Ewunet Media

የጡት ካንሰር ህመም በወጣት የእድሜ ክልል ባሉ ሴቶች ላይ አሳሳቢ እየሆነ መምጣቱ ተገለፀ

የጡት ካንሰር የሚጠቁ ሴቶች በወጣትነት እድሜ ላይ ያሉ መሆኑ በሽታውን ከሌላው ጊዜ በተለየ አሳሳቢ እንዲሆን አድርጎታል።

በርካታ ሴቶች ምልክቶቹን ባለማወቅ ለረጅም ጊዜ ከህመሙ ጋር ቆይተው ነገሩ ስር ከሰደደ በኃላ ወደ ህክምና ተቋማት ይመጣሉ። ይሄም ችግሩ ህክምናው ተሰጥቶ የመዳን እድላቸው በጣም አነስተኛ ያደርገዋል ሲሉ በጥቁር አንበሳ ሆስፒታል በቀዶ ህክምና ክፍል ውስጥ የጡት እና የኢንዶክሪም ሰርጅን ዶክተር ህይወት የሺጥላ ለብስራት ሬድዮና ቴሌቩዥን ተናግረዋል።ኢትዮጲያ ውስጥ ሴቶች ላይ ከሚከሰቱ ካንሰሮች ሁሉ የጡት ካንሰር የመጀመሪያውን ደረጃ ይዞ ይገኛል። እንዲሁም ጥናቶች እንደሚያመለክቱት በዓመት 16 ሺህ አዳዲስ የህመሙ ተጠቂዎች ሪፖርት ይደረጋል።

እንዲሁም ወደ 9 ሺህ ያህል ሞት  በጡት ካንሰር ምክንያት ሪፖርት እንደሚደረግ ጥናቶች ያሳያሉ ብለዋል።በመሆኑም ጥቁር አንበሳ ሆስፒታል ከቸርችል ጤና ጣቢያ ጋር በመሆን አንዲት ሴት የጡት ምርመራ ማድረግ እንድትችል ቸርችል ጤና ጣቢያ ላይ የተቋቋመው ዋንስቶፕ ክሊኒክ የሚባል ከጀርመን ፕሮጀክት ጋር በመተባበር እየሰሩ እንደሚገኙ ገልፀዋል። በዚህ ፕሮጀክት ላይ ወደ 200 የሚሆኑ ሴቶች የጡት ካንሰር ቀዶ ህክምና ማድረጋቸውንም ገልፀዋል ።

በጥቁር አንበሳ ሆስፒታል የተሻለ የጡት ካንሰር ህክምና ለመስጠት እየተሞከረ እንዳለ የገለፁት ዶክተር ህይወት ህክምናውን የሚሰጡ የጤና ባለሙያዋች በማሰልጠን በጡት የቀዶ ህክምና ሰብ ስፕሻላይዝድ ያደረጉ ሀኪሞች ህክምናው እንዲሰጡ እየተሰራ እንደሚገኝ ገልፀዋል። እንዲሁም የኬሞ ቴራፒ የጨረር ህክምና እንቅስቃሴ እያደረጉ እንዳለ ጨምረው ገልፀዋል።

ከዚህ በተጨማሪ ጥቁር አንበሳ ሆስፒታል ሁለተኛ ማሽን ለማስገባት እንቅስቃሴ እያደረገ መሆኑን አክለዋል በመሆኑም ለረጅም ጊዜ የጨረር ህክምና ወረፋ የሚጠብቁ ሰዎችን እንግልት ይቀንሳል። ወረፋ በመጠበቅ ህይወታቸው የሚያልፍ በርካታ ሴቶች ህይወት መታደግ ይችላል ተብሎ ይጠበቃል። የጡት ካንሰር ቀድሞ ከተመረመረና  ህክምናው ቶሎ ከተወሰደ ወደ ቀድሞ የኑሮ እንቅስቃሴ መመለስ እንደሚቻልና መዳን እንደሚቻል እንዲሁም ጥቁር አንበሳ ሆስፒታል በተቻለው አቅም ሴቶች ቶሎ ወደ ህክምና ቦታ እንዲመጡ የግንዛቤ ማስጨበጫ ስራ እየሰራ እንደሚገኝም ዶክተር ህይወት የሺጥላ ጨምረው ለብስራት ሬዲዮና ቴሌቪዥን ተናግረዋል ።

@Ewunet_Media

በአዲስ አበባ ከተማ በስድስት ክፍለ ከተሞች የስምና ንብረት ዝውውር ታገደ

በአዲስ አበባ ከተማ ለመሬት ይዞታ ማረጋገጥ ሥራ ሲባል ለቀጣይ 5 ወራት በስድስት ክፍለ ከተሞች የስምና ንብረት ዝውውር ታገደ።የከተማዋ መሬት ይዞታ ምዝገባና መረጃ ኤጄንሲ እንዳስታወቀው፥ ከመሬት ይዞታ ጋር ተያይዞ የሚስተዋሉ ችግሮችን ለመፍታት በትኩረት እየተሰራ ነው።

ለዚህም ዘመናዊ ሁለገብ ካዳስተር ግንባታ ስርዓት በመዲናዋ ሙሉ በሙሉ ተግባራዊ ለማድረግ ሥራ መጀመሩን አመልክቷል፡፡አሁን ላይ ከአዲስ አበባ ጠቅላላ የቆዳ ስፋት ውስጥ 54 በመቶ ለሚሆነው የመሬት ይዞታ ማረጋገጥ ሥራ መሰራቱ ተጠቁሟል።

በተያዘው በጀት ዓመት ለመጨረሻ ጊዜ በ136 ቀጠናዎች የሚገኙ ይዞታዎችን አረጋግጦ ለመመዝገብ እየተሰራ ነው ተብሏል።በዚህ መሠረትም የይዞታ ማረጋገጥ ስራው በተመረጡ ስድስት ክ/ከተሞች በቀጣይ አምስት ወራት ውስጥ እንደሚከናወን ተጠቅሷል።ለመሬት ይዞታ ማረጋገጥ ሥራው ሲባልም ምዝባ በሚካሄድባቸው የክ/ከተሞቹ ወረዳዎች እስከ ቀጣየዩ ሚያዝያ ወር መጨረሻ አካባቢ የስምና ንብረት ዝውውር መታገዱ ተገልጿል።

ባለይዞታዎች ከታሕሣሥ 20 ቀን 2017 ዓ.ም ጀምሮ ባሉት ተከታታይ 10 ቀናት የይዞታ ይረጋገጥልኝ ማመልከቻ እንዲያቀርቡም ጥሪ ቀርቧል።ክፍለ ከተሞችም የካ፣ ለሚ ኩራ፣ አቃቂ ቃሊቲ፣ ንፋስ ስልክ ላፍቶ ፣ቦሌ እና ኮልፌ ቀራኒዮ መሆናቸው ተመላክቷል።

@Ewunet_Media

ከቦታና ከቤት ግብር ገቢ 1.98 ቢሊዮን ብር መሰብሰቡን የአዲስ አበባ ገቢዎች ቢሮ አስታወቀ

👉 ክፍያ እስከ የካቲት 30 ቀን መፈፀም ይኖርበታል

የአዲስ አበባ ከተማ አስተዳደር ገቢዎች ቢሮ  የቦታና የቤት ግብር የመክፈያ ጊዜ በበጀት  ዓመቱ እስከ የካቲት 30 ቀን 2017 ዓ.ም መሆኑን አሳስቧል።

ቢሮው  በ2017 በጀት ዓመት 5 ወራት ከቦታና ከቤት ግብር ለመሰብሰብ ከታቀደው ገቢ 1.98 ቢሊዮን ብር  መሰብሰቡን በቢሮው የግብር አወሳሰን ድጋፍ ክትትል ቡድን አስተባባሪ አቶ ኸይሩ ሁሴን ለብስራት ሬዲዮ እና ቴሌቪዥን ተናግረዋል።

የቦታና የቤት ግብር አዋጅ ቁጥር 80/1968 መሰረት ማንኛውም ባለይዞታ የቤትና የቦታ ግብር እንዲከፍል የሚደነግግ ሲሆን በአዲስ አበባ ከተማ አስተዳደር ፋይናንስ ቢሮ ሚያዚያ 2015 ዓ.ም በተደረገ የክፍያ ማሻሻያ መሰረት ግብሩ እየተሰበሰበ መሆኑን አስታውቋል ።

በአዋጁ በተቀመጠው መሠረት የቦታና የቤት ግብር የመክፈያ ጊዜ በበጀት  ዓመቱ እስከ የካቲት 30 ቀን 2017 ዓ.ም መሆኑን የጠቀሱት  አቶ ኸይሩ የይዞታ ባለቤቶች መጨረሻ ከሚፈጠር መጨናነቅና ቅጣት ለመዳን የሚጠበቅባቸውን ትክክለኛውን የቦታና የቤት ግብር ከወዲሁ መክፈል እንደሚገባቸው አሳስበዋል ።

በቢሮው በበጀት ዓመቱ 5 ወራት ከቤትና ከቦታ ግብር 2 ነጥብ 72 ቢሊዮን ብር ለመሰብሰብ አቅዶ 1 ነጥብ 98 ቢሊዮን ብር  ወይም የዕቅዱን 73ነ ጥብ 25 በመቶኛ ተሰብስቧል።

ቢሮው መረጃዎችን በማጥራት ከዚህ በፊት ተለክተው ክፍተት ያለባቸውን ይዞታዎች በድጋሚ የመለካትና ከዚህ በፊት ያልተካተቱትን ደግሞ  ልኬት በመስራት  ወደ ግብር ስርአት እያስገባ መሆኑ ተገልጿል።

በበጀት ዓመቱ ቢሮው ከቦታና ከቤት ግብር በአጠቃላይ 8 ነጥብ 2 ቢሊዮን ብር ሊሰበሰብ እንደታቀደ ተጠቁሟል።

@Ewunet_Media