'u. Garuu walitti hidhata hin qabani.

Waa'ee Taayifooyidii yeroo itti aanutti bal'inaan kan ilaallu taha.

Ulfaadhaa!
@DrBaacaaOfficial

HIRRIBA

Hirribni qaamaa fi sammuu keenyaaf waantota barbaachisoo ta'an keessaa tokkodha. Yeroon hirribaa yeroo qaamni keenya seelota isaa suphee anniisaa itti haaromfatuudha.

Hirriba sa'a hammamiif rafuu qabna kan jedhu umurii namaan garaagara tahus, giddu galeessaan dargaggeessi tokko halkan tokkotti yoo xiqqaate sa'atii 7 rafuu akka qabu qorannoon lafa kaa'a. Daa'immanii fi maanguddootaaf sa'a kanaa ol barbaachisuu mala.

Hirriba gahaa yoo hin arganne qaamni keenya hojii isaa seeraan hojjechuuf ni rakkata. Akkasumas hanqinni hirribaa dhukkuboota kanneen akka dhiibbaa dhiigaa, onnee, dhukkuba sukkaaraa fi dhiphina sammuu fa'iif nama saaxiluu danda'a.

Kanaaf akkamitti hirriba gahaa argachuu dandeenya?
- yeroo rafuuf jennutti kutaa ciisichaa dukkanaa'aa fi wacni keessa hin jirre mijeeffachuu
- meeshaalee elektrooniksii kanneen akka television, kompiyuutaraa fi bilbilaa of irraa fageessuu. Bilbila keenya rafuuf yoo jennu sa'a tokko dura of irraa yoo fageessine ni filatama.
- Yeroo rafuuf jennutti kitaaba dubbisuu amaleeffachuu (bilbila yookaan kompiyuutara irraa miti)
- Yeroo rafuuf jennutti buna, alkoolii fi sigaaraa xuuxuu irraa of qusachuu. Yoo kan fayyadamnu tahe alkoolii sa'atii hirribaan dura sa'a 4 dursanii fayyadamuun ni filatama.


Fayyaa hin dhabinaa!
Nagaa oolaa!
@DrBaacaaOfficial